1 Ajina ari Diosta yanapajkuna kaspa, qankunata mañayku ama qhasipajchu kananta Diospa qhasilla k'acha yanapayninta jap'isqaykichejqa. 2 Diosmanta Qhelqasqapi nin: Khuyakuy tiempopi uyarerqayki, salvakuna p'unchaypitaj yanaparqayki, nispa. Kunanmin chay khuyay tarina p'unchay; kunanmin chay salvakuna p'unchay. 3 Mana pitapis misk'achiykuchu, Diospaj ruwasqayku ama pisipaj qhawasqa kanampaj. 4 Astawanqa munayku tukuy imapi rikuchikuyta Diospa kamachisnin jina: Ancha pacienciawan ñak'ariykunapi, pisichikuypi, llakiykunapi; 5 jasut'isqas, carcelman churasqas, ch'ajwas chawpipi, sinch'i trabajospi, mana puñusqas, mana mikhusqastaj. 6 Diospa kamachisnin jina rikuchikullaykutaj llimphu kawsaypi, yachaypi, pacienciakuypi, k'acha kaypi, Espíritu Santopi, ch'uwa sonqo munakuypi, 7 cheqa kaj willaypi, Diospa atiynimpi ima. Cheqan kajpa armasninta oqharikuyku pañapitaj, lloq'epitaj. 8 Uj kutipeqa allin qhawasqa kayku, waj kutitaj mana; uj kutipeqa allinta parlanku noqaykumanta, waj kutipitaj sajrata parlanku. Wakin kutista llullasta jina qhawawayku; chaywampis cheqatapuni parlayku. 9 Mana rejsisqata jina qhawawayku; chaywampis sumaj rejsisqas kayku. Wañoj jinaña kashaspapis, kawsashaykuraj. 10 Llakisqas jina kayku, chaywampis kusisqaspuni kashayku; wajchas jina kayku, chaywampis ashkhasta qhapajyachiyku. Mana kapuyniyoj jina kashajtiykupis, astawan tukuy ima kapuwayku. 11 Corintomanta hermanosníy, qankunaman sut'ita parlamuyku mana imata pakaspa; sonqoykupis may jatun qankunapaj. 12 Noqaykoqa tukuy sonqo qankunata munakuyku, qankunatajrí iskay sonqolla munakuwayku. 13 Kunanqa wawasniyta jina niykichej: Qankunapis tukuy sonqo munakuwayku ari. 14 Ama yananchakuychejchu uj yugollapi Diospi mana creejkunawan. Cheqa kajqa sajra kajwan mana yananchakuyta atinchu, nillataj k'anchaypis laqhawanqa chajrukunchu. 15 Jinallataj Cristowan, Kuraj Supaywanqa mana kawsakunkumanchu, nillataj Cristopi creejqa mana creejwan ujchasqa kawsakunmanchu. 16 Diospa Templompeqa ni ima lanti kananchu tiyan. Qankunamin kawsashaj Diospa templon kankichej. Diosqa nin: Paykuna ukhupi tiyakusaj, purisajtaj. Paykunaj Diosninku kasaj, paykunataj aylluy kanqanku, nispa. 17 Chayrayku nillantaj: Llojsiychej paykunaj chawpinkumanta, t'aqakuychejtaj. Ama llankhaychejchu ch'ichipaj qhawasqa imasta, Noqataj jap'ikapusqaykichej. 18 Noqaqa qankunaj Tataykichej kasaj, qankunataj churisniy, ususisniytaj kankichej, nispa nin Tukuy Atiyniyoj Señorqa.
