2 CRÓNICAS 30

1Chaymantá Ezequiasqa wajyacherqa tukuy Israelmanta kajkunata, Judamanta kajkunatawan. Efrainmanwan, Manasesmanwampis cartasta apacherqa wajyachispa Jerusalenpi Tata Diospa Templonman jamunankuta, chaypi Israelpa Señornin Tata Diospa Pascua fiestanta ruwanankupaj. 2Reyqa yanapajkunawan, Jerusalenmanta kajkunawan ima parlanakuspa, nisqa Pascua fiestata ruwanankuta iskay kaj killallapi, 3imaraykuchus tiempompi Pascuataqa mana ruwayta atisqankuchu, sacerdotesmanta manaraj llimphuchasqas ashkharajchu kasqankurayku, nillataj tukuy israelitaspis Jerusalenpi tantakusqankurajchu. 4Chay parlanakusqankoqa reyman allin rijch'arqa, tukuy chaypi kajkunamampis. 5Chaytataj tukuy Israelman willarachinankuta nerqanku Beersebamantapacha Dan chaynejkama, Jerusalenpi Israelpa Señornin Tata Diospa Pascua fiestanta ruwaj jamunankuta. Ñawpajpeqa mana ajinata tantakuspachu ruwasqanku, kamachisqa kasqanman jina. 6Ajinata willarajkunaqa llojserqanku tukuy Israel nacionman, Judá suyumampis, reypa, jinataj yanapajninkunajpa cartasninwan, reypa kamachisqanman jina: Israel ayllumanta kajkuna, Tata Diosman kutirimpuychej Abrahampa, Isaacpa, Israelpa Diosninkuman. Paytaj qankunaman kutirimusonqachej Asiriaj reyesnimpa makisninkumanta qhepakorqankichejraj, qankunaman. 7Ama ñawpa tatasniykichej jinachu, nitaj wawqesniykichej jinachu kaychej. Paykunaqa qhesacharqanku ñawpa tatasninkoj Señornin Tata Diosta; chayrayku Diosqa paykunata jaywaykorqa llakiyta ruwasqa kanankupaj, kay rikushankichej jina. 8Chayrayku ama ñawpa tatasniykichej jinaqa sonqosniykichejta rumiyachiychejchu. Tata Diosta kasuychej, jamuychejtaj Diospa t'aqakusqan cheqaman, Tata Dios wiñaypaj t'aqakusqanman. Señorniykichej Tata Diosta sirviychej, Paytaj qankunapaj manaña chay jina phiñasqachu kanqa. 9Sichus qankuna Tata Diosman kutirikunkichej chayqa, wawqesniykichej, wawasniykichej enemigosniykichejpa makinkupi presos kajkuna khuyakuyta tarenqanku, kay jallp'amantaj kutimponqanku, imaraykuchus Señorniykichej Tata Diosqa may munakuyniyojmin, khuyakuyniyojtaj. Manataj qankunata qhesachasonqachejchu sichus qankuna Payman kutiripunkichej chayqa, nispa nerqanku chay cartaspeqa. 10Chay willarajkunaqa purimorqanku Efraín suyuta, Manasés suyutawan llajtamanta llajta rispa, Zabulón suyuman chayanankukama. Runastajrí paykunamanta asikorqanku, alqochakorqankutaj. 11Chaywampis wakin runas Aser ayllumanta kajkuna, Manasesmanta kajkuna, Zabulonmanta kajkunapis sonqonkuta llamp'uyachikuspa, Jerusalenman jamorqanku. 12Jinallatataj Judamanta kaj runastapis Diosqa sonqosninkuta kuyucherqa, reypa jinataj kamachejkunajpa nisqankuman jina junt'anankupaj, Tata Dios kamachisqanman jina. 13Ajinaqa iskay kaj killapi tantaykukorqanku may chhika runas Jerusalenpi, mana levadurayoj t'anta nisqa fiestata ruwanankupaj. 