2 REYES 17

1Judá suyuta kamachej Ahaz chunka iskayniyoj watataña kamachishajtin, Elaj churin Oseas Israel suyuta kamachiyta qallarerqa. Samaria llajtamantapacha jisq'on watata kamacherqa. 2Oseasqa mana Diospa munasqanman jinachu ruwarqa. Payqa mana paymanta ñawpajta Israel suyuta kamachejkuna jinapunichu ruwarqa. 3Asiria suyuta kamachej Salmanasar Oseaspa contranta maqanakoj jamorqa. Chaymantataj Oseasqa kamachinman tukorqa, impuestotaj pagarqa. 4Chantá Asiria suyuta kamachej, Oseas paypa contrampi oqharikushasqanta jap'erparerqa. Oseasqa Egipto suyuta kamachej So sutiyojman kachakunata kachasqa, chantapis Asiria suyuta kamachejman impuestota mana pagasqañachu, imaynatachus sapa wata pagaj, ajinataqa. Chayrayku Asiria suyuta kamachejqa, Oseasta jap'ichispa carcelman wisq'aykorqa. 5Asiria suyuta kamachejqa tukuynin Israel suyuman soldadonkunanwan junt'aykorqa, Samaria llajtaman chayaspa, chay llajtata jap'inampaj kinsa wata junt'ata muyuykorqa. 6Oseas jisq'on watataña kamachishajtin, Asiria suyuta kamachej Samariata jap'erqa, chay llajtapi tiyakojkunatataj jap'ispa Asiriaman aparqa. Chaypi paykunata Halahman, Haborman, Gozán mayu qayllaman, medo nisqa llajtayojkunaj llajtankumanwan churarqa. 7Chayqa ajina karqa, israelitakuna Tata Diosninkoj contrampi juchallikusqankurayku.Tata Diosqa paykunata Egipto suyuta kamachej Faraonpa makinmanta orqhomorqa. Israelitakunaqa waj dioskunata yupaycharqanku, 8chantá ruwallarqankutaj Tata Dios llajtankumanta waj suyumanta runakunata wijch'orqa, chaykunaj usunkuta. Jinallatataj Israel suyuta kamachejkuna ima usutachus apaykamorqanku, chaykunata ruwallarqankutaj. 9Israelitakunaqa pakayllapi Tata Diospa contranta mana allinta ruwarqanku, tukuy llajtakunapi, orqo patapi, qhawana torrekunapi chanta perqayoj jatun llajtakunapipis waj diosta yupaychana altarkunata ruwarqanku. 10Jinallataj tukuy orqokunapi, thansarara sach'akuna urapi ima, rumimanta lantikunata, Asera lantikunatawan sayacherqanku. 11Jinallataj inciensota q'oshñicherqanku, Tata Dios paykuna ukhumanta waj llajtayojkunata wijch'orqa, chaykuna imaynatachus q'oshñichej kanku jinallatataj. Israelitakunaqa ancha millayta ruwaspa Tata Diosta phiñacherqanku. 12Lantikunata yupaychanankuta Tata Dios manapuni munashajtimpis, paykunaqa lantikunata yupaychallarqankupuni. 13Tata Diosqa Israelitakunata, Judá suyupi tiyakojkuna ima, Diosmanta willajkunanejta, kamachinkunanejta ima k'amicherqa: Mana allinta ruwaspa purisqaykichejmanta kutirimuychej; tataykichejkunaman qosqay kamachisqaykunata, yachachisqaykunatapis kasuychej. Chaykunata Noqamanta willajkunanejta willacherqaykichej, nispa. 14Paykunarí mana kasorqankuchu, astawampis ñawpa tatanku jina sonqonkuta rumiyacherqanku; paykunaqa Tata Diosmanta mana jap'ikorqankuchu. 15Tata Diospa nisqanta, ñawpa tatankukunawan trato ruwasqanta, tukuy k'amisqantawan ima qhesacharqanku. Qhasi manakaj lantikunata yupaychaspa, qhasi manakajman tukorqanku. Paykunaqa muyuyninkupi kaj suyupi runakuna imatachus ruwasqankuta, kikillantataj ruwarqanku. Tata Diosqa nisqa, mana paykuna jina ruwanankuta. 16Tata Diosninkoj tukuy kamachisqanta mana kasorqankuchu. Paykunaqa qorita unuyachispa, iskay waka uña lantikunata ruwakorqanku. Asera nisqa lantikunatapis ruwakullarqankutaj. Chay jawaqa Baalta, chantá janaj pachapi tukuy ch'askakunatawan yupaychallarqankutaj. 17Jinallataj qhari wawankukunata, warmi wawankukunatapis ninapi ruphachispa diosninkuman jaywarqanku, jinallataj layqerioman, qhepanejman imachus kananmanta watunampaj qokullarqankutaj. Tata Diospa rikunanta millayta ruwaspa, Payta phiñacherqanku. 18Chayrayku Tata Diosqa israelitakunaj contrankupi sinchita phiñakorqa. Saqerpayaspa, karu suyuman preso jina apasqa kanankuta saqellarqa. Judá suyupi tiyakoj israelitakunallañata preso jina apasqa kanankkuta mana munarqachu. 19Judá suyumanta kajkunapis manallataj Tata Diosninkoj kamachisqanta kasorqankuchu, astawampis israelitakuna ima usutachus rikhurichisqankuta ruwallarqankutaj. 