1 Kunanwanqa kinsa kutitaña qankunata watukusqaykichej. Chaypitaj tukuy ima sut'inchakonqa iskay, chayrí kinsa testigospa siminkumanta. 2 Ñawpajta nerqani, kunampis ujtawan nillanitaj chaypipis kashayman jina; ñawpajta juchallikojkunata, chay ujkunatapis nini: Ujtawan jamuspaqa, manaña qankunata khuyasqaykichejchu. 3 Qankunaqa imatapis rikuyta munankichej yachanaykichejpaj Cristo noqanejta parlasqanta. Cristoqa mana pisi kallpayojchu qankunawan, astawanqa qankuna ukhupi atiyninta rikuchin. 4 Arí, pisi kallpayoj kashaspa, chakatasqa karqa. Kunanrí kawsashan Diospa atiyninrayku. Ajinallatataj ari, noqaykupis Paypi pisi kallpas kayku, Paywantaj kawsashayku Diospa atiynimpi qankunata yanapanaykupaj. 5 Qankuna kikiykichej qhawarikuychej, yachanaykichejpaj creeypi sinch'itachus sayashankichej, chayrí manachus, chayta. Allinta qhawarikuychej. Manachu reparankichej Jesucristo qankunapi kasqanta? Manachus jina chayqa, qhesachasqa kankichej. 6 Astawanqa munayman yachanaykichejta, noqaykoqa mana qhesachasqachu kasqaykuta. 7 Diosmantataj mañakuyku ama ima sajrata ruwanaykichejpaj, manataj allimpaj qhawasqa kanaykupajchu, manachayqa qankuna allinta ruwayta yachanaykichejpaj. Noqaykoqa qhesachasqa jinapis qhepakusqayku. 8 Mana atiykuchu imallatapis cheqa kajpa contranta ruwayta, astawanqa cheqa kajllatapuni ruwasqayku. 9 Chayrayku noqayku kusikuyku pisi kallpas kasqaykumanta, qankunataj sinch'is kasqaykichejmanta. Noqaykoqa Diosmanta mañallasqaykupuni qankuna astawampuni Señorpi wiñanaykichejpaj. 10 Kay cartata qhelqamuykichej manaraj qankunaman jamushaspa, imaraykuchus mana munanichu chaypi kashaspa qankunawan sinch'i kayta, Señor atiyta qowasqanman jina. Chay atiyta qowarqa qankunata Señorpi wiñachinaypaj, manataj urmachinaypajchu. 11 Kunanqa hermanos, kusikuychej. Sumajyachisqa kaychej. Sonqochasqa kaychej. Uj yuyaylla kaychej. Qankunapura allinta kawsakuychej. Munakuyta, sonqo tiyaykuytawan qoj Dios qankunawan kanqa. 12 Ujkuna ujkunawan napaykunakuychej llimphu sonqo much'aykuywan. Tukuy hermanos napaykamusunkichej. 13 Señor Jesucristoj qhasilla k'acha yanapaynin, Dios Tataj munakuynin, Espíritu Santoj yanapaynin ujchasqa kanaykichejpaj tukuy qankunawan kachun.
