1 Diospa arcanqa qanchis killata Filistea suyupi karqa. 2 Chantá filisteokunaqa sacerdotenkukunata chanta yatirinkukunatawan tapunankupaj wajyacherqanku: –¿Imatataj ruwasunman Tata Diospa arcanwanri? Niwayku imaynatachus llajtanman kutichipunata, nispa. 3 Paykunataj kuticherqanku: –Israelpa Diosnimpa arcanta kutichipuspaqa, ama jinallataqa kutichinkichejchu, qhechuspa apamusqaykichejmanta Tata Diosman imallatapis qoychej. Chaypacha qankunaqa chay onqoymanta qhaliyankichