2 CRÓNICAS 35

1Josiasqa Jerusalenpi Pascua fiestata ruwarqa Tata Diospa sutimpi. Ñawpaj kaj killapi chunka tawayoj p'unchaynimpi Pascua corderota ñak'arqanku chay fiestapaj. 2Sacerdotespa ruwanasninku karqa, chayman paykunata churarqa, paykunaj sonqonkutataj oqharerqa Tata Diospa Templompi ruwanasninkuta ruwanankupaj. 3Jinataj tukuy israelitasta yachachejkuna, pikunachus Tata Diospaj t'aqasqa levitasman nerqa: Diospaj t'aqasqa santo arcata churamuychej, Israelpa reynin Davidpa churin Salomonpa ruwasqan Temploman, manaña lijraspa apaykachanaykichejpaj. Kunantaj Señorniykichej Tata Diosta sirvej churakuychej, jinataj Tata Diospa ayllun Israeltapis. 4Familiasman jina wakichikuychej, mit'asniykichejman jinataj, Israelmanta rey Davidpa churin Salomonpis qhelqasqata saqesqanman jina. 5Diospa Templompi qhepakuychej, familiaspi t'aqasqa kasqaykichejman jina, israelita masisniykichejta familiasninkuman jina yanapanaykichejpaj. 6Pascua fiesta corderota ñak'aychej, llimphuchakuychejtaj, israelita masisniykichejtapis wakichiychej Moisesnejta Tata Diospa kamachisqasninta junt'anankupaj. 7Chantá Josiasqa kikin uywasninmanta qorqa ovejasta, corderosta, cabrasta ima Pascua fiestata ruwanankupaj, tantasqa kasharqanku, chay runasman. Tukuynimpi kinsa chunka waranqa uywasta qorqa. Torillostapis kinsa waranqata qollarqataj. 8Jinallataj reypa kuraj kaj kamachisnimpis paykunallamanta jaywanasta qorqanku tukuy aylluman, sacerdotesman, levitasman ima. Jinallataj Diospa Templompi kamachejkuna, Hilcías, Zacarías, Jehiel ima sacerdotesman qorqanku Pascua fiestata ruwanankupaj iskay waranqa sojta pachajniyoj ovejasta, kinsa pachaj torillostawan. 9Chantá levitaspa kamachejninkukuna Conanías, Semaías, Natanael, Hasabías, Jehiel, Josabad imaqa levitasman phishqa waranqa ovejasta, phishqa pachaj torillostawan qollarqankutaj, chaykunawan Pascua fiestata ruwanankupaj. 10Fiestachanankupaj tukuy imas wakichisqaña kashajtin, sacerdotesqa ruwanasninkuman yaykorqanku, jinallataj levitaspis mit'asninkuman jina, reypa kamachisqanman jina. 11Chaypacha Pascua corderosta ñak'arqanku, chay corderospa yawarninkuwantaj sacerdotesqa altarta ch'ajchorqanku. Chaykamataj levitasqa chay corderosta ch'uskisharqanku. 12Chaymantataj q'olachinapaj kajta orqhomorqanku tukuynin ayllu familiasninkuman jina Tata Diosman jaywanankupaj, Moisespa librompi qhelqasqa kasqanman jina. Torilloswampis kikillantataj ruwarqanku. 13Chay qhepamantataj chay cordero aychasta kankarqanku, Pascua fiestata ruwanankupaj kamachisqa kasqanman jina. Diospaj t'aqasqa, chay wakin aychata wayk'orqanku mankaspi, jatuchaj calderaspi, paylaspi ima. Tukuynin aychatataj usqhayllata tukuy runasman rak'irarqanku. 14Chantá levitasqa paykunapajñataj, jinataj Aaronpa ayllunmanta kajkuna sacerdotespajpis tukuy imata wakicherqanku, imaraykuchus sacerdotesqa ch'isiyanankama ruwanaspi karqanku q'olachinasta jaywaspa, wirasnin kajtawan q'olachispa. Chayrayku levitasqa paykunapaj, jinataj Aaronpa ayllunmanta sacerdotespajpis tukuy imata wakichillarqankutaj. 