2 REYES 11

1Ocoziaspa maman Atalia churin wañusqanta yachaspa, jatun kamachejpa tukuynin ayllunta wañuchicherqa. 2Jatun kamachej Jorampa ususin Josabarí, turan Ocoziaspa churin Joasta pakayllamanta orqhoytawan, uj uywaj warmitawan puñuna wasiman pakaykamorqa. Ajinamanta Joasta mana wañucherqankuchu. 3Jinapi chay uywajnin warmiwan Joasqa Tata Diospa Templompi sojta watata pakasqa karqa. Chaykamataj Ataliaqa Juda suyuta kamacherqa. 4Qanchis kaj watapitaj Joiadaqa soldadokunata kamachejkunata, kamachina wasita qhawaj soldadokunatawan Tata Diospa Templonman wajyachiytawan, chaypi juramentota ruwaspa, paykunawan uj tratota ruwarqa. Chaymantataj jatun kamachej Ocoziaspa churin Joasta rikhurichimorqa. 5Chantá paykunata kamacherqa: “Kayta ruwanaykichejta munani. Ujnin kaj t'aqaqa samarikuna p'unchaypi jatun kamachejpa wasinta qhawankichej. 6Ujnin kaj t'aqataj ura law punku nisqata qhawankichej, ujnin kaj t'aqataj soldadokunajpa tiyananku wasi wasa lawta qhawankichej. Ajinata ama pipis yaykumunanmanta qhawankichej. 7Qankunamanta iskay t'aqa samarikuna p'unchaypi llojsejkunaqa, Tata Diospa Templonta chanta jatun kamachejta qhawankichej. 8Sapa ujniykichejtaj makiykichejpi arma oqharisqa jatun kamachejpa muyuynimpi kankichej. Pillapis qankuna ukhuman qayllaykamojqa wañuchisqa kachun; jatun kamachej llojsichumpis, yaykuchumpis qankunaqa paywampuni kankichej,” nispa. 9Soldadokuna kamachejkunaqa sacerdote Joiadaj kamachisqanman jina ruwarqanku. Sapa ujtaj soldadonkunan pusarisqa samarikuna p'unchaypi qhawaj yaykojkuna, llojsejkunapiwan, sacerdote Joiadaman jamorqanku. 10Soldadokuna kamachejkunamantaj sacerdote Joiadaqa Davidpa ruwachisqan jark'akuna escudokunata, lanzakunata ima jaywarqa. Chaykunaqa Tata Diospa Templompi waqaychasqa karqa. 11Qhawaj soldadokunaqa, sapa uj arma jap'irisqa sinrulla sayaspa, Tata Diospa Templompa paña lawnmanta lloq'e lawnejkama, altar qayllanejpi jatun kamachejpa muyuynimpi karqanku. 12Chantá sacerdote Joidaqa jatun kamachejpa churin Joasta orqhomuytawan, umanman pilluta churarqa, kamachejpa imachus ruwananmanta qhelqasqata qorqa. Chantá aceitewan umanman jawiykuspa, jatun kamachejta kanampaj churarqanku. Chaymantataj tukuyninku t'ajllakuspa, qhaparerqanku: “Jallalla, jallalla jatun kamachej,” nispa. 13Templota qhawaj soldadokunata chanta runakunata ima ch'ajwajta uyarispa, Ataliaqa Tata Diospa Templonman rerqa. 14Chantá jatun kamachejta sayanta qayllapi sayashajta rikorqa, jatun kamachejta tiyaykuchina usu kasqanman jina. Jatun kamachejpa qayllampitaj kurajkuna, cornetata tocajkunawan kasharqanku. Chantá tukuy runakuna cornetata waqachispa mayta kusikusharqanku. Chayta rikuspa Ataliaqa sinch'ita qhaparispa, p'achanta llik'ikorqa: Kayqa wasanchay, wasanchay, nispa. 15Chanta sacerdote Joiadaqa soldadokunata kamacherqa: –Templo ukhumanta jawaman payta orqhoychej, pichus payman kutikojtataj espadawan wañuchiychej, nispa. Ajinata ruwarqanku, imaraykuchus sacerdote kamachisqa ama Tata Diospa Templon ukhupi Ataliata wañuchinankuta. 16Ataliata jap'ispa, caballokunaj yaykunan punkuta kamachejpa wasinman aparqanku, chaypitaj wañucherqanku. 17Chantá Joiada Tata Dioswan, Judamanta kajkunawan, jatun kamachejwan ima uj tratota ruwarqa Tata Diosta kasuspallapuni purinankupaj; jinallataj jatun kamachejwan Judamanta kajkunawan waj tratota ruwarqanku. 18Chanta tukuyninku Baalta yupaychana wasiman rispa, thuñiykorqanku, altarnintapis, lantikunatapis phirerqanku. Baalpa sacerdoten Matantapis altar qayllapi wañuchillarqankutaj. Joiada sacerdotetaj Tata Diospa Templonta qhawanankupaj soldadokunata churarqa. 19Chantá Tata Diospa Templomantapacha kamachina wasikama soldadokunata kamachejkunawan, kamachina wasita qhawaj soldadokunawan, tukuy runakunawan ima, jatun kamachejta riyserqanku. Qhawaj soldadokuna yaykunku chay punkutataj yaykorqanku. Joastaj kamachina tiyanaman tiyaykukorqa. 20Tukuynin runakunataj maytapuni kusikorqanku. Kamachina wasipi Ataliata wañuchisqankumanta qhepata, Chaymantaraj llajtapeqa allin kawsay karqa, Ataliaqa kamachina wasi chaynejpi wañuchisqa kasqanmanta qhepanejman, Jerusalen llajtapi allin kawsay karqa. 21Joás kamachiyta qallarishaspa, qanchis watayojllaraj karqa.

will be added

X\