2 REYES 14

1Joacazpa churin Joás Israel suyuta iskay watataña kamachishajtin, Joaspa churin Amasías Judá suyuta kamachiyta qallarerqa. 2Kamachiyta qallarishaspa, iskay chunka phishqayoj watayoj karqa. Jerusalén llajtamantapacha Juda suyuta iskay chunka jisq'onniyoj watata kamacherqa. Paypa mamanqa Jerusalenmanta Joadán karqa. 3Payqa Tata Diospa munasqanman jina allinta ruwarqa, manapis ñawpa tatan David jinapunichu. Imaynatachus tatan Joás ruwarqa, ajinallatataj paypis ruwarqa. 4Jinapis orqo patapi lanti yupaychana altarkunata mana thuñerqachu; runakuna chaykunapi uywa wañuchisqata chanta inciensotawan q'oshñichispa jaywashallarqankupuni. 5Amasiasqa kamachiyninta sumajtaña sayachejtin, pikunachus tatanta wañuchejkunata, tukuyninkuta wañucherqa. 6Tatanta wañuchejkunajpa wawankunatarí mana wañucherqachu, imaraykuchus Dios Moisesman kamachiykuna qosqampi, nin: “Tatankutaqa mana wawankoj juchankurayku wañuchinkichejchu, nitaj wawakunatapis tatankoj juchankumanta wañuchinkichejchu; aswampis sapa runa juchanmanta wañuchisqa kachun,” nispa. 7Amasiasllataj Kachi Valle nisqapi Edom llajtayojkunata chunka waranqata wañuykucherqa, maqanakupi atipaspataj Sela llajtata jap'erqa. Suticharqataj Jocteel sutiwan, kunankama chay sutiwan rejsisqa kashan. 8Ujpacha Amasiasqa Israel suyuta kamachej Jehujpa allchhin Joacazpa churin Joasman kachakunata kacharqa. Kay jinata nichispa: “Jamuy, maqanakusun,” nispa. 9Israel suyuta jatun kamachej Joastajrí Amasiasman willajta kacharqa, kay jinata kutichinankupaj: Ithapalloqa Libanopi jatun cedro sach'aman kachasqa, kay jinata nejta: “Ususiykita churiytawan casarachina,” nispa. Jinallaman Libanomanta k'ita animal chayninta purispa ithapallota sarurparisqa. 10Yachani edomikunata atipasqaykita, chayraykutaj runaykachashasqaykita. Walej chayqa, runaykachallay ari; jinapis wasillaykipi qhepakunayki sumaj kanman. Qampajpis, Judá suyupajpis llakiyta, ima nispataj mask'awajri? nispa. 11Juda suyuta kamachej Amasiasrí mana kasuta ruwarqachu. Chayrayku Israel suyuta kamachej Joasqa maqanakoj llojsimorqa, Judá suyupitaj Bet-semes cheqanejpi maqanakorqanku. 12Chanta Joaspa soldadonkunaqa, Amasiaspa soldadonkunanta atipaykorqanku, chayrayku Judá suyumanta soldadokuna sapa uj wasinkuman ayqerqanku. 13Israel suyuta kamachej Joasqa, Bet-semespi Judá suyuta kamachej Amasiasta jap'ispa, Jerusalenman rerqa. Chantá llajtaj perqanta Efraínpa punkunmantapacha Esquina nisqa punkukama pachaj pusaj chunkayoj metrota jina thuñiykorqa. 14Chantá tukuynin qorita, qolqeta, Tata Diospa Templompi tukuy kajta, jatun kamachejpa wasimpi kaj imakunatawan apakaporqa. Chantá wakinta presota jina jap'iraspa, Samariaman kutiporqa. 15Joás kamachishaspa tukuy ima waj ruwasqan, imatachus ruwasqan, atiyniyoj kasqan, Judá suyuta kamachej Amasiaswan maqanakusqan, Israel suyuta kamachejkunaj ruwasqankumanta willaj qhelqapi qhelqasqa kashan. 16Joás wañupojtintaj, Samaria llajtapi, Israel suyuta kamachejkunaj covachankupi p'amparqanku. Paypa cuentanmantataj churin Jeroboam jatun kamachej jina tiyaykorqa. 17Joacazpa churin Israel suyuta kamachej Joás wañupusqanmanta, Judá suyuta kamachej Joaspa churin Amasiasqa chunka phishqayoj watatawanraj kawsarqa. 18Amasías kamachishaspa tukuy imachus ruwasqan, Judá suyuta kamachejkunaj ruwasqankumanta willaj qhelqapi qhelqasqa kashan. 19Jerusalenpi wakin runakuna Amasiaspa contrampi oqharikorqanku, paytaj Laquis llajtaman ayqekorqa. Chaywampis oqharikojkunaqa Laquiskama payta qhatiykuspa, chaypi payta wañucherqanku. 20Chantá ayanta caballopi Jerusalenman apamuspa, Davidpa llajtampi p'amparqanku. 21Chaymantataj Judá suyumanta tukuynin runakunaqa, Amasiaspa churin Azariasta jatun kamachejninkupaj churarqanku. Azarias tatampa cuentanmanta kamachinampaj tiyaykushaspa, chunka sojtayoj watayojllaraj karqa, 22Azariastaj tatampa wañupusqanmanta qhepata, Elat llajtata wajmanta sayarichispa, Juda suyuman kutichimporqa. 23Joaspa churin Amasías Judá suyuta chunka phishqayoj watataña kamachishajtin, Joaspa churin Jeroboam Samaria llajtamantapacha Israel suyuta kamachiyta qallarerqa. Kamacherqa tawa chunka ujniyoj watata. 24Jeroboamqa mana Tata Diospa munasqanman jinachu ruwarqa, imajtinchus Nabatpa churin Jeroboam jinallataj ruwarqa. Payqa mana allinta purispa israelitakunata juchallichisqa. 25Payqa Israel suyoj jap'iynimpa mojonninta Hamatman yaykunamanta Arabá jatun qochakama watej kutichimporqa. Ajinata ruwarqa Amitaipa churin Diosmanta willaj Jonasman israelitakunaj Diosnin willasqanman jina. Jonasqa, Gat-hefer llajtamanta karqa. 26Tata Diosqa Jeroboamta yanaparqa, israelitakuna, wata runa kachun, mana wata runa kachun sonqo nanayta ñak'arishasqankuta rikusqanrayku. Rikullarqataj Israel suyuta mana pipis yanapaj kasqanta. 27Tata Diosqa israelitakunata kay pachamanta chinkachiyta manaraj nisqachu. Chayrayku Tata Diosqa paykunata Joaspa churin Jeroboamnejta kacharicherqa. 28Jeroboam kamachishaspa tukuy ima ruwasqan, waj imakunata ruwasqampiwan, wapu kasqan, chay chhikata maqanakusqan, imaynatachus Damascota, Hamatta ima Israel suyuman kutichimpusqan, kay iskay llajtakunaqa Judá suyoj jap'iynimpi karqa. Chay tukuyqa Israel suyuta kamachejkunaj ruwasqankumanta willaj qhelqapi qhelqasqa kashan. 29Jeroboam wañupojtintaj, Israel suyuta kamachejkunaj covachankupi ayanta p'amparqanku. Paypa qhepampitaj churin Zacarías jatun kamachej jina tiyaykorqa.

will be added

X\