2 CORINTIOS 7

1Munakusqasníy, Diosqa willawanchej kay imasta qonawanchejta; chayrayku cuerponchejta, sonqonchejtapis llimphuchakuna tukuy ch'ichi kajmanta. Diosta manchachikuspa, astawan astawan juchamanta t'aqakuna. 2Sonqoykichejpi munakuywan jap'iwayku; mana pitapis ima sajrata ruwarqaykuchu, nitaj pitapis pantacherqaykuchu, nillataj pitapis ch'awkiyarqaykuchu. 3Chaytaqa mana qankunata juchachanayraykuchu niykichej, imaraykuchus ñawpajtaña nerqaykichej qankunaqa sonqosniykupi kashasqaykichejta, khuskapuni kananchejpaj wañuypipis, kawsaypipis. 4Qankunamanqa sut'inta parlaykichej. Qankunamanta may sonqo junt'asqa kani. Tukuy llakiyniykupitaj may sonqochasqa, kusiyniyojtaj kani. 5Macedoniaman chayamusqaykumantapacha, ni imaynata samarikorqaykuchu, astawanqa imaymana llakiykuna jamuwarqayku; jawamanta ch'ajwas karqa, ukhumantataj manchachikuykuna. 6Chaywampis Diosqa, pichus yachan llakisqasta sonqochayta, Payqa noqaykutapis sonqochawarqayku Titoj chayamusqanwan. 7Mana chayamusqallanwanchu sonqochawarqayku; astawanqa imaynatachus payta sonqocharqankichej, chay jinallatataj sonqochawarqayku. Payqa willawarqayku rikuyta munawasqaykuta, waqasqaykichejta, noqamantapis llakikusqaykichejta ima. Chaytaj astawanraj kusichiwarqa. 8Qhelqamusqay cartawanchus llakicherqaykichej chaypis, mana pesachikunichu. Jaqay kutipeqa pesachikorqani; chaypacha llakikorqani, yachaspa chay cartaqa uj ratolla llakichisusqaykichejta. 9Kunanqa kusikuni, mana qankunata llakichisqayraykuchu, manachayqa kusikuni, imaraykuchus chay llakeyqa juchamanta Diosman kutirikunaykichejpaj karqa. Llakikusqaykichejqa Diospa munasqanman jina karqa, chayraykutaj noqaykumantaqa mana ima sajratapis jap'erqankichejchu. 10Diospa munasqanman jina llakikoyqa juchamanta Diosman kutirikuyman pusan salvasqa kanapaj. Chaymantaqa mana pesachikunachu. Kay pachaman jina llakiyrí wañuyta apamun. 11Qankunaqa llakikorqankichej Diospa munasqanman jina. Qhawaychej may jina k'uchismanchus tukorqankichej, jinallataj munarqankichejpuni mana juchayojpaj qhawasqa kayta. Chay jucharayku phiñakorqankichej, manchachikullarqankichejtaj. Qankunaqa rikuwaytapuni munarqankichej, tukuy sonqowantaj munarqankichej chay juchallejta wanachinapaj castigayta. Chay tukuypi rikuchikorqankichej mana juchayoj, llimphustaj kasqaykichej. 12Ajinaqa cartata qhelqamushaspa, mana chay juchallikojpichu yuyasharqani, nitaj pejpa contrampichus juchallikorqa, chay runapichu; astawanqa qhelqamorqaykichej, yachakunampaj Diospa ñawpaqempi imayna munakuyniyojchus noqaykupaj kasqaykichej. 13Chayrayku sonqochasqa kayku. Astawanqa Tito kusisqa kasqanmanta kusikuyku, imaraykuchus qankuna sonqonta pataman oqharerqankichej. 14Qankunamanta Titowan parlaspaqa, mayta jatuncharqaykichej, qankunataj mana p'enqaypi rikhurichiwarqankichejchu. Imatachus qankunaman nerqayku, chaytaqa mana llullakorqaykuchu; jinallataj imatachus Titoman willarqayku qankunamanta, chaytapis manallataj llullakorqaykuchu. 15Paypa munakuynenqa may jatumpuni qankunapaj. Sapa kuti yuyarikun kasukoj kasqaykichejmanta, imaynatachus chayamushajtin, qankuna ukhupi payta jap'erqankichej, manchachikuywan, kharkatitiywantaj, chaymanta. 16Kusikuni tukuy imapi qankuna kasukoj kasqaykichejmanta.

will be added

X\