2 REYES 15

1Jeroboam iskay chunka qanchisniyoj watataña Israel suyuta kamachishajtin, Amasiaspa churin Azarias Juda suyuta kamachiyta qallarerqa. 2Azarias kamachiyta qallarishaspa, chunka sojtayoj watayoj karqa. Jerusalen llajtamanpacha phishqa chunka iskayniyoj watata kamacherqa, mamantaj Jerusalenmanta Jecolías karqa. 3Azariasqa Tata Diospa munasqanman jina cheqan kajta ruwarqa, tatan Amasías ruwarqa, ajinallatataj. 4Chay tukuywampis, orqo patapi waj dioskunata yupaychana altarkunata mana thuñerqachu. Chay yupaychana cheqakunapi runakunaqa, uywata ñak'aspa jaywallajpuni kanku, inciensotapis q'oshñichillajtaj kanku. 5Tata Diostajrí Azariasta wañupunan p'unchaykama lepra onqoywan onqoykucherqa. Payqa sapan uj wasipi tiyakorqa, churin Jotamtaj kamachinan wasipi, jinataj tukuy suyuta cuentanmanta kamacherqa. 6Azarías kamachishaspa tukuy ruwasqan, waj ruwasqampis, Judá suyuta kamachejkunaj ruwasqankumanta willaj qhelqapi qhelqasqa kashan. 7Azarías wañupojtintaj, ayanta Davidpa llajtampi p'amparqanku. Paypa qhepampitaj churin Jotam jatun kamachej jina tiyaykorqa. 8Juda suyuta kamachej Azarías kinsa chunka pusajniyoj watataña kamachishajtin, Jeroboampa churin Zacarías Samariamantapacha Israel suyuta kamachiyta qallarerqa. Sojta killata kamacherqa . 9Zacariasqa mana Diospa munasqanman jinachu ruwarqa, manachayqa tatankuna jina ruwarqa. Payqa israelitakunata juchallichej Nabatpa churin Jeroboam jina juchallerqa. 10Jinapi Jabespa churin Salum Zacariaspa contrampi oqharikorqa. Chanta Zacariasta k'iriykuspa runaj rikunanta wañurparicherqa. Chantá paypa cuentanmanta kamacherqa. 11Zacarías kamachishaspa tukuy ima ruwasqan, waj imakunata ruwasqan ima, Israel suyuta kamachejkunaj ruwasqankumanta willaj qhelqapi qhelqasqa kashan. 12Ajinata Jehuman Tata Diospa nisqan junt'akorqa: “Wawaykikuna, allchhiykikuna, allchhiykej wawankunan, chanta paykunaj wawankunan imalla Israel suyuta kamacheqanku,” nispa. 13Judá suyuta kamachej Uzías kinsa chunka jisq'onniyoj watataña kamachishajtin, Jabespa churin Salum Israel suyuta kamachiyta qallarerqa. Samariamantapachataj uj killallata kamacherqa. 14Imajtinchus Gadijpa churin Menahem Tirsamanta jamuspa, Samariaman yaykorqa, chanta Jabespa churin Salumta jap'iytawan, kikimpi wañurparicherqa, paypa cuentanmantataj kamacherqa. 15Salum kamachishaspa tukuy ima ruwasqan, jinataj waj imakunata ruwasqan, Zacariaspa contrampi oqharikusqampis, Israel suyuta kamachejkunaj ruwasqankumanta willaj qhelqapi qhelqasqa kashan. 16Chantá Menahemqa Tirsamanta qallarispa, Tifsapi kajkunata chanta muyuynimpi kajkunatawan, tukuyninkuta wañuchicherqa, llajtankoj punkunta mana kicharisqankurayku; ajinallatataj onqoj warmikunaj wijsankutapis khallararqa. 17Judá suyuta kamachej Azarías kinsa chunka jisq'onniyoj watataña kamachishajtin, Gadijpa churin Menahem Israel suyuta kamachiyta qallarerqa. Samaria llajtamantapachataj chunka watata kamacherqa. 18Payqa manapuni Tata Diospa munasqanman jinachu ruwarqa, imajtinchus israelitakunata juchallichej Nabatpa churin Jeroboam jinallataj juchallerqa. 19Chaypachata Asiria suyuta kamachej Pul sutiyoj, Asiria suyuta kamachej Israel suyuman yaykuykun, Israel suyuman yaykuykamorqa; Israel suyuta kamachej Menahemtaj Pulman kinsa chunka kinsayoj waranqa kilo qolqeta apacherqa, jatuj kamachej jina kamachiyninta sumajta sayachiyta yanapanampaj. 