2 CORINTIOS 10

1Noqa Pablo mañarikuykichej, Cristoj k'acha llamp'u sonqonrayku. Wakin ninku qankunawan kashaspaqa k'umuykukoj kasqayta, qankunamanta karupi kashaspataj, runaraw kasqayta. 2Mañakuykichej ari, qankunaman jamojteyqa ama sajrapaj jap'inawaykichejta, imaraykuchus noqa sinch'ita k'aminay tiyan ch'ataykuwajkunata, pikunachus nishanku aychaman jina purisqaykuta, chaykunata. 3Cheqamanta kay pacha runas kayku; chaywampis, mana kay pacha runas jinachu maqanakuyku. 4Maqanakunayku armasqa mana kay pachaj armasnin jinallachu kanku; astawanqa Diospa atiyninwan sinch'i kanku, jark'achasqa wasista thuñinaykupaj jinapuni. 5Noqayku thuñiyku runaspa pantasqa yuyayninkuta, Diospa yachaynimpa contrampi tukuy oqharikuytawan; runaspa tukuy yuyayninkutapis atipallaykutaj Cristota kasuyta yachanankupaj. 6Qankuna tukuy imapi kasukoj kajtiykichejkama, chay mana kasukojkunata castiganaykupaj wakisqa kashayku. 7Qankunaqa imatapis rijch'aynillanta qhawankichej. Sichus mayqempis yuyan Cristojta kasqanta chayqa, kayta yachachun: Noqaykupis Cristojllatataj kayku. 8Señorqa atiyta qowarqayku qankunata Señorpi wiñachinaykupaj manataj urmachinaykupajchu. Ichapis Diospa qowasqan chay atiymanta anchataña jatunchakushani; chaywampis mana p'enqakunichu. 9Manallataj munanichu yuyanaykichejta cartasnejllata qankunata manchachiyta munasqayta. 10Cartasniymanta ninku: Cartasllapi sinch'ita phiña runa jina parlaykuwanchej, kaypi kaspatajrí payqa mana imachu, nitaj parlasqampis kasu ruwanachu, nispa. 11Pichus chayta parlajqa kayta yachachun: Imaynatachus karupi kaspa cartapi nimorqayku, chaypi kaspapis kikillantataj ruwasqayku. 12Manataj noqayku atiykumanchu paykunaman kikinchakuyta, pikunachus jatunchakunku, chaykunawan. Paykunaqa wampus kanku, imaraykuchus yuyasqankuman jinalla qhawakunku, paykunapura kikinchakuspa. 13Mana noqaykoqa anchata parlasqaykuchu, astawanqa maychus kasqanta noqaykumanta parlasqayku. Diosqa uj ruwanata qowarqayku, noqaykutaj chayta junt'ashaspa qankunakama chayamorqayku. 14Chay ruwanata Dios qowarqayku, chaymanta mana aswan jaqayman chayamorqaykuchu, maypachachus qankunaman chayamorqayku Cristoj evangelionta apamoj chaypacha. 15Mana noqaykoqa jatunchakuykuchu wajkunaj ruwasqankupi noqaykojtapis kanman jina. Astawanqa suyakushayku creesqaykichej wiñasqanman jina, qankuna ukhupi astawan ruwayta atinaykupaj, Dios ruwanapaj atiyta qowasqaykuman jina. 16Ajinapi munayku qankunajmanta aswan karusman evangeliota willamuyta, nitaj wajpa ruwasqampi jatunchakuyta munaykuchu. 17Diosmanta Qhelqasqapi nin: Pichus jatunchakuyta munajqa Señorpi jatunchakuchun, nispa. 18Mana pay kikin jatunchakojchu allimpaj qhawasqa kanqa; astawanqa, jaqay pitachus Dios jatunchan, chaymin allimpaj qhawasqa kanqa.

will be added

X\