2 CRÓNICAS 22

1Jerusalenpi tiyakojkunaqa Jorampa cuentanmantaqa paypa sullk'a kaj churin Ocoziasta reyninkupaj churarqanku, imaraykuchus uj kutipeqa suwaswan, arabeswan jamuspa jarankuman junt'aykusqanku, chaypachataj Judajpa reynin Jorampa tukuy kuraj kaj churisninta wañurparichisqanku. Jinamanta Judajpa reynin Jorampa churin Ocoziasqa kamachiyta qallarerqa. 2Ocozías kamachiyta qallarishaspaqa, iskay chunka iskayniyoj watasniyoj karqa, Jerusalenpitaj uj watallata kamacherqa. Mamampataqa sutin Atalía karqa, paytaj Omrijpa allchhin karqa. 3Ocoziasqa Achabpa ayllumpa ñankunallampitaj purerqa, maman Atalía sajra kajta ruwananta umachasqanrayku. 4Ocoziasqa sajra kajta ruwarqa Tata Diospa ñawpaqempeqa Achabpa ayllun jina. Ocoziaspa tatan wañupojtinkama, Achabpa ayllunmanta kajkunaqa Ocoziasta umacharqanku sajra kajta ruwananta, jinataj mana allinman chayarqa. 5Paykuna umachasqankuraykutaj Ocoziasqa Israelpa reynin Achabpa churin Joramwan ujchakuspa, maqanakoj rerqa Siriaj reynin Hazaelpa contrampi Galaadpi Ramot, chay llajtaman. Chaypitaj siriosqa Joramta wañuy patapi saqerqanku. 6Chantá Joramqa Jezreelman kutimporqa nanasqasninta jampichikoj, Ramot llajtapi Siriaj reynin Hazaelwan maqanakupi nanachikusqasninta. Chaypacha Ocoziasqa Jezreelman rerqa Joramta waturikoj onqosqa kasqanrayku. 7Ocoziasqa Joramta waturej risqampi wañuchisqa kananqa Diospa wakichisqan karqa. Jezreelman chayaytawankama, Ocoziasqa Joramwan llojserqa Nimsijpa churin Jehuwan tinkumoj. Kay Jehutarí Diospuni ajllasqa Achabpa ayllunmanta kajkunata tukuchinampaj. 8Maypachachus Jehuqa Achabpa ayllumpa contrampi justiciata ruwasharqa chaypacha, Judamanta kurajkunata, jinataj Ocoziaspa ayllusnintawan, pikunachus paypa kamachimpi kasharqanku, chaykunata tarispa, Jehuqa paykunatapis wañurachillarqataj. 9Ocoziasta mask'aspataj, Samariapi pakasqata tarerqanku, jap'ispataj Jehuman aparqanku. Chaypi wañuchisqa karqa. Chantá payta p'ampaykorqanku, imaraykuchus nerqanku: Payqa Josafatpa allchhin, pichus Tata Diosta mask'arqa tukuy sonqo, chaypata, nispa. Jinamanta manaña pipis qhepakorqachu Ocoziaspa ayllunmanta rey kanampaj jinaqa. 10Ocoziaspa maman Ataliaqa churin Ocozías wañusqanta yachaytawan, rispa Judapi reypa ayllunta wañurachimorqa. 11Wañoj rey Jorampa ususin Josabettajrí Ocoziaspa churin Joasta pakaykorqa, reypa chay waj churisninta wañurachishajtinku, wasi ukhumantaj uywaqentawan khuskata wisq'aykorqa. Chaytaqa rey Jorampa ususin Josabet ruwarqa. Payqa Ocoziaspa panan karqa, Joiadaj warmintaj. Jinamanta mana Joasta wañucherqankuchu. 12Joastaj paykunawan khuska sojta watasta pakasqa kasharqa Tata Diospa Templompi. Chaykamataj Ataliaqa Judá naciompi kamachisharqa.

will be added

X\