14Qallarerqankutaj chinkachiyta, Jerusalenpi karqa, chay altaresta. Inciensota q'oshñichina altarestapis wijch'umorqanku Cedrón Wayq'oman. 15Iskay kaj killapi chunka tawayoj kaj p'unchaypi Pascua corderota wañucherqanku. Sacerdoteswan, levitaswantaj p'enqakuspa llimphuchakorqanku, Tata Diospa Templonmantaj uywasta q'olachipunankupaj aparqanku. 16Chaymantataj ruwanasninku mit'asman yaykuporqanku, imaynatachus Diospa kamachin Moisespa leynimpi nin, jinata. Sacerdotesqa levitaspa jaywasqanku yawarta ch'ajchorqanku. 17Runas ukhumanta ashkharaj mana llimphuchakusqankuchu; chayrayku levitasqa chay mana llimphuchasqa runasrayku uywasta wañucherqanku, jinamanta Tata Diosllapaj llimphuchasqa kanankupaj. 18May ashkha runastaj Efrainmanta, Manasesmanta, Isacarmanta, Zabulonmanta ima Pascua fiestapi mikhorqanku mana llimphuchakuspalla, leypi qhelqasqa kajta p'akispa. Paykunaraykutaj Ezequiasqa Diosmanta mañaporqa: Khuyakoj Tata Dios, perdonapuy tukuy pikunachus ch'uwa sonqowan Qanta mask'asojkunata. 19Qan Tata Dios, paykunata perdonapuy, pikunachus ñawpa tatasninkoj Señorninku Tata Diosta mask'ajkunata, amapis llimphupajchu qhawasqa kachunku, Templopi kamachisqa kasqanman jina, nispa mañaporqa Ezequiasqa. 20Tata Diostaj uyarerqa Ezequiaspa mañakusqanta, tukuynin israelitastataj perdonaporqa. 21Ajinata qanchis p'unchaykunata Jerusalenpi kajkuna israelitas sinch'i kusiywan ruwarqanku mana levadurayoj t'anta jatun fiestata. Sacerdoteswan, levitaswan sapa p'unchay Tata Diosta yupaychasharqanku, sinch'ita sonaj tocanaswan takispa. 22Ezequiastaj tukuynin levitasman allinta parlaykuspa, sonqonkuta oqharerqa, pikunachus rikucherqanku Tata Diospaj ruwanasta allinta yachasqankuta, chaykunata. Qanchis p'unchay junt'ata mikhorqanku chay jatun fiestapi ñak'asqa uywasta jaywasqankumanta, allinyakuna jaywanasmanta ima, ñawpa tatasninkoj Señorninku Tata Diosta yupaychaspa. 23Chantá tukuy runas nerqanku qanchis p'unchaytawan fiestata ruwanankuta, jinataj may kusisqa chayta ruwarqanku. 24Judamanta rey Ezequiastaj chay tantasqa runasman qorqa waranqa torillosta, qanchis waranqa ovejastawan. Jinallataj kamachejkunaqa qollarqankutaj waranqa torillosta, chunka waranqa ovejastawan. Ashkha sacerdotestaj llimphuchakorqanku. 25Judamanta tukuy runasqa kusikorqanku, sacerdotespis, levitaspis; Israelmanta jamojkuna tukuy runaspis kusikullarqankutaj, forasterospis, Israel jallp'amanta jamojkunapis, chay Judá jallp'api tiyakojkunapis. 26Ajinamanta sinch'i kusiypuni karqa Jerusalenpeqa. Israelpa reynin Davidpa churin Salomonpa tiemposninmantapacha mana jayk'ajpis ajinaqa ruwakusqachu Jerusalén llajtapeqa. 27Chaymantataj sacerdotes, jinataj levitaspis sayarikuspa, chaypi kajkunata bendecerqanku, Tata Diostaj paykunata uyarerqa; mañakusqankupis janaj pachakama chayarqa, maypichus Santo Kaj Dios tiyakun, chaykama.

will be added

X\