1 TESALONICENSES 4

1Kay qhepanta hermanos, qankunata mañakuyku, yuyaychaykutaj Señor Jesuspi, imaynatachus noqaykumanta yachaqakorqankichej, ajinata kawsanaykichejta, Diosta kusichispa. Kunankama ajinata kawsashankichej; chaywampis mañakuyku astawan ajinallatapuni kawsanaykichejta. 2Yachankichejña ima kamachisqastachus Señor Jesuspa sutimpi qankunaman qosqaykuta. 3Kaymin Diospa munaynenqa: Pay munan juchamanta t'aqasqa kaspa, Payllapaj kawsanaykichejta. Munallantaj khuchichakuymanta t'aqakunaykichejta. 4Sapa ujniykichej yachaychej warmiykichejwan maychus kajta kawsakuyta Diosllapaj kawsaspa, allimpaj qhawasqa kasqanman jina, 5manataj aychaj sajra munayninman jinachu, Diospi mana creej runas jinaqa. 6Ama pipis kay imaspi hermanompa contranta ruwachunchu, nitaj payta ch'awkiyachunchu, imaraykuchus Señorqa sinch'ita castiganqa chay tukuy imata ruwajkunata, imaynatachus mayta nerqaykuña, ajinata. 7Diosqa mana khuchichakuypi kawsanapajchu wajyawarqanchej, manachayqa juchamanta t'aqasqa Paypaj kawsananchejpaj. 8Chayrayku, pichus kay kamachisqasta qhesachajqa mana runatachu qhesachan, manachayqa Diosta qhesachan, pichus Espíritu Santota qosorqachej, chayta. 9Kunanqa, hermanopura munanakunamantaqa anchaña kanman qhelqamunayqa, imaraykuchus qankuna Diosmanta yachaqakorqankichej purajmanta munanakuyta. 10Cheqamanta qankunaqa munakunkichej tukuy Macedoniapi kaj hermanosta. Chaywampis, hermanos, mañakuyku astawan astawan munakuypi wiñanaykichejta. 11Tukuy atisqaykichejta allin kawsakuyta mask'aychej. Ruwanaykichejta ruwakuychej, kikin makisniykichejwan trabajaspa kamachisqaykuman jina. 12Ajinamanta mana creejkunaj ñawpaqenkupi allinta kawsakusqaykichejrayku, allimpaj qhawasqa kankichej, nitaj imamanta pisinkichejchu. 13Munayku, hermanos, qankuna yachanaykichejta wañojkunamanta, ama chay ujkuna jina llakisqa kanaykichejpaj, pikunapajchus mana kanchu janaj pachaman chayana suyakuy, chaykuna jina. 14Cheqatapuni creenchej Jesús wañusqanta, kawsarimpusqantataj; chayrayku Diosqa Jesuswan khuska pusanqa, Paypi creespa wañojkunata. 15Kaytaqa niyku Señorpa yachachisqanman jina: Noqanchej, pikunachus Señorpa jamunankama kawsashaj qhepakojkunaqa mana ñawpaykusunchu wañupojkunataqa. 16Imaraykuchus Señorpuni janaj pachamanta urayk'amonqa. Chaypacha uyarikonqa uj jatun qhapariy, arcangelpa voznin, Diospa cornetampa waqaynin ima. Chantá Cristopi creespa wañojkunaqa ñawpajta kawsarimponqanku. 17Chaymantaña, noqanchej kawsashajkunaqa paykunawan khuska phuyusman oqharisqa kasunchej, Señorta taripamunanchejpaj pata wayrapi. Ajinamanta Señorwan wiñaypaj kamusunchej. 18Chayrayku, kay simi nisqaswan purajmanta sonqochanakuychej.

will be added

X\