1 Chaypacha Judamanta runasqa Josiaspa churin Joacazta churarqanku Jerusalenpi tatampa cuentanmanta kamachinampaj. 2 Joacazqa iskay chunka kinsayoj watasniyoj kashaspa, kamachiyta qallarerqa, Jerusalenpitaj kinsa killallata kamacherqa. 3 Chantá Egiptoj reynenqa Jerusalenpi rey kananmanta Joacazta wijch'orqa, nacionninwantaj impuestota pagachikorqa kinsa waranqa kinsa pachajniyoj kilos qolqe metalta, kinsa chunka kinsayoj kilostaj qorita. 4 Chaymantataj Egiptoj reynenqa Eliaquimta churarqa Judapi, Jerusalenpiwan rey kanampaj. Eliaquimqa Joacazpa wawqen karqa. Chantá Necaoqa Eliaquimman Joacim sutita churarqa. Chaymantataj Necaoqa Joacazta presochaspa, Egiptoman apacherqa. 5 Joacimqa iskay chunka phishqayoj watasniyoj kashaspa, kamachiyta qallarerqa, Jerusalenpitaj chunka ujniyoj watasta kamacherqa. Ruwasqasninrí mana allinchu karqa Señornin Tata Diospa qhawaynimpeqa. 6 Chantá Babiloniaj reynin Nabucodonosorqa Joacimpa contrampi maqanakoj jamorqa. Broncemanta cadenaswan ch'ipaykuytawantaj, Babiloniaman apacherqa. 7 Nabucodonosorqa Babiloniaman Tata Diospa Templompi kaj wakin imastapis apakapullarqataj. Chaykunatataj Babiloniapi templonman churaykorqa. 8 Joacim kamachishaspa tukuy waj ruwasqasnin, chay millay ruwasqasnin, imaschus payta qhatirisqasnimpis qhelqasqa kashan Judajta, Israelpatawan reyesninkumanta willaj libropi. Paypa cuentanmantataj churin Joaquín kamacherqa. 9 Joaquinqa chunka pusajniyoj watasniyoj kashaspa, kamachiyta qallarerqa, Jerusalenpitaj kamacherqa kinsa killa chunka p'unchayniyojta. Ruwasqasnenqa sajra karqa Tata Diospa qhawaynimpi. 10 Qhepan watapi rey Nabucodonosorqa kamacherqa Joaquinta Babiloniaman apachinankuta, Tata Diospa Templonmanta aswan valorniyoj imastawan khuskata. Chantá Sedequiasta churarqa Judatawan, Jerusalentawan kamachinampaj. Sedequiasqa Joaquinpa ayllunmanta karqa. 11 Sedequiasqa iskay chunka ujniyoj watasniyoj kashaspa, kamachiyta qallarerqa. Chunka ujniyoj watastataj kamacherqa Jerusalenpi. 12 Ruwasqasnenqa mana allinchu karqa Diospa ñawpaqempi. Profeta Jeremiaspa ñawpaqempi mana k'umuykukorqachu, Tata Diospa simi nisqanta payman parlashajtin. 13 Chantapis rey Nabucodonosorpa contrampi oqharikorqa. Nabucodonosorqa Diospa sutinrayku Sedequiasta jurachisqa mana payta wasanchananta. Sonqontapis sinch'ita rumiyacherqa, Israelpa Diosninman mana kutirikuyta munaspa. 14 Jinallatataj tukuy runas, sacerdotespa kurajninkukunapis astawan juchata yapaykukorqanku, chay waj nacionespa millay jucha ruwasqasninkuta ruwaspa. Jinallataj Tata Diospa Templontapis ch'ichicharqanku, mayqentachus Tata Diosqa Paypaj t'aqasqa Jerusalenpi, chayta. 15 Ñawpa tatasninkoj Señorninku Tata Diosqa Simi Nisqanta apachillarqapuni paykunaman profetasninnejta paykunata khuyasqanrayku, Templonraykutaj. 16 Jinapis paykunaqa asiykukorqanku Tata Diospa willarajninkunamanta, nisqankutataj qhesacharqanku. Profetasninmantapis asiykukorqanku, Tata Diosta sinch'ita phiñachinankukama paykunaj contrankupi, manaña paykunapaj khuyay kanankama. 17 Chaypacha Tata Diosqa caldeospa reyninkuta puririchimorqa paykunaj contrankupi. Payqa Diospa Templompi waynasta espadawan wañuchicherqa manataj khuyarqachu wayna runasta, nitaj sipas warmistapis, nitaj machu runastapis, nitaj allin achachistapis. Tata Diosqa tukuyninkuta paypa makisninman jaywaykorqa. 18 Chantá caldeospa reyninkoqa Babiloniaman apakaporqa Diospa Templonmanta kaj imasta, jatuchajkunata, jinataj juch'uykunata. Apakapullarqataj Diospa Templompi valorniyoj kaj imasta, reypa valorniyoj imasninta, reypa kuraj kaj kamachisnimpa valorniyoj imasninkutapis. 19 Chay jawaqa Diospa Templontapis ruphaykucherqanku, Jerusalén llajtaj perqasnintataj thuñirarqanku. Tukuy jatuchaj wasismampis ninata jap'iykucherqanku. Chay valorniyoj kaj imastapis tukuyninta t'unaykorqanku. 20 Chay qhepatataj wañuymanta llusp'ejkunaqa Babiloniaman presos apasqa karqanku. Chaypi wata runas jina sirverqanku reyta, jinataj churisnintawan Persiamanta rey sayarinankama. 21 Chay tukoyqa ruwakorqa profeta Jeremiasnejta Diospa nisqasnin junt'akunampaj. Jinamanta jallp'aqa samarikorqa qanchis chunka watas junt'akunankama. 22 Persiaj reynin Ciro, ñawpaj kaj watapi kamachishajtin, Jeremiasnejta Tata Diospa parlasqan junt'akunampaj Tata Diosqa Cirota umacharqa tukuynin kamachiynimpi kajkunaman willarachinampaj parlasqaspi, jinataj qhelqasqaspipis, kay jinata: 23 Persiamanta rey Ciroqa kay jinata nin: Janaj pachamanta Diosqa makisniyman churamun kay pachapi kaj tukuy reinosta, kamachiwantaj Jerusalenpi Diosta yupaychana wasita ruwapunayta; chayqa Judá jallp'api kashan. Ajinaqa mayqennillaykichejpis, Tata Diospa ayllunmanta kajkunataqa Señorniykichej Tata Dios yanapachun, jaqaymantaj richun, nispa.
