2 CRÓNICAS 24

1Joasqa qanchis watasniyojllaraj karqa kamachiyta qallarishaspaqa, Jerusalenpitaj tawa chunka watasta kamacherqa. Mamampa sutenqa Sibia karqa, paytaj Beersebamanta karqa. 2Joaspa ruwasqasnenqa cheqan karqanku Tata Diospa qhawaynimpeqa, Joiada sacerdote kawsanankama. 3Joiadaqa iskay warmiswan Joasta casaracherqa. Chaykunapitaj churisnin, jinataj ususisnimpis tiyaporqa. 4Chaymanta mana unayninmanchu Joasqa Tata Diospa Templonta allinchachiyta munarqa. 5Chaypajtaj sacerdotesta, levitasta tantaykuchispa, nerqa: Judajpa llajtasninnejta purimuychej, israelitasmantataj sapa wata qonanku qolqeta oqharimuychej, chaywan Tata Diospa Templonta allinchachinapaj. Usqhaytataj kay nisqayta ruwamuychej, nispa. Jinapis levitasqa mana usqhaytachu chayta ruwarqanku. 6Chantá reyqa kuraj kaj sacerdote Joiadata wajyachispa, nerqa: Imaraykutaj mana mañarqankichu levitas apamunankuta Judamanta, Jerusalenmantawan runas qonanku karqa, chayta, Tata Diospa kamachin Moisés jinataj tukuy israelitaspis kamacherqanku qonankuta Tata Dioswan Tinkukuna Toldopaj? nispa. 7Chay sajra warmi Ataliaj churisnenqa Diospa Templonman yaykuspa, orqhomusqanku chay tukuy kajta Baal nisqa lantisninkuta yupaychanankupaj. 8Chantá reyqa ruwacherqa uj cajata, chaytataj Tata Diospa Templompa punkunmanta jawaman churacherqa. 9Chantataj willacherqanku Judapi, jinataj Jerusalenpipis Tata Diosman apamunankuta, ch'in pampapi israelitas kashajtinku Tata Diospa kamachin Moisés qonankuta nerqa, chayta. 10Jinapi tukuy kamachejkuna, tukuy runaspis kusiywan jamorqanku, chay imatachus qonankuta churanankupaj, chay cajaman junt'achinankukama. 11Chay caja junt'a kajtin, levitasqa apaj kanku chay cajata reypa kuraj kamachinman. Ashkhaña qolqe kasqanta rikojtinku, reypa qhelqerin jamoj, kuraj kaj sacerdotej yanapajninwan, chaykunataj chay cajata thalliytawankama, watejmanta kikinman churallarqankutaj. Ajinata sapa p'unchay ruwaspa, ashkha qolqeta tantarqanku. 12Reywan, Joiadawan chay qolqetaqa jaywarqanku, Templota allinchachinankupaj churasqa karqanku, chaykunaman, chay qolqewan mink'anankupaj rumi ch'eqojkunata, carpinterostawan. Jinallatataj fierrowan, broncewan trabajajkunatapis mink'arqanku, Tata Diospa Templonta allinchachinankupaj. 13Jinamanta paykunaqa trabajaj churakorqanku, makisninkupitaj allinchana trabajoqa ñawpajman rerqa. Watejmanta allincharqanku Tata Diospa Templonta, qallariypi planospi kasqanman jina, sumaj ruwasqatataj saqerqanku. 14Maypachachus allinchachiyta tukorqanku chaypacha, chay puchoj qolqeta aparqanku reyman, Joiadamanwan, paykunataj chay qolqewan ruwacherqanku Tata Diospa Templompi ruwanapaj kay imasta: Yupaychanapaj imasta, uywa wañuchisqasta q'olachinapaj imasta, jatuchaj cucharasta, waj imastapis. Chay tukuy imasta qolqe metalmanta, manachayrí qorimanta ruwacherqanku. Joiada kawsashajtillanrajqa, Tata Diospa Templompeqa uywa wañuchisqasta q'olachillajpuni kanku. 15Jinapis Joiadaqa machuyaporqa; ñapis unayniyojña kaspa, wañuporqa. Pachaj kinsa chunka watasniyoj kaspa, wañuporqa. 16Paytaqa Davidpa llajtampi p'amparqanku reyespa ladompi, imaraykuchus sumaj allinta ruwarqa Israel aylluwan, Diosninwan, jinataj Templowampis. 17Joiada wañupusqanmanta qhepaman, Judamanta kurajkuna jamorqanku reyta jatunchaj, paytaj nisqankuta uyarerqa. 18Paykunaqa ñawpa tatasninkoj Señornin Tata Diospa Templonta saqerparispa, Asera lantista, waj lantistawan yupaycharqanku. Chay juchankuraykumari Tata Diosqa phiñakorqa Judapaj, jinataj Jerusalenpajpis. 19Chaywampis Tata Dios kachamorqaraj profetasninta, Payman chay runasta kutirichinankupaj. Chay runastajrí mana kasorqankuchu chay profetaspa k'amisqasninkutaqa. 20Chaypacha Joiadaj churin Zacariasman Diospa Espíritun jamorqa, uj moqonejpi sayaykuspataj, chay runasman nerqa: Diosqa nisunkichej: Imaraykutaj qankunaqa mana kasunkichejchu kamachisqasniytari? Jinamanta qankuna kikiykichej llakiyniykichejta mask'akushankichej. Noqata saqerpariwasqaykichejrayku, Noqapis qankunata saqerparillasqaykichejtaj, nispa. 21Chantá paykunaqa Zacariaspa contrampi churakuspa, reypa kamachisqanrayku rumiswan payta ch'anqaykorqanku Tata Diospa Templompa patiompi. 22Rey Joasqa qonqapusqa Zacariaspa tatan Joiada khuyakoj sonqowan payta qhawasqanmanta. Chayrayku pay wañucherqa Joiadaj churin Zacariastaqa. Paytajrí manaraj wañushaspa, qhaparerqa: Tata Dios kayta rikumuchun, cuentatataj mañachun, nispa. 23Wata muyuykamojpi Siriamanta soldadosqa Joaspa contrampi maqanakoj jamorqanku. Judá suyuman jamuspa, Jerusalenkama chayamorqanku, chay naciompa tukuy kuraj kamachejninkunatataj wañuracherqanku. Chantá imachus kajta qhechuraspa, Damascoj reyninman apacherqanku. 24Siriamantaqa pisi soldadoslla chayamusqanku; jinapis chaykunaman Tata Diosqa Judamanta may ashkha soldadosta jaywaykorqa, ñawpa tatasninkoj Señorninku Tata Diosta qonqarparipusqankurayku. Jinamanta Joasqa juchanman jina castigasqa karqa. 25Siriamanta soldados ripojtinku, reyqa wañuy patapi qhepakorqa. Chantá kuraj kamachisnin contrampi oqharikorqanku Joiadaj churin Zacariasta wañuchichisqanrayku. Chantá kikin puñunampi wañurparicherqanku. Chaymantataj payta p'ampaykorqanku Davidpa llajtampi, jinapis mana reyespa p'ampakunankupichu. 26Reypa contrampi kaykuna oqharikusqanku: Zabad; paypa mamanqa Simeat amonita karqa; jinataj Jozabadpis, paypa mamanqa Simrit moabita karqa. 27Joaspa wawasninmanta, contrampi profetaspa tukuy sut'inchasqasninku, Diospa Templonta watejmanta allinchachisqanmantapis, tukuy chayqa qhelqasqa kashan reyesmanta willaykuna librospi. Paypa qhepantataj churin Amasías kamacherqa.

will be added

X\