1 Remaliaspa churin Pécah Israel suyuta chunka qanchisniyoj watataña kamachishajtin, Jotampa churin Ahaz Judá suyuta kamachiyta qallarerqa. 2 Ahaz kamachiyta qallarishaspa, iskay chunka watayoj karqa. Jerusalenmantapacha chunka sojtayoj watata kamacherqa. Payqa mana Diospa munasqanman jinachu ruwarqa. Mana ñawpa tatan David jinachu purerqa. 3 Manachayqa Israel suyuta kamachejkuna jina paypis ruwallarqataj. Ahazqa churinta ninapi ruphachispa waj diosman jaywarqa. Ajina willayta ruwaspa, Tata Dios Israel suyumanta wijch'orqa, chay runakunaj usunkuta ruwarqa. 4 Ajinallatataj orqo patapi, moqo patapi, jinataj thansarara sach'a urapi, uywa ñak'asqata ruphachispa waj dioskunaman jaywarqa, inciensotapis q'oshñicherqa. 5 Chaypachata Siria suyuta kamachej Rezín, chantá Remaliaspa churin Israel suyuta kamachej Pécahwan, Ahazpa contranta maqanakoj rerqanku. Jerusalenta muyuykorqanku; jinapis mana llajtata jap'iyta aterqankuchu. 6 Chaypachallataj Edom suyuta kamachej Elat llajtata jap'erqa. Chanta chaymanta judiokunata wijch'uspa chay llajtapi tiyakorqanku, kunankama chaypi tiyakushanku. 7 Chanta Ahazqa Asiria suyuta kamachej Tiglat-pileserman kachakunata kacharqa: Kay kamachiykeqa, churiyki jina; jamuspa, Siria suyuta kamachejpa makinmanta, chantá Israel suyuta kamachejpa makinmantawan kacharichikunaypaj yanapariway. Paykunaqa noqawan maqanakoj jamushanku, nispa. 8 Jinallataj Ahazqa Tata Diospa Templonmanta, kamachejpa wasinmantawan tukuynin qolqeta, qoritawan Asiriata suyuta kamachejman uj t'inkata apacherqa. 9 Asiria suyuta kamachejtaj Ahazta uyarerqa. Damasco llajtaj contranta maqanakoj rerqa, chanta chay llajtata jap'erqa. Chay llajtayojkunatataj presota jina Kir llajtakama aparqa. Jinallatataj jatun kamachej Rezintapis wañuchicherqa. 10 Chaymanta Judá suyuta kamachej Ahazqa Asiria suyuta kamachej Tiglat-pileserwan tinkumoj Damascoman rerqa. Ahaztaj Damascopi uj altarta rikuspa, kikinta dibujaspa sacerdote Uriasman apachimorqa, kikisitunta ruwanampaj. 11 Sacerdote Uriastaj, jatun kamachej Ahaz dibujaspa apachimusqanman jina kikisitunta ruwarqa. Jatun kamachej Damascomanta kutimunampaj altarqa ruwasqaña karqa. 12 Ahaz Damascomanta chayamuytawan, altarta ruwasqata rikuspa, chay altar patapi uywata ñak'aspa jaywarqa. 13 Chay altarpi uywata ñak'aspa jaywasqanta, ch'aki mikhuy jaywasqantapis ruphacherqa, vinotataj chay pataman jich'aykorqa. Jinataj allinyakuy jaywanaj yawarnintapis altarman ch'ajchuykorqa. 14 Chaymanta Ahazqa Tata Diospa templon chimpapi broncemanta altarta oqharispa patanejman aparqa. Chaymantaj ruwachisqan altarta churarqa. Jinamanta altarqa, mosoj altarwan, templowan chay chawpinejpi jina karqa. 15 Chaymantataj Ahazqa sacerdote Uriasta kamacherqa: Jatun mosoj altarpi tutamanta uywata ñak'asqa ruphachinata, tardempitaj ch'aki mikhuy jaywanata jaywanki. Jaywallankitaj jatun kamachejpa q'olachinanta, ch'aki mikhuy jaywasqanta. Jaywallankitaj tukuynin runakunajpa uywata ñak'aspa q'olachinankuta, ch'aki mikhuy jaywasqankuta, vino jaywasqankutawan ima. Chayllapitaj ch'ajchunki uywa wañuchisqa jaywasqaj yawarninta, jaywanapaj ñak'asqa uywakunaj yawarninkutawan. Broncemanta altarrí kanqa, chaypi Tata Diosta noqa tapunaypaj, nispa. 16 Chantá sacerdote Uriasqa jatun kamachej Ahazpa kamachisqanman jina ruwarqa. 17 Chaymantataj jatun kamachej Ahazqa broncemanta ruwasqa yaku churanakunata orqhorqa, broncemanta torokunaj patampi churasqa kasharqa chay jatun kaj yaku churanatapis jurayk'ucherqa. Pampapitaj loza rumi pataman churaykucherqa. 18 Ajinallatataj samarikuna p'unchaypaj Diospa Templompi kamachejpa tiyananta churanapaj ruwasqa wasita jina phaskacherqa; jinallataj jatun kamachejpa yaykunan punku karqa, chaytapis phaskachillarqataj. Ajinata ruwarqa Asiria suyuta kamachejpa sonqonta suwanampaj. 19 Ahaz kamachishaspa tukuy ima ruwasqan, jinataj waj imakunata ruwasqampiwan Judá suyuta kamachejkunaj ruwasqankumanta willaj qhelqapi qhelqasqa kashan. 20 Jatun kamachej Ahaz wañupojtintaj, ñawpa tatankunaj covachampi, Davidpa llajtampi ayanta p'amparqanku. Paypa cuentanmantataj churin Ezequías kamacherqa.
