1 TIMOTEO 6

1Wata runasqa patronesninkuta jatumpaj qhawachunku, ama Diospa sutinmanta nitaj yachachisqanchejmantapis runas sajrata parlanankupaj. 2Creej patronesniyoj kajkunaqa patronesninkuta ama pisipaj qhawachunkuchu hermanosninku kasqankurayku. Astawanqa aswan allinta paykunata sirvichunku, imaraykuchus pikunatachus sirvishanku, chaykunaqa munasqa hermanosninku kanku. Kay imasta yachachiy, yuyaychaytaj: 3Sichus pillapis waj jinata yachachin, mana Señorninchej Jesucristoj cheqa nisqasninman jina nitaj cheqan kajman jina chayqa, 4chay runa mana imata yachaspalla jatunchakun. Payqa wañurin tapuykunamanta, ima palabrallamantapis churanakuymantawan; chaytajrí apamun chhoqonakuyta, t'aqanakuyta, sajra parlayta, sajra yuyaytapis. 5Jinallataj yuyayninkupi musphasqa kaspa, tukuy imamanta churanakunkupuni, manañataj cheqa kajta rejsiyta atinkuchu. Paykuna yuyanku cheqan kajman jina kawsayqa qolqeta jap'inallapaj kasqanta. 6Cheqan kajman jina kawsayniyoj kaspa, sichus pipis kapusqallanwan sonqo junt'asqa kanman chayqa, cheqa kaj qhapaj kapuyniyoj kanqa. 7Kay pachamanqa mana imayoj jamorqanchej, jinallataj ni imata kaymanta apasunchu. 8Chayrayku mikhunayoj, p'achayoj kaspaqa, chaywan sonqo junt'asqa kakunanchej. 9Qhapajyayta munajkunarí sajra munaywan atipachikuspa, tojllapi jina urmanku imaymana pierdechej wampu munapayaykunaman. Chaykunaqa runasta mana allin kawsayman tanqaykunku, chinkaymantaj. 10Qolqe munakoyqa tukuy imaymana sajra kajpa saphin. Chayta munapayaspa, wakenqa cheqa creeymanta t'aqakorqanku, ashkha imaymana llakiykunawantaj ñak'arerqanku. 11Qanrí, Diospa kamachin, karunchakuy chay tukuy imasmanta. Astawanqa kallpakuy cheqanta kawsanaykipaj cheqan kajman jina, creeywan, munakuywan, pacienciawan, llamp'u sonqo kaywan ima. 12Creeyrayku, chay sumaj tinkuypi kallpakuy. Wiñay kawsaymanta sumajta ch'ipakuy, imaraykuchus chaypajmin Dios wajyasorqa ashkha runaspa ñawpaqempi, Cristopi creesqaykimanta willashajtiyki. 13Kunanqa, Dios Tataj ñawpaqempi pichus, tukuy imasman kawsayta qoj, Jesucristoj ñawpaqempipis, pichus Poncio Pilatoj ñawpaqempi cheqa creeymanta sut'ita willarqa, paykunaj ñawpaqenkupi kamachiyki: 14Chay kamachisqata junt'ay mana pantaspa, mana k'amina kanaykipaj Señorninchej Jesucristo jamunankama. 15K'ata Diosqa maychus tiempompi rikuchenqa Jesucristota. Paymin yupaychasqa k'ata Jatun Kamachejqa, reyespa Reynin, señorkunaj Señornintaj. 16Pay k'atamin ni jayk'aj wañojqa, pichus mana chimpay atina k'anchaypi tiyakoj. Paytaqa mana pipis rikorqachu, nitaj pipis rikuyta atinchu. Payqa jatunchasqapuni kachun, atiynintaj kachun wiñaypa wiñaynintimpaj. Ajina kachun. 17Kay pacha imaspi qhapajkunata kamachiy ama umata oqharinankuta, amataj kapuyninkupi atienekunankuta, imaraykuchus chayqa qhasi manakajlla. Manachayrí kawsaj Diospi atienekuchunku, pichus tukuy imata qowanchej mana mich'akuspa chay imaswan kusisqa kawsananchejpaj, chaypi. 18Kamachillaytaj allin kajta ruwanankuta, allin ruwanaspitaj qhapaj kanankuta. Wakichisqallataj kachunku, kapuyninkumanta wajkunaman jaywarinankupaj mana mich'akuspa. 19Ajinapi paykuna kikinkupaj kapuykunata tantashanku jamoj p'unchaykunapaj, cheqa kaj kawsaymanta ch'ipakuspa. 20Qan Timoteóy, allinta waqaychay, imatachus Dios qosorqa, chayta. Qhesachay mana Diosmanta qhasi thawtiykunata, Diospa contrampi churanakuyta ima, mayqenmantachus wakin runas pantaspa, yuyanku cheqa yachay kasqanta, chay imasta. 21Chay llulla yachachiykunata qhatispa, wakinkunaqa cheqa creeymanta t'aqakorqanku. Diospa qhasilla k'acha yanapaynenqa qanwan kachun.

will be added

X\