1 Chaypacha Quiriat-jearim llajtapi tiyakojkuna rispa, Diospa arcanta apakamporqanku. Chanta loma patapi Abinadabpa wasinman apaykorqanku, churin Eleazartataj Tata Diospa arcanta qhawanampaj churarqanku. 2 Quiriat-jearim llajtapi Diospa arcanta saqesqankoqa unayña karqa, iskay chunka wata jinaña. Chaypachata tukuy israelitakuna waqaspa tukuy sonqo Diosta mask'arqanku. 3 Chayrayku Samuelqa tukuynin israelitakunata nerqa: “Sichus qankuna tukuy sonqowan Tata Diosman kutirikunkichej chayqa, waj dioskunata, chanta Astartej lantintapis yupaychayta saqeychej. Chantá tukuy sonqomanta payllataña sirviychej. Chaymantaraj Tata Diosqa filisteokunajpa makinkumanta kacharichisonqachej,” nispa. 4 Chantá israelitakunaqa Baalpa lantinkunata, jinataj Astartejpa lantinkunata wijch'uspa, Tata Diosllataña yupaycharqanku. 5 Chanta Samuel kamacherqa: “Tukuy Israel ayllu, Mispá llajtapi tantakuychej, noqataj Tata Diosmanta qankunarayku mañapusqaykichej,” nispa. 6 Israelitakunaqa Mispá llajtapi tantakorqanku, chaypitaj yakuta pujyumanta orqhospa, Tata Diosman jaywaspa jich'arqanku. Chay p'unchay ayunarqanku, tukuypa uyarinantataj nerqanku: Tata Diospa contranta juchallikuyku, nispa. Israelitakunaqa Mispá llajtapi Samuelta juezninkupaj rejsikaporqanku. 7 Filisteokuna, israelitakuna Mispá llajtapi tantasqa kashasqankuta yachaspa, kurajninkukuna israelitakunajpa contrankupi maqanakunankupaj llojserqanku. Israelitakunataj chayta yachaspa, mayta manchachikorqanku. 8 Chanta Samuelman nerqanku: “Tata Diosmanta noqaykupaj mañapullawaykupuni ari, filisteokunajpa makinkumanta kacharichinawaykupaj,” nispa. 9 Chantá Samuelqa ñuñoj corderitota jap'ispa ñak'aytawan, tukuyninta Tata Diospaj ruphacherqa. Chaymantataj Tata Dios yanapananta mañaporqa, Paytaj mañakusqanta uyarerqa. 10 Samuel ñak'asqan corderitota Tata Diospaj q'olachishajtin, filisteokunaqa israelitakunawan maqanakunankupaj chayamorqankupacha. Jinallapi Tata Diosqa sinch'i qhon qhonkunata filisteokunajpa patankuman kachaykamuspa, paykunata mayta mancharicherqa. Jinamanta paykunaqa israelitakunawan atipachikorqanku. 11 Chaypachapacha israelitakunaqa Mispamanta llojsiytawan, filisteokunata atipaykuspa qhatiykorqanku Bet-car llajtamanta aswan urakama. 12 Chaymantataj Samuelqa uj jatun rumita oqharispa, Mispá llajtawan Sen llajtawan tinkuypi churarqa. Chanta chay cheqata Eben-ezer, nispa suticharqa; chay niyta munan: “Kaykama Tata Diosqa yanapawarqanchej,” nispa. 13 Ajinata filisteokunaqa atipaykuchikorqanku, manañataj ujtawan israelitakunajpa jap'iyninkuman yaykumorqankuchu. Samuel kawsanankama Tata Diosqa filisteokunajpa contrankupipuni sayaykorqa. 14 Filisteokunaqa, israelitakunamanta qhechusqanku llajtakunata kutichiporqanku Ecrón llajtamanta Gat llajtakama. Jinamanta israelitakunaqa filisteokunaj makinmanta jallp'ankuta qhechukaporqanku. Chanta israelitakunawan amorreokunawanqa allinta kawsakorqanku. 15 Samuelqa wañupunankama israelitakunata juez jina kamacherqa. 16 Sapa watataj Betelninta, Guilgalninta, jinataj Mispanejta rispa muyurimoj, israelitakuna ukhupi ch'ajwata allinchaspa. 17 Chaymantaqa Ramá llajtaman kutimpoj, chaypi wasin kasqanrayku, chaymantapachataj israelitakunata kuraka jina kamacherqa. Chayllapitaj Tata Diospaj uj altarta ruwaporqa.
