2 CRÓNICAS 13

1Abiasqa Judapi kamachiyta qallarerqa Jeroboam chunka pusajniyoj watastaña Israelpi kamachishajtin. 2Abiasqa Jerusalenpi kinsa watasta kamacherqa, mamantaj Micaías sutiyoj Gabaamanta Urielpa ususin karqa. Abiamwan Jeroboamwantaj wañuchinaku maqanakupi tinkorqanku. 3Abiasqa maqanakuyta qallarerqa tawa pachaj waranqa ajllasqa soldadoswan, Jeroboamtaj contrampi maqanakoj churakullarqataj pusaj pachaj waranqa ajllasqa soldadoswan. 4Chaypacha Abiasqa Efraín orqonejpi Zemaraim Orqopi sayarispa, qhaparerqa: Jeroboam, jinataj Israel ayllupis, uyariwaychej: 5Manachu yachankichej, Israelpa Señornin Tata Diosqa reinota Davidman, chantá mirayninmampis wiñaypaj qosqanta, kachi patapi juraspa? 6Chaywampis Nabatpa churin Jeroboamqa Davidpa churin Salomonpa kamachin kaspa, reynimpa contrampi oqharikorqa. 7Paywan tantakorqanku manakaj qhella runas, paykunataj Salomonpa churin Roboammanta astawan aterqanku. Payqa waynallaraj, chantapis as manchachi runa kasqanrayku, paykunaman mana sayaykuyta aterqachu. 8Kunan qankunaqa churanakuyta munashankichej Tata Diospa reinonwan Davidpa miraynimpa makimpi kashajwan. May ashkha kasqaykichejpi atienekushankichej, qankunawantaj kashan chay qorimanta waka uñasta Jeroboam ruwapusorqachej dioskunata jina, chaykuna. 9Chaywampis manachu qankunaqa Tata Diospa sacerdotesninta chantá Aaronpa mirayninmanta kaj levitastapis wijch'orqankichej? Manachu Diosta mana rejsejkuna naciones jina waj runasta sacerdotes kanankupaj churakorqankichej? Pillapis sacerdoteman tukupuyta munaspa, apamun uj torillota, qanchis corderostawan, ajinamantataj chay manakaj dioskunaj sacerdotenkuman tukupun. 10Noqaykupajqa Tata Diosmin Diosniykoqa, manataj Paytaqa saqerpariykuchu. Tata Diospa serviciompi kashanku, chay sacerdotesqa Aaronpa mirayninmanta kanku, levitastaj paykunata yanapanku. 11Paykunaqa uywasta wañuchispa Tata Diospaj q'olachipunku paqarimpi, tardempipis; inciensostapis q'oshñichipullankutaj. Llimphupaj qhawasqa mesaman churallankutaj Diospaj t'aqasqa t'antasta, sapa tardetaj jap'ichinku k'anchanasta, qorimanta ruwasqa k'anchanapi k'anchanampaj. Chay tukuyta ruwayku, imaraykuchus noqaykoqa Señorniyku Tata Diospa nisqasninta junt'ayku, qankunatajrí Paytaqa saqerparinkichej. 12Kayta yuyarikuychej: Diosqa noqaykuwan kashan kamachejniyku jina. Sacerdotesnintaj wakisqaña kashanku cornetaswan, contraykichejpi maqanakoj rinaykupaj tocanankupaj. Chayrayku qankuna Israel ayllumanta kajkuna, ñawpa tatasniykichejpa Señorninku Tata Diospa contrampi ama maqanakuychejchu, imaraykuchus Paytaqa mana atipawajchejchu, nispa nerqa Abiasqa. 13Jeroboamqa kamachisqa qhepapi kaj soldadosnin, muyuykuspa qhepallamanta Judamanta kaj soldadosta wañuchej sayaykunankuta. Jinamanta Jeroboampa soldadosninmanta wakenqa Judajpa ñawpaqempi maqanakoj sayaykorqanku, wakintaj qhepallamanta maqanakoj sayaykullarqankutaj. 14Judamanta kajkunataj qhepaman qhawarikuspaqa, reparakorqanku ñawpajmanta qhepamantataj paykunawan maqanakoj jamushasqankuta. Chantá Judamanta kajkunaqa Tata Diosman qhaparikorqanku, sacerdotestaj cornetasta waqacherqanku. 15Judamanta kajkuna maqanakuman yaykunankupaj qhaparikojtinkutaj, chaypacha Diosqa Abiasta, Judamanta kajkunatawan yanaparqa Jeroboamta, tukuy israelitastawan atipaykunampaj. 16Israelitasqa Judamanta ayqerqanku, Diospuni paykunaj makinkuman israelitasta jaywaykusqanrayku. 17Abiaswan, soldadosninwan may jina ashkhata wañuraykucherqanku; chaypacha phishqa pachaj waranqa Israelpa ajllasqa soldadosnin wañuchisqa karqanku. 18Jinata chay kutipeqa israelitasqa k'umuykachachisqa karqanku, Judamanta kajkunataj may atiyniyoj, kallpachasqastaj rikhurerqanku, ñawpa tatasninkoj Señorninku Tata Diospi atienekusqankurayku. 19Abiasqa Jeroboamta qhatiykorqa, kay llajtastataj jap'ikaporqa: Betelta, Jesanata, Efraínta, chay qaylla ranchosninta ima. 20Jeroboamqa manaña atiyniyoj kayta aterqañachu Abías kawsashajtin. Aswan qhepamantaj Tata Diosqa payta wañucherqa. 21Chaykama Abiasqa aswan atiyniyojman tukorqa. Warmisnimpis chunka tawayoj karqanku, churisnin iskay chunka iskayniyoj karqanku, ususisnintaj chunka sojtayoj karqanku. 22Abías kamachishaspa tukuy waj ruwasqasnin, waj ruwasqasnin, nisqasnin ima qhelqasqa kashan profeta Iddoj librompi.

will be added

X\