1 Kay nisqaqa cheqapuni: Iglesiapi kuraj qhawaj kayta munajqa allin ruwanatapuni ruwayta munan. 2 Payqa mana k'amina kanan tiyan, uj k'ata warmiyoj, aychampa munayninwan mana atipachikoj, allimpaj qhawasqa, sumaj yuyayniyoj, wasinman wajyarikoj, yachachinampajtaj allin wakichisqa. 3 Kanallantaj tiyan mana machakoj, mana maqanakuta mask'aj, manachayqa llamp'u sonqoyoj, k'acha runa. Manallataj qolqemanta wañusqachu kanan tiyan. 4 Wasimpi familianta allinta qhawanan tiyan wawasninman kasukuyta yachachispa, chantá allimpaj qhawasqa. 5 Chayqa ajina, imaraykuchus pichus wasimpi kajkunata mana allinta qhawayta atejqa manallataj kuraj qhawaj jina Diospa Iglesiantapis qhawayta atenqachu. 6 Payqa mana mosoj hermanochu kanan tiyan; manachayqa jatunchakuspa urmanman, Kuraj Supay juchachasqa karqa, chay juchaman. 7 Jinallataj mana creejkunapajpis allimpaj qhawasqa kanan tiyan, ama p'enqayta Kuraj Supaypa tojlla churasqanman urmanampaj. 8 Diaconospis ajinallataj kananku tiyan allimpaj qhawasqas, ama iskayta parlaj, amataj machakojkuna, nitaj sajra ruwanaspi qolqe jap'iymanta wañusqas. 9 Creena kajpa sut'inchasqa yachayninta waqaychachunku mana juchachana sonqo yuyayninkuwan. 10 Manaraj paykuna ruwanankuman churasqa kashajtinku, allintaraj qhawariychej chaypaj jinachus manachus kasqankuta. Sichus mana k'amina kanku chayqa, diaconomanta sirvej yaykuchunku. 11 Warmispis jinallataj allimpaj qhawasqa kachunku, ama cuento q'epis, aychankoj munayninwan mana atipachikojkuna, tukuy imapitaj maychus kajta junt'ajkuna. 12 Diaconosqa uj warmiyojlla kachunku. Wawasninkuta, wasinkupi kajkunatawan allinta qhawananku tiyan. 13 Diáconos chay ruwanankuta allinta junt'aspa, allimpaj qhawasqa kayta tarinku. Jinataj atenqanku Cristo Jesuspi creesqankumanta tukuyman willarayta mana manchachikuspa. 14 Kayta qhelqamuyki, usqhayta qanman jamuyta munaspa. 15 Sichus kaypi qhepakullasajraj chayqa, kay qhelqasqaymanta yachanki imaynatachus Diospa wawasnin ukhupi kawsakuna kasqanta. Chayqa kawsashaj Diospa Iglesian, cheqa kajta waqaychaj, sayachejtaj. 16 Cheqamanta kay creesqanchej sut'inchasqa cheqa kajqa may t'ukuna, jatuntaj: Cristoqa aychallikuspa runaswan rikuchikorqa. Espíritu Santo rikucherqa Cristoqa Diospuni kasqanta. Payqa angelespa rikusqan karqa. Paymanta willakorqa mana judío kajkuna ukhupipis. Kay pachapi runasqa Paypi creerqanku. Payqa oqharisqa karqa janaj pacha jatun k'anchayman.