15Asafpa ayllunmanta takejkunaqa kanankupi kasharqanku Davidpa kamachisqanman jina, Asaf, Hemán, reypa profetan Jedutún ima kamachisqankuman jinataj. Punkusta qhawajkunapis sapa uj punkusninkupi kasharqanku; mana mayqenninkupis qhawanataqa saqerparerqankuchu, wawqesninku levitasqa paykunapajwan wakichisqankurayku. 16Ajinata tukuy ima wakichikorqa Tata Diosta sirvispa chay p'unchaykunapi Pascua fiestata ruwanankupaj, jinataj Tata Diospa altarnin patapi uywa wañuchisqasta q'olachinankupaj, rey Josiaspa kamachisqanman jina. 17Chaypi kaj israelitasqa Pascuata mikhorqanku, mana levadurayoj t'anta fiestatataj qanchis p'unchayta ruwarqanku. 18Profeta Samuelpa tiemponmantapacha mana ujtapis Israelpi ruwakusqachu chay jina Pascuaqa; Israelmanta ni mayqen reypis Pascua fiestataqa ruwasqachu Josías jinaqa, sacerdoteswan, levitaswan, Judamanta kaj runaswan, Israelmanta chaypi kajkunawan, jinataj Jerusalenpi tiyakojkunawan ima. 19Chay Pascua fiestataqa ruwarqanku chunka pusajniyoj watastaña Josías kamachishajtin. 20Chay imasmanta qhepaman Josiasqa Tata Diospa Templonta allinchachisqanmantaña, Egiptoj reynin Necaoqa Éufrates Mayuman kachaykukorqa Carquemispi wajkunawan wañuchinaku maqanakupi tinkumunampaj. Chantá Josiasqa paywan tinkoj llojserqa. 21Necaotajrí, kachasta kacharqa kay jinata ninankupaj: Judamanta rey, qanwanqa mana ima ruwanaypis tiyanchu. Mana qampa contraykipichu jamushani, manachayqa waj naciompa contrampi maqanakupi kashani. Dios kamachiwan usqhayllata rinayta; chayrayku allinniykipaj ama churanakuychu Dioswan, imaraykuchus Payqa noqawan kashan. Pajtataj Pay chinkarparichisunkiman, nispa nicherqa Necaoqa. 22Josiastajrí mana ithirerqachu, manachayqa waj rijch'ayniyojta p'achallikuspa, Necaowan maqanakoj rerqapuni. Necaojpa willachimusqanta mana kasorqachu, chay willayqa kikin Diosmantapuni jamojtimpis. Ajinaqa wañuchinaku maqanakuman yaykorqapuni Meguido Vallepi. 23Arcowan flechasta kacharejkunataj Josiasman jap'irparicherqanku. Chantá reyqa nerqa kuraj kaj kamachisninman: Kaymanta orqhowaychej, wañuy patapi kashani, nispa. 24Chay kamachisnintaj maqanakunapaj carretamanta waj carretaman churarqanku. Chantá Jerusalenman aparqanku, chaypitaj wañuporqa. Ñawpa tatasnin p'ampasqa karqanku, chay cheqapi Josiasta p'ampaykaporqanku. Josiaspa wañupusqanmantataj mayta waqarqanku tukuy Judamanta, Jerusalenmantawan kajkuna. 25Jeremiasqa uj llakiy yarawita wakicherqa Josiaspa wañupusqanmanta yuyarikunapaj. Tukuy takejkuna qharispis, warmispis chay yarawita takinkupuni kunankama. Chay yaraweqa Israel ayllu ukhupi takisqapuni, qhelqasqataj kashan yarawi takiykuna libropi. 26Josías kamachishaspa tukuy waj ruwasqasnin, tukuy sonqo allin ruwasqasnin Tata Diospa leynin libroman jina, 27qallariymanta tukukuyninkama ruwasqasnimpis qhelqasqa kashan Israelpa, jinataj Judajpa reyesninmanta willaj librospi.

will be added

X\