2 CRÓNICAS 33

1Manasesqa chunka iskayniyoj watasniyoj kashaspa, kamachiyta qallarerqa. Phishqa chunka phishqayoj watastataj kamacherqa Jerusalenpi. 2Payqa Tata Diospa ñawpaqempi sajra imasta ruwarqa, chay waj nacionespi millay ruwasqasninkuman jina, mayqenkunatachus Tata Diosqa israelitaspa ñawpaqenkumanta wijch'usqa, chaykuna. 3Watejmanta jataricherqa, tatan Ezequías urmachisqa lomas patapi, chay lanti wasista. Jinallatataj jataricherqa altaresta Baal lantispaj, Asera lantistapis. Payqa yupaycharqa, sirverqataj cielopi kaj tukuy ch'askastapis. 4Tata Diospa Templompipis jatarichillarqataj altaresta, mayqenmantachus parlaspa, Tata Diosqa nisqa: Jerusalenpi wiñaypaj sutiy kanqa, nispa, chaypi. 5Tata Diospa Templompa iskaynin patiosnimpipis waj altaresta jatarichillarqataj, chaykunatataj ruwarqa cielopi tukuy ch'askaspaj. 6Jinataj Ben-hinom Vallepi churisninta uywa wañuchisqata jina q'olacherqa, wañusqa runaspa espiritunkuta wajyaj, suertesta qhawaj, layqasta, aysiristapis tapukoj. Tata Diospa ñawpaqempi sinch'i sajrapuni ruwasqasnenqa karqa, Tata Diosta sinch'ita phiñachinankama. 7Astawampis uj lantita ruwachispa, churallarqataj Diospa Templonman, mayqenmantachus Dios nisqa Davidman, jinataj churin Salomonmampis: Israel ayllu ukhupi kaj llajtasmanta ajllakusqay llajta Jerusalenpi, chaypi kaj wasipeqa Noqa sutiyta churasaj wiñaypaj. 8Manaña ujtawan qharqosajchu israelitastaqa, ñawpa tatasninkuta maymanchus churarqani, chay jallp'amantaqa, kamachisqasniyta, yachachisqasniyta, leyesniyta, nisqasniytapis kamachiy Moisesnejta nerqani, chaykunata tukuy sonqo kasojtinku, nispa. 9Manasesqa Judamanta, Jerusalenmantawan runasta sajra ñanman tanqaykorqa, astawan sajrata ruwachispa chay nacionesmanta, mayqenkunatachus Tata Dios tukuchisqa israelitaspa ñawpaqenkumanta, chaykunamanta nisqaqa. 10Tata Dios parlarqa Manasesman tukuy llajtantinman, paykunatajrí mana kasorqankuchu. 11Chayraykumá Tata Diosqa Asiriaj reynimpa soldadosnimpa kamachejninkukunata kachamorqa paykunaj contrankupi, chaykunataj presocharqanku Manasesta. Chantá fierro ganchoswan, broncemanta ruwasqa cadenaswan wataykuspa, Babiloniaman apacherqanku. 12Manasesqa llakiy ñak'ariypi kaspallaña, Señornin Tata Diosta qhaparikorqa, mayta k'umuykukuspa ñawpa tatasnimpa Diosninkojpa ñawpaqempi. 13Pay mañakojtintaj, Diosqa chay mañakusqanta uyarispa, Jerusalenman kutichimporqa, rey jina kamachinallampajpuni. Chaypacha Manasesqa yacharqa Tata Diosqa Diospuni kasqanta. 14Aswan qhepaman Manasesqa Davidpa llajtampa jawa perqanta oqharicherqa Gihonmanta inti yaykuynejman. Chaytaj mayunejta pasaspa, Challwas nisqa punkukama chayamorqa, chaymantataj muyuykorqa Ofelnejta. Chay perqataqa sinch'i altota ruwarqa. Chantá churallarqataj soldadosta kamachejninkunata Judamanta tukuy jark'achasqa llajtaspi. 15Chay jawaqa chinkachillarqataj Tata Diospa Templonmanta chay waj dioskunata, jinataj chay lantistapis. Chinkachillarqataj Temploj orqompi altares ruwasqasta, Jerusalenpi ruwasqastapis. Chantá chaykunata llajtamanta jawaman wijch'umorqa. 16Chaymantataj Tata Diospa altarninta allinchacherqa, chaypitaj allinyakuna jaywanasta, Diosman graciasta qona jaywanastapis jaywarqa. Judá ayllumantaj kamacherqa Israelpa Señornin Tata Diosllata sirvinankuta. 17Chaywampis Judá aylloqa lomas pata altarespi jaywallajpuni kanku. Chaytaqa Señorninku Tata Diosllaman jaywaj kanku. 18Manasés kamachishaspa tukuy waj ruwasqasnin, Diosmanta mañakusqampis, Israelpa Señornin Tata Diospa sutimpi profetas Payman parlasqankupis, Israelpa reyesninkumanta willaj libropi qhelqasqa kashan. 19Diosmanta mañakusqan, Dios payta uyarisqan, tukuy juchallisqasnin, Diosta qhesachasqan, lomas patapi lanti wasista jatarichisqasnin, jinataj maykunapichus churarqa Asera lantista, waj lantistawan, manaraj Diosman k'umuykushaspa, tukuy chaykunamantaqa profetaspa librosninkupi qhelqasqa kashan. 20Wañojtintaj, payta p'ampaykorqanku kamachinan wasejpa huertampi. Chaymantataj churin Amón kamacherqa paypa cuentanmanta. 21Amonqa iskay chunka iskayniyoj watasniyoj kashaspa, kamachiyta qallarerqa, Jerusalenpitaj iskay watasllata kamacherqa. 22Amonpa ruwasqasnenqa mana allinchu karqanku Diospa qhawaynimpeqa; tatan Manasespa ruwasqasnin jinallataj karqa. Tatan Manasespa ruwasqasnin lantisman uywa wañuchisqasta q'olachispa, chaykunata yupaycharqa. 23Manataj Tata Diospa ñawpaqempeqa k'umuykukorqachu tatan Manasés jinaqa, manachayqa astawan juchasta yapaykukorqa. 24Chantá kuraj kaj kamachisnenqa oqharikuspa, Amonta wañucherqanku kikin kamachinan wasi ukhupi. 25Judamanta runastajrí wañuchillarqankutaj rey Amonpa contrampi oqharikoj runasta, paypa cuentanmanta kamachinampajtaj churin Josiasta churaykorqanku.

will be added

X\