1 Samuelqa ñapis machuña kasqanrayku, israelitakunata kamachinankupaj churinkunata churarqa. 2 Kuraj kajpata sutin karqa Joel, sullk'ajtataj Abías. Paykunataj Beersebapi juezkuna jina kamacherqanku. 3 Chaywampis churinkunaqa mana tatanku jinachu imatapis allinta ruwarqanku, manachayqa qolqeta munapayanawan atipachikuspa, lluk'ita jap'ikorqanku, nitaj justiciata ruwarqankuchu. 4 Chayrayku Israel aylloj kurajninkuna tantaykukuspa, Ramá llajtaman Samuelwan parlaj rerqanku. 5 Chanta nerqanku: “Qanqa allin machuña kanki, churiykikunataj mana qan jina allintachu ruwanku. Chayrayku waj suyukuna jina jatun kamachejniyoj kayta munayku. Uj jatun kamachejta churapuwayku kamachinawaykupaj,” nispa. 6 Samuelpajrí israelitakuna jatun kamachejta mañasqanku mana allinchu rijch'arqa; chayrayku Tata Dioswan parlarikuspa payta taporqa. 7 Tata Diostajrí kay jinata kuticherqa: “Israelitakuna imatachus mañakusqankuta kasullay. Manamin qantachu qhesachashasunku, manachayqa Noqatamin, ama paykunata kamachinaypaj. 8 Egiptomanta paykunata orqhomusqaymantapacha waj dioskunata yupaychaspa wasanchawanku, ajinallatataj qantapis Noqata jina ruwashallasunkutaj. 9 Ajinaqa kasullay imatachus mañakusqankuta. Chaywampis sut'inta niy, jatun kamachej paykunata kamachispa imatachus ruwananta,” nispa. 10 Chanta Samuelqa jatun kamachejta mañakoj israelitakunaman, Tata Dios imatachus kutichisqanta willarqa. 11 Nerqataj: –Munasqaykichej jatun kamachejqa, kay jinata ruwasonqachej: Churiykichejta soldadonkunan kanankupaj wajyachenqa: Maqanaku carretakunaman churanampaj, caballokunapi purinankupaj, chanta ñawpaqenta rinankupaj. 12 Wakintaqa waranqa soldadokunata kamachinankupaj, wakintataj phishqa chunkata kamachinankupaj churanqa. Wakintaqa jallp'anta llank'anankupaj churanqa, chantá chajraj poqosqanta oqharinankupaj, jinallataj armakunata ruwanankupaj, carretakunanpajpis tukuy imata ruwanankupaj churanqa. 13 Ususiykichejtapis wajyallanqataj, wakintaqa perfumeta ruwanankupaj, wayk'unankupaj, t'antata ruwanankupaj ima. 14 Jinallataj sumaj jallp'aykichejta jap'ikaponqa, sumaj uva huertaykichejta, chantá olivo sach'aykichejtapis; chaykunatataj paypa kamachinkunanman qonqa. 15 Payqa chajraykichej poqosqanmanta, jinataj uva sach'aykichej poqosqanmantapis chunkaj wasanmanta ujta qochikusonqachej, payta yanapajkunaman jaywanampaj. 16 Ajinallatataj qhechusonqachej sumachaj kamachiykichejkunata, chantá qhechullasonqachejtaj aswan sumaj kaj bueyniykichejta, burroykichejtapis pay llank'achinampaj. 17 Ajinallatataj uywaykichejmantapis chunkamanta ujta jap'ikaponqa; qankunantin paypa wata runan kankichej. 18 Chaypacha jatun kamachejniyoj kayta munasqaykichejmanta sonqoykichejta nanachikuspa, Tata Diosman qhaparikunkichej chayqa, Payqa manapuni uyarisonqachejchu, nispa. 19 Chay tukuywampis israelitakunaqa manapuni Samuelpa nisqanta kasorqankuchu, aswampis kuticherqanku: –Imapis kachun, jatun kamachejniyoj kayta munaykupuni. 20 Noqaykupis waj suyukuna jina jatun kamachejniyoj kasqayku. Payqa noqaykuta kamachiwasqayku; noqaykuwan khuskataj maqanakuman renqa, nispa. 21 Samueltaj israelitakunajpa nisqankuta uyarispa, Tata Diosman willarqa. 22 Tata Diostaj kuticherqa: –Mañasqankuta kasullay, jatun kamachejta churapuy, nispa. Chanta Samuelqa israelitakunata nerqa, sapa ujpis llajtankuman kutipunankuta.
