2 REYES 13

1Juda suyuta Ocoziaspa churin Joás iskay chunka kinsayoj watataña kamachishajtin, Jehujpa churin Joacazqa Israel aylluta Samariamanpacha kamachiyta qallarerqa. Chunka qanchisniyoj watata chaypi kamacherqa. 2Joacazqa mana Tata Diospa munasqanman jinachu ruwarqa. Imajtinchus Nabadpa churin Jeroboam imata ruwaspachus israelitakunata juchallicherqa, chay jinallatataj ruwarqa. Mana chaykunamanta karunchakorqachu. 3Chayrayku Tata Diosqa israelitakunaj contrankuta sinch'ita phiñakorqa, jinataj Siria suyuta kamachej Hazaelman, chanta churin Ben-adadmanwan unaypaj Israelta jaywaykorqa. 4Chantá Joacazqa Tata Diosmanta mañakorqa, Diostaj payta uyarerqa, imaraykuchus Siria suyuta kamachej imaynatachus Israelitakunata ñak'arichisqanta rikorqa. 5Chayrayku Tata Diosqa israelitakunaman uj kacharichejta kachamorqa, paywantaj Siria llajtayojkunaj makinkumanta kacharichikorqanku. Ajinamanta israelitakunaqa ñawpajta jina wasinkupi mana imamanta manchachikuspa tiyakorqanku. 6Chaywampis israelitakunaqa manapuni saqerqankuchu, Jeroboampa ayllun imata ruwaspachus israelitakunata juchallichisqa chayta. Aswampis Aserá sutiyoj diospa lantenqa Samariapi kakushallarqapuni. 7Joacazpata soldadonkunaqa manaña ashkhachu karqanku, phishqa chunka soldado caballokunapi rejkuna, chunka carreta, chunka waranqa soldadokunapiwan imallaña karqa. Imaraykuchus Siriata kamachej Hazael tukuynintapuni wañuchichisqa, erapi pajata jina chinkarparicherqa. 8Joacaz kamachishaspa tukuy ima ruwasqan, jinataj waj ruwasqampiwan, may jina wapupuni kasqanmantawan, Israel suyuta kamachejkunaj ruwasqankumanta willaj qhelqapi qhelqasqa kashan. 9Joacaz wañupojtintaj, Samariapi p'amparqanku, paypa cuentanmantataj churin Joás kamacherqa. 10Juda suyuta jatun kamachej Joás kinsa chunka qanchisniyoj watataña kamachishajtin, Joacazpa churin Joas Israel suyuta kamachiyta qallarerqa. Samaria llajtamantapacha chunka sojtayoj watata kamacherqa. 11Payqa manapuni Tata Diospa munayninman jinachu ruwarqa, imajtinchus Nabadpa churin Jeroboam israelitakunata imata ruwaspachus juchallicherqa, chaymanta mana karunchakorqachu. Payqa juchallispallapuni purerqa. 12Joás kamachishaspa tukuy ima ruwasqan, waj ruwasqan, chanta mana manchachikuspa Juda suyuta kamachej Amasiaswan maqanakusqan ima, Israel suyuta kamachejkuna imatachus ruwasqankumanta willaj qhelqapi qhelqasqa kashan. 13Joás wañupojtintaj, Israel suyuta kamachejkunaj covachankupi, Samariapi payta p'amparqanku. Paypa cuentanmantataj Jeroboam kamachina tiyananpi tiyaykukorqa. 14Eliseoqa onqosqa kaspa, wañupunan patapiña kasharqa. Jinapi Israel suyuta kamachej Joas payta watukoj rerqa chanta Eliseoj ñawpaqempi waqaspataj, nerqa: –Tatáy, tatáy. Qanqa Israel suyupaj carretakunamanta, caballokunamanta aswan karqanki, nispa. 15Chanta Eliseo nerqa: –Jap'iy flechanapaj uj arcota, flechakunatawan, nispa. Paytaj uj wach'ina arcota, flechakunatawan jap'erqa. 16Chantá Eliseo Israel suyuta kamachejta nerqa: –Flechana arcota jap'iy, nispa. Paytaj arcota jap'erqa. Chanta Eliseo jatun kamachejpa makin pataman paypa makinta churaykorqa. 17Chantá nerqa: Inti llojsimuy lado ventanata kichariy, nispa. Paytaj ventanata kicharerqa. Eliseotaj nerqa: Flechaykuy, nispa, jatun kamachejtaj flechaykorqa. Chantá Eliseoqa qhaparerqa: Chay flechaqa Diospa señalninmin. Paymin Siria suyuta atipanaykipaj yanapasonqa. Afecpi siriokunata atipanki, paykunata tukuchinaykikama, nispa. 18Chanta Eliseo jatun kamachejta nerqa: –Flechakunata oqhariy, nispa. Oqharejtintaj, payta nerqa: –Kunanqa pampata wajtay, nispa. Paytaj kinsa kutita wajtaytawan, manaña ujtawan wajtarqachu. 19Chantá Diospa willajnenqa phiñakuspa, payta nerqa: –Sichus phishqata, sojtatapis wajtawaj karqa chayqa, siriokunata tukuchinaykikama atipaykuwaj karqa. Kunanqa kinsa kutillata siriokunata atipanki, nispa. 20Chanta chay qhepata Eliseo wañuporqa, ayantataj p'amparqanku. Chaypachata Moab suyumanta suwa runakuna sapa wata Israel suyuman yaykumuyta yachaj kanku. 21Uj kuti uj runata p'ampashajtinku, chay suwa runakuna jamushajta ujllata rikorqanku. Chayrayku chay ayata Eliseoj covachanman choqaykuytawan, ayqekorqanku. Eliseoj tullunkunanman chay aya tuparejtintaj, chaypachapacha kawsariporqa, sayarerqataj. 22Joacaz kamachispa kawsanankama, Siriata kamachej Hazaelqa israelitakunata ñak'arichillarqapuni. 23Chaywampis Tata Diosqa paykunamanta khuyakorqa, Abrahamwan, Isaacwan, Jacobwan ima tratota ruwasqanrayku israelitakunata mana saqerpayarqachu. Chayrayku Tata Diosqa kunankama ñawpaqenmanta mana paykunata wijch'uyta, nitaj chinkachiytapis munarqachu. 24Siria suyuta kamachej Hazaelqa wañorqa, paypa cuentanmantataj churin Ben-adad kamachej jina tiyaykorqa. 25Joacazpa churin Joastaj Hazaelpa churin Ben-adadpa makinmanta kutirachikaporqa, tatan Joacazmanta maqanakupi atipaspa qhechusqanku llajtakunata. Joasqa kinsa kutita Ben-adadta atipaspa, Israel suyuman chay llajtakunata watej kutichichikaporqa.

will be added

X\