1 Roboamqa Sichemman rerqa, imaraykuchus tukuy israelitas chayman tantakamusqanku payta churanankupaj reymanta. 2 Chayta uyarispa, Nabatpa churin Jeroboamqa Egiptomanta kutimporqa, maypichus tiyakushasqa rey Salomonmanta ayqesqanrayku, chaymanta. 3 Wajyajta kachajtinkutaj, Nabatpa churin Jeroboamqa jamorqa, tukuy israelitaswan khuskataj Roboamwan kay jinata parlaj rerqanku: 4 Tataykeqa ancha sinch'ita sirvichikuwaj kayku; kunanqa qan pisiyachiy ari chay sinch'i trabajota, chay chhika llasa yugota jina pataykuman churawasqaykumanta, noqaykutaj qanta sirvisqayku, nispa. 5 Roboamtaj kuticherqa: Kinsa p'unchaymanta kutimuwaychej, nispa. Runastaj riporqanku. 6 Chaypachaj rey Roboamqa tatan Salomón kawsashajtillanraj yanaparqanku, chay kurajkunata tapurerqa: Imatataj kay runasman kutichinayta yuyaychawankichejri? nispa. 7 Paykunaqa kuticherqanku: Sichus kay runaswan k'acha kanki, mañakusqankutataj uyarinki, k'acha sonqotaj kutichinki chayqa, paykunaqa wiñaypaj qanta sirvisonqanku, nispa. 8 Roboamtajrí mana jap'ikorqachu chay kurajkunajpa yuyaychasqankuta, manachayqa tapurillarqataj paypa kamachiynimpi kasharqanku, chay waynasta, pikunachus paywan khuska wiñajkunata. 9 Nerqataj: Imatataj chay runasman kutichinayta yuyaychawankichejri? Paykunaqa mañawanku tatay sinch'i trabajoman paykunata churasqanmanta pisiyachinayta, nispa. 10 Paywan khuska wiñarqanku chay waynastaj payman kuticherqanku: Pischus mañasunku tataykej sinch'i trabajoman paykunata churasqanmanta pisiyachinaykita, chay runasmanqa kay jinata kutichinayki tiyan: Makiypa uña dedonqa tataypa ñañu wasanmanta nisqaqa aswan rakhuraj. 11 Sichus payqa sinch'ita trabajachisorqachej chayqa, noqa aswan sinch'itaraj trabajachisqaykichej. Sichus tatay lazowan seq'osorqachej chayqa, noqaqa puntampi titi bolasniyoj lazowan seq'osqaykichej, nispa. 12 Kinsa p'unchaymanta Jeroboamqa tukuy Israel aylluntinwan Roboampa ñawpaqenman jamorqanku, rey nisqanman jina. 13 Rey Roboamtaj chay kurajkunajpa yuyaychasqankuta mana jap'ikuspa, may sinch'i simiwan runasman kuticherqa. 14 Chay waynaspa yuyaychasqankuman jina kuticherqa: Tatayqa sinch'ita trabajachisorqachej, noqatajrí astawanraj trabajachisqaykichej. Tatayqa lazowan seq'osorqachej, noqarí puntampi titi bolasniyoj lazowan seq'osqaykichej, nispa. 15 Reyqa mana kasorqachu runaspa nisqankuta, imaraykuchus Tata Diosmantapuni ajina kanan karqa, junt'akunampaj Tata Diospa parlasqan Silomanta Ahiasnejta Nabatpa churin Jeroboamman. 16 Jinapi tukuynin Israel ayllutaj, reyqa mana paykunata uyarisqanta rikuspa, kuticherqanku: Davidwanqa mana ima ruwananchej kanchu. Isaípa churinwanqa mana ima herencianchejpis kanchu. Israel ayllumanta kajkuna, sapa ujpis wasisninchejman ripunachej, Davidtaj wasinta qhawachun, nispa. Chay ratopacha tukuy israelitasqa wasisninkuman ripurarqanku. 17 Judajpa llajtasnimpi tiyakoj israelitasta Roboamllapuni kamachisharqa. 18 Chantá Roboam kacharqa Adoramta mit'api trabajajkunaj kamachejnin kanampaj, israelitastajrí rumiswan ch'anqaykuspa, payta wañurparicherqanku. Chaypacha rey Roboamqa usqhayta carretanman wichariytawankama Jerusalenman ayqerqa. 19 Jinamanta Israelqa Davidpa miraynimpa contrampi kashan kunankama.
