1 TESALONICENSES 3

1Chayrayku, manaña suyayta atispa, noqayku ukhu parlarikorqayku Atenaspi sapayku qhepakunaykuta. 2Hermanoyku Timoteota qankunaman kachamorqayku. Payqa Diospa kamachin, ruwaysiwajniykutaj Cristoj evangeliompi. Payta kachamorqayku qankunata kallpachasunaykichejpaj, creesqaykichejpitaj 3yanapasunaykichejpaj, ama pipis kay ñak'ariykunarayku iskayrayanampaj; imaraykuchus yachankichej jina, kay imasta ñak'arinanchejpajpuni churasqa kanchej. 4Qankunallawanraj kashaspa, ñawpajmantaña qankunaman willarqayku ñak'ariykuna jamunanta; yachankichej jina, ajinapuni karqa. 5Chayrayku, noqapis mana astawan suyayta atispa, Timoteota qankunaman kachamorqani creesqaykichejmanta yachanampaj. Yuyarqani ichapis Kuraj Supayqa qankunata pantachisqanta, qankuna ukhupi ruwasqaykutaj qhasipaj kananta. 6Kunanqa, Timoteo noqaykuman kutimuspa, allin imasta willawayku creesqaykichejmanta, munakuyniykichejmanta ima. Willallawarqaykutaj noqaykumanta yuyarikojpuni kasqaykichejta, noqaykuta rikuyta munaspa, imaynatachus noqaykupis qankunata rikuyta munayku, ajinata. 7Chayrayku, hermanos, may jina llakiypi, ñak'ariypitaj kashaspapis, creesqaykichejmanta uyarisqaykurayku may sonqochasqa karqayku. 8Kunanqa sonqo t'ikarishaj kawsashayku qankuna Señorpi sinch'ita sayasqaykichejrayku. 9Chayrayku Diosman graciasta qoyta mana tukuyta atiykuchu. Graciasta qollaykupuni, imaraykuchus Paypa ñawpaqempi may jatun kusikuyniyoj kayku qankunarayku. 10Tuta p'unchay anchatapuni Diosmanta mañakuyku uyaykichejta rikunaykupaj, creesqaykichejman imachus mana junt'arajchu kashan, chayman junt'achinaykupaj. 11Kikin Dios Tatanchej, Señorninchej Jesucristo ima qankunaman rinaykupaj ñanta wakichichunku. 12Señortaj munakuyniykichejta astawan, astawan wiñachichun qankuna ukhupi, chantá tukuy runaspajpis, imaynatachus noqaykupis qankunata munakuyku, ajinata. 13Ajinamanta sonqosniykichej llimphu kawsaypi kallpachasqa kanqa, mana k'amiyniyojtaj Dios Tatanchejpa ñawpaqempi, Señorninchej Jesucristoj, tukuy ajllakusqasninwan jamuynimpi.

will be added

X\