2 CORINTIOS 5

1Yachanchej kay jallp'api wasinchejqa kay cuerponchej. Chaychus thuñikunman chayqa, tiyapuwanchej uj wasi Diospa ruwasqan janaj pachapi wiñaypaj; chayqa mana runaj makimpa ruwasqanchu. 2Chayrayku kay pachapi kawsananchejkama mayta ayqonchej, p'achallisqa kayta munaspa janaj pacha cuerpowan. 3Ajinapeqa p'achallisqa kasunchej, manataj q'arasllachu. 4Kay wasipi kashaspa, chayrí kay cuerponchejpi mayta ayqonchej jatun llakiywan, mana aycha cuerponchej qhechusqa kanampaj munaspachu, astawanqa janaj pacha cuerpowan p'achallisqa kayta munaspa. Ajinamanta wañoj cuerpoqa atipasqa kanqa mosoj kawsaywan. 5Kay imaspajpuni Dios wakichiwarqanchej, qollawarqanchejtaj Espíritu Santota uj señata jina. 6Ajinaqa kawsanchej sonqosninchejpi kallpachasqa, yachanchejtaj cuerponchejpiraj kashaspaqa, Señormanta ch'usasqa purishasqanchejta, 7imaraykuchus creesqanchejrayku purinchej, mana rikusqanchejraykuchu. 8Noqanchej sonqonchejpi kallpachakuspa, astawanraj munasunman kay cuerponchejta saqespa, Señorwan khuska kayta. 9Chayrayku mana cuerpopi kashaspapis, chayrí cuerpopi kashaspapis, munanchej Señorta kusichiyta, 10imaraykuchus tukuyninchej Cristoj juzgadompi rikhurinanchejpuni tiyan, sapa uj kay cuerpopi kashaspa ruwasqanchejman jina jap'inanchejpaj allin kajta, chayrí mana allin kajtapis. 11Chayrayku noqayku Señorta manchachikuna kasqanta yachaspa, runasman tukuy sonqo entiendechiyta munayku. Chaywampis, Dios yachan pichus kasqaykuta. Jinallataj yuyani qankunapis yachanaykichejta sonqoykichejpa yuyasqanman jina. 12Manataj ujtawan allin kasqaykumanta parlayta munashaykuchu, astawanqa suyakushayku qankuna sonqo junt'asqa kanaykichejta noqaykumanta, kutichiyta atinaykichejpaj, pikunachus jawa kajllamanta jatunchakunku, manataj sonqopi kaj imasmantachu, chaykunaman. 13Sichus locoyasqa kayku chayqa, Diospaj locoyayku; chaywampis yuyayniykupi kashayku, chaytaj qankunaj allinniykichejpaj. 14Cristoj munakuynenqa tanqawayku ñawpajman rinaykupaj, kayta allinta yachasqaykurayku: Uj wañorqa tukuyrayku, jinallatataj tukuy wañorqanku. 15Señorqa tukuypaj wañorqa, kunan kawsajkuna amaña paykunapajchu kawsanankupaj, astawanqa kawsanankupaj, jaqay pichus wañorqa, kawsarimporqataj paykunarayku, chaypaj. 16Kunanmanta ñawpajmanqa manaña pitapis kay pacha runaspa yuyasqankuman jinachu qhawayku. Arí, Cristotapis kay pacha runaspa yuyasqankuman jina qhawaj kayku, kunanrí manaña ajinatachu qhawayku. 17Ajinaqa Cristopi kaj runaqa mosoj runañamin; ñawpa kawsayqa tukukapun, mosoj kawsaytaj chayamun. 18Chay tukuy imaqa Diosmanta jamun, pichus Cristonejta allinyachiwarqayku Paywan allinyasqa kanaykupaj, kamachiwarqaykutaj Paywan allinyakuna kasqanta parlanaykupaj, Paymanta. 19Kaytaj chay willay: Dios Tata cheqamanta Cristonejta kay pacha runasta Pay kikinwan allinyacherqa, runaspa juchasninkuta qonqayman churaspa. Noqaykumantaj kamachiwarqayku chay allinyakuymanta willanaykupaj. 20Ajina chayqa, Cristoj sutimpi willajkuna kachamusqas kayku, Diospis noqaykunejta parlashanman jina. Chayrayku, mañakuyku Cristoj sutimpi: Dioswan allinyakuychej, nispa. 21Cristoqa mana ima juchatapis ruwarqachu. Diosrí noqanchejrayku Cristota castigarqa kikin juchapis kanman jinata, noqanchej Cristopi kaspa, Diospa cheqan kaynin ruwasqa kananchejpaj.

will be added

X\