20Menahemqa Asiria suyuta kamachejman qolqeta paganampajqa, tukuy qhapajkuna uj kilo qolqeta paganankuta kamacherqa. Chantá chay qolqeta jap'ispa Asiriata kamachej llajtanman kutiporqa, manañataj astawan Israel suyuman yaykumorqachu. 21Menahem kamachishaspa tukuy ima ruwasqan, waj imakunata ruwasqampiwan Israel suyuta kamachejkunaj ruwasqankumanta willaj qhelqallapitaj qhelqasqa kashan. 22Chaymantataj Menahemqa wañuporqa. Paypa cuentanmantataj churin Pecaías kamacherqa. 23Judá suyuta kamachej Azarías phishqa chunka watataña kamachishajtin, Menahempa churin Pecaías Israel suyuta kamachiyta qallereqa. Samaria llajtamantapchataj iskay watata kamacherqa. 24Payqa mana Tata Diospa munasqanman jinachu ruwarqa, imajtinchus israelitakunata juchallichej, Nabatpa churin Jeroboam jina juchallerqa. 25Chantá ujnin yanapajnin Remaliaspa churin Pécah, Pecaíaspa contrampi oqharikuspa, Samariapi kamachinan wasipi wañucherqa, jinallataj Argobta chantá Arieta ima wañuchillarqataj. Pécahqa Galaadmanta phishqa chunka runakunawan yanapachikorqa. Jatun kamachej Pecaíasta wañuchispa, Pekaqa paypa cuentanmanta Israel suyuta kamacherqa. 26Pekaía kamachishaspa tukuy ima ruwasqan, waj imakunata ruwasqampiwan, Israel suyuta kamachejkunaj ruwasqankumanta willaj qhelqapi qhelqasqa kashan. 27Judá suyuta kamachej Azarías phishqa chunka iskayniyoj watataña kamachishajtin, Remaliaspa churin Pécah Israel suyuta Samaria llajtamantapacha kamachiyta qallarerqa. Chaypi iskay chunka watata kamacherqa. 28Payqa manapuni Tata Diospa munasqanman jinachu ruwarqa, israelitakunata juchallichej Nabatpa churin Jeroboam jina juchallerqa. 29Israel suyuta Pécah kamachishajtin, Asiria suyuta kamachej Tiglat-pileser jamuspa, Israelitakunamanta kay llajtakunata qhechorqa: Iionta, Abel-bet-maacata, Janóahta, Quedesta, Hasorta, Galaadta, Galileata, chanta tukuynin Neftalij aylloj jap'iynintawan. Kay llajtakunapi tiyakojkunatataj, presota jina Asiriaman aparqa. 30Chantá Elajpa churin Oseas Pécahpa contrampi oqharikuspa, payta wañucherqa. Chantá paypa cuentanmanta. Ozíaspa churin Jotam Judá suyuta iskay chunka watataña kamachishajtin kamacherqa. 31Pécah kamachishaspa tukuy ima ruwasqan, waj imakunata ruwasqampiwan, Israel suyuta kamachejkunaj ruwasqankumanta willaj qhelqapi qhelqasqa kashan. 32Israel suyuta Remaliaspa churin Pécah iskay watataña kamachishajtin, Uziaspa churin Jotam Judá suyuta kamachiyta qallarerqa. 33Kamachiyta qallarishaspa, iskay chunka phishqayoj watayoj karqa, Jerusalenmantapachataj chunka sojtayoj watata kamacherqa. Mamanqa Sadocpa ususin Jerusa karqa. 34Jotamqa Tata Diospa munasqanman jina cheqan kajta ruwarqa, imaynatachus tatan Ozías ruwarqa, ajinata. 35Chay tukuywampis orqo patapi waj dioskunata yupaychana altarkunata mana thuñerqachu; chayrayku runakunaqa chaypi uywata ñak'aspa jaywashallajpuni kanku, inciensotapis q'oshñichillajpuni kanku. Payqa Tata Diospa Templompi jatun kaj punkutapis ruwacherqa. 36Jotam kamachishaspa tukuy ima ruwasqan, waj imakunata ruwasqampiwan, Judá suyuta kamachejkunaj ruwasqankumanta willaj qhelqapi qhelqasqa kashan. 37Chaypachata Tata Diosqa Judá suyoj contranta Siria suyuta kamachej Rezinta, jinataj Remaliaspa churin Pécahtawan kachaykuyta qallarerqa. 38Jotam wañupojtintaj, Davidpa llajtampi, ñawpa tatankunaj covachankupi ayanta p'amparqanku. Paypa qhepantataj churin Ahaz jatun kamachej jina tiyaykorqa.

will be added

X\