1 TESALONICENSES 5

1Hermanos, Señorpa kutimunan chay p'unchaymanta, chay horamantawanqa anchaña kanman qhelqamunayqa. 2Qankuna allinta yachankichej suwaqa mana yuyasqallamanta tutapi jamusqanta; ajinallatataj Señorpa p'unchaynimpis mana yuyasqallamanta jamonqa. 3Maypachachus runas nishanqanku: Tukuy imapis allillan; ni imamanta llakikuna kanchu, nispa chaypacha, ujllata paykuna tukuchisqa kanqanku, imaynatachus nacechikoj warmiman nanaynin chayarparimun, ajinata, paykunataj mana ayqeyta atenqankuchu. 4Qankunarí, hermanos, mana laqhapichu kashankichej, jaqay p'unchayqa suwa jina taripasunaykichejpaj. 5Tukuyniykichej k'anchaypa wawasnin kankichej, sut'i p'unchaypa wawasnin, manataj tutajpatachu, nitaj laqhajpatachu. 6Chayrayku, ama chay ujkuna jinaqa puñunachu; astawanqa ama puñuspa qhawana. Ch'aki sonqo runas jina yuyayninchejpi kana. 7Puñojkunaqa tuta puñunku; machajkunapis tuta machanku. 8Noqanchejrí sut'i p'unchaypa wawasnin kaspa, ch'aki sonqo runas jina yuyayninchejpi kana. Creeywan, munakuywantaj p'achallikuna kachun jark'akuna fierro pecherawan jina, salvasqa kayta suyakuytataj monterata jina churakuna. 9Diosqa mana phiñakuynimpi castigasqa kananchejpajchu churawarqanchej, astawanqa salvacionta tarinanchejpaj Señorninchej Jesucristonejta. 10Payqa noqanchejrayku wañorqa, noqanchej kawsashaspapis, chayrí wañuypi puñushaspapis, Paywan khuskapuni kawsananchejpaj. 11Chayrayku, qankunapura sonqochanakuychej, jinallataj kallpachanakuychej, imaynatachus ruwashankichej, ajinata. 12Hermanos, mañakuyku qankuna ukhupi trabajajkunata allimpaj qhawanaykichejta, pikunachus Señorpi yachachisunkichej, pusasunkichejtaj, chaykunata. 13Trabajasqankurayku may munakuywan paykunata allimpaj qhawaychej. Jinallataj qankunapura allimpi kawsakuychej. 14Ajinallatataj mañakuyku, hermanos, qhellastaqa k'aminaykichejta, manchalistapis yanapanaykichejta, pisi kallpastapis kallpachanaykichejta, tukuypajtaj pacienciayoj kanaykichejta. 15Ama pipis sajrata ruwajman sajrallatataj kutichichunchu; astawanqa allin kajllatapuni ruwaychej qankuna ukhupi, tukuywampis. 16Kusikullaychejpuni. 17Mana sayk'uspa, Diosmanta mañakullaychejpuni. 18Imapis kachun, Diosman graciasta qollaychejpuni, imaraykuchus chaymin qankunapaj Cristo Jesuspi Diospa munaynenqa. 19Ama thasnuychejchu Espíritu Santoj k'ajayninta. 20Diosmanta sut'inchasqataqa ama pisipaj qhawaychejchu. 21Tukuy imata allinta reparaychej yachanaykichejpaj allinchus manachus kasqanta, allin kajtataj jap'ikuychej. 22Amapuni munaychejchu sajra kajta ruwayta. 23Sonqo tiyaykuyta qoj Diosqa allintapuni qankunata llimphuchachun. Tukuy kayniykichej, espirituykichej, almaykichej, cuerpoykichejpis mana k'amina waqaychasqa kachunku Señorninchej Jesucristoj jamuynimpaj. 24Wajyasojniykichejqa chayta ruwanqa, imaraykuchus Payqa nisqanta junt'allampuni. 25Hermanos, noqaykupajpis Diosmanta mañapuwayku. 26Tukuy hermanosta napaykuychej llimphu sonqo much'aykuywan. 27Señorpa sutimpi kamachiykichej kay cartata leenaykichejta tukuy hermanosman. 28Señorninchej Jesucristoj qhasilla k'acha yanapaynin qankunawan kachun.

will be added

X\