1 Jotamqa kamachiyta qallarishaspa, iskay chunka phishqayoj watasniyoj karqa. Jerusalenpitaj chunka sojtayoj watasta kamacherqa. Paypa mamanqa Sadocpa ususin Jerusa karqa. 2 Jotampa ruwasqasnenqa Tata Diospa qhawaynimpi cheqan karqa, imaynatachus tatan Uzías ruwarqa, ajina. Chaywampis mana yaykorqachu Tata Diospa Templonmanqa. Jinapis runasqa millay ruwanasnillankupipuni kasharqanku. 3 Paymin Tata Diospa Templompa pata jatun punkunta ruwacherqa, jinallataj Ofel nisqa chay perqa pataspipis waj imasta ruwachillarqataj. 4 Judá orqosnejpipis llajtasta jatarichillarqataj, montespipis jark'achasqa wasista, torresta ima ruwachillarqataj. 5 Amonitaspa reyninwan wañuchinaku maqanakuman yaykuspa, atiparqa. Chay wataspeqa amonitas impuestota payman pagananku karqa, kinsa waranqa kinsa pachajniyoj kilos qolqe metalta, trigomantataj chunka waranqa cargasta, cebadamantapis chhikallatataj. Ajinallatataj iskaynin qhepan wataspipis qorqanku. 6 Jotamqa may atiyniyoj rikhurerqa, Tata Diospa ñawpaqempi cheqanta purisqanrayku. 7 Jotam kamachishaspa waj ruwasqasnin, soldadosninwan wañuchinaku maqanakusman llojsisqasnin, waj ruwasqasnimpiwan qhelqasqa kashan Judamanta, Israelmanta reyespa librompi. 8 Kamachiyta qallarishaspaqa, iskay chunka phishqayoj watasniyoj kasqa, Jerusalenpitaj chunka sojtayoj watasta kamacherqa. 9 Jotam wañupojtintaj, ñawpa tatasnimpa p'ampakunanku chaynejpi, Davidpa llajtampi p'amparqanku. Paypa cuentanmantataj churin Ajaz sutiyoj kamacherqa.
