2 CRÓNICAS 11

1Roboamqa Jerusalenman chayaytawan, Judá ayllumanta, jinataj Benjamín ayllumantawan pachaj pusaj chunkayoj waranqa soldadosta tantaykorqa, israelitaspa contrankupi maqanakamuspa reinota Roboamman kutichimunankupaj. 2Tata Diostajrí chaypacha Diospa profetan Semaiasman parlaspa, kamacherqa: 3Niy Salomonpa churin Roboamman jinataj Judamanta, Benjaminmantawan tukuy israelitasman: 4Ajinata Tata Dios nisunkichej: Israelita wawqesniykichejwan ama maqanakoj riychejchu. Tukuyniykichej wasisniykichejman ripuychej, imaraykuchus kaytaqa Noqa ruwani, nispa. Paykunataj Tata Diospa nisqanta uyarispa kutiporqanku, Jeroboampa contrampitaj manaña rerqankuchu. 5Roboamqa Jerusalenpi tiyakaporqa, Judapitaj sinch'i jark'achasqa llajtasta jataricherqa. 6Kay llajtasta astawan jark'acharqa: Belenta, Etamta, Tecoata, 7Bet-surta, Socota, Adulamta, 8Gatta, Maresata, Zifta, 9Adoraimta, Laquista, Azecata, 10Zorata, Ajalonta, Hebronta ima. Chay llajtasqa Judapi, Benjaminpiwan jark'achasqa llajtas karqanku. 11Chay llajtasta astawan jark'achanampajtaj chaykunaman churarqa kamachejkunata, jinallataj churacherqa mikhunasta, aceiteta, vinota ima. 12Chay jawaqa churallarqataj jark'akuna escudosta, t'ojsina lanzastawan sapa llajtaman, may jinatapuni chay llajtasta sinch'iyachispa. Jinamanta Roboampa makimpi qhepakorqanku Judá aylluwan, Benjamín aylluwan ima. 13Sacerdoteswan, levitaswanqa tukuy Israelmanta jamorqanku paywan khuskachakunankupaj, maypichus tiyakusharqanku, chay cheqasmanta. 14Levitasqa michina jallp'asninkuta, waj kapuyninkutawan saqerparerqanku, Jerusalenman ripunankupaj, jinataj Judapi waj cheqasmampis, imaraykuchus Jeroboamqa jinataj paypa qhepanta kamachej churisnimpis manaña saqerqankuchu Tata Diospa sacerdotesnin kanankuta. 15Jeroboamqa waj sacerdotesta paypaj ajllakorqa, loma pata altarespi jaywanankupaj, yupaychaspa supaykunata, waka uña lantista ima. 16Chay jawaqa pikunachus cheqamanta Israelpa Señornin Tata Diosta mask'ayta munajkunaqa sacerdotes, chantá levitas Jerusalenman rerqanku ñawpa tatasninkoj Señorninku Tata Diosman uywa wañuchisqasta jaywanankupaj. 17Jinamanta Judá reinotaqa astawan kallpacharqanku, Salomonpa churin Roboamtataj sinch'ita sayacherqanku kinsa watasta, imaraykuchus paykunaqa Davidpa ruwasqanta, Salomonpa ruwasqanta jinallataj ruwarqanku. 18Roboamqa Mahalatwan casarakorqa. Paypa tatanqa Davidpa churin Jerimot karqa, Mahalatpa mamantaj Isaípa allchhin Eliabpa ususin Abihail karqa. 19Roboampata, Mahalatpatawan churisninku karqanku: Jehús, Semarías, Zaham ima. 20Chaymantataj Roboamqa Absalonpa ususin Maacawan casarakullarqataj, churisnintaj karqanku: Abías, Atai, Ziza, Selomit ima. 21Roboampa warmisnenqa karqanku chunka pusajniyoj. Tanta warmisnintaj sojta chunka karqanku. Tukuyninkumanta astawanqa Maacata munakorqa. Iskay chunka pusajniyoj churisnin karqanku, ususisnintaj sojta chunka karqanku. 22Roboamqa Maacaj churin Abiasta churarqa wawqesnin ukhupi tukuy imamanta yachanampaj, imaraykuchus Roboamqa munarqa paypa qhepampi Maacaj churin Abías rey kananta. 23Sumajta umachakuspa, payqa chay wakin churisninta kachararqa tukuynej Judá suyuman, jinataj Benjamín suyumampis, tukuynin jark'achasqa llajtasmanwan. Chantá ashkha mikhunasta paykunapaj churaporqa, casarachinampajtaj ashkha warmista paykunapaj mask'aporqa.

will be added

X\