20Chayrayku Tata Diosqa israelitakunaj wawankukunata qhesachaspa, ñak'aricherqa, enemigonkukunawantaj atipaykuchispa, ñawpaqenmanta karuman wijch'orqa. 21Tata Dios Davidpa kamachiyninmanta Israel suyuta t'aqarqa chaypachaqa, paykuna Nabatpa churin Jeroboamta jatun kamachejninkupaj churarqanku. Jeroboamtaj israelitakunata juchallichinaman apaykuspa Tata Diosmanta karunchacherqa. 22Israelitakunaqa Jeroboampa juchallisqallampitaj purerqanku, manataj chaymanta karunchakorqankuchu. 23Chantá Tata Diosqa, paymanta willajkunanejta nisqanman jina, israelitakunata ñawpaqenmanta wijch'orqa. Israelitakunaqa Asiria suyuman preso jina apasqa karqanku. Chaypitaj kunankama kashanku. 24Asiria suyuta kamachejqa, Babiloniamanta, Cutamanta, Avamanta, Hamatmanta, chantá Sefarvaimmanta ima runata Samariaman apamorqa. Israelitakunaj cuentankumantataj Samariapi llajtakunaman paykunata churarqa. Ajinata chay runakunaqa Samariamanta dueñochakaporqanku, llajtakunapitaj tiyakorqanku. 25Paykuna chaypi tiyakuyta qallarispa, Tata Diosta mana yupaychajchu kanku. Chayrayku Tata Diosqa paykunaj contrankupi leonkunata kachaykorqa. Chay leonkunataj paykunamanta wakinta wañuracherqanku. 26Chayrayku Asiria suyuta kamachejta nerqanku: “Samaria llajtaman tiyakunankupaj aparqanki chaykunaqa, chay suyoj Diosninta imaynatachus yupaychanata mana yachankuchu. Chayraykumin chay Diosqa paykunaman leonkunata kachaykun. Chaykunataj paykunata wañurachishanku,” nispa. 27Chantá Asiria suyuta kamachej, nerqa: “Chay llajtamanta kayman apamusqaykichej sacerdotekunamanta ujninta jaqayman kutichiychej, jaqaypi tiyakuspa, diosnimpa kamachisqanta yachachinampaj, nispa. 28Jinapi Samariamanta apasqanku, chaykunamanta ujnin kaj sacerdote jamuspa, Betelpi tiyakorqa. Paytajrí, Tata Diosta imaynatachus yupaychanankuta yachacherqa. 29Chaywampis sapa suyumanta kajkunaqa, tiyakusharqanku chay llajtakunapi dioskunankuta ruwakuspa, Samaria llajtayojkuna orqo patapi ruwakusqanku altarkunaman churarqanku. 30Babilonia llajtayojkunaqa Sucot-benot sutiyoj diosninkoj lantinta ruwakorqanku. Cuta llajtayojkunataj Nergal sutiyoj diosninkoj lantinta, Hamat llajtayojkunataj Asima sutiyoj diosninkoj lantinta ruwakorqanku. 31Avá llajtayojkunarí, Nibhaz sutiyoj diosninkoj lantinta chantá Tartac sutiyoj diosninkoj lantitawan ruwakorqanku. Sefarvaim llajtayojkunataj, Adramélec chantá Anamélec sutiyoj diosninkuta yupaychaspa, wawankukunata ninapi ruphachispa jaywarqanku. 32Chay jawa Tata Diosta yupaychaj kanku chaypis, paykuna ukhumanta sacerdotekunata churakorqanku, orqo patapi waj diosta yupaychana altarkunapi sirvinankupaj. 33Ajinaqa Tata Diosta yupaychaj kanku chaypis; diosninkukunata yupaychallajtaj kanku, imaynatachus llajtankupi ruwaj kanku, ajinallatapuni. 34Paykunaqa unay ruwaj kanku, jinata kunankamapis ruwashallankupuni. Tata Diosta mana yupaychankuchu, nitaj nisqanta, kamachisqanta, yachachisqanta ima kasunkuchu. Israel sutiwan sutichasqa Jacobpa mirayninman Tata Dios kamachiykunata qosqanta, jinataj yachachisqanta mana kasunkuchu. 35Paykunawan Tata Dios tratota ruwaspa, kamacherqa: “Ama waj dioskunata yupaychankichejchu, nitaj jatunchankichejchu, nillataj uywa ñak'asqata ruphachispa jaywankichejchu. 36Manachayqa Noqa Diosnillaykichejta yupaychawaychej, uywa ñak'asqa ruphachisqatapis jaywawaychej, imaraykuchus Noqamin Egiptomanta tukuy atiyniywan orqhomorqaykichej. 37Chayrayku kasuychejpuni nisqaykunata, kamachisqaykunata, yachachisqaykunata qhelqaspa qorqaykichej chaykunata. Amataj waj dioskunata yupaychaychejchu. 38Qankunawan trato ruwasqayta ama qonqapunkichejchu, amataj waj dioskunaman k'umuykuychejchu. 39Astawampis Noqa Tata Diosnillaykichejta manchachikuwankichej; Noqallamin tukuynin enemigoykichejkunamanta kacharichisqaykichej, nispa. 40Paykunatajrí manapuni uyarikorqankuchu, astawampis ñawpa usunkuta ruwaspallapuni karqanku. 41Chay runakunaqa Tata Diosta yupaychaj kanku chaypis, lantikunatapis yupaychashallajtaj kanku. Wawanku, allchhinkupis, imaynatachus tatankukuna ruwaj kanku, ajinallatapuni kunankamapis ruwashanku.

will be added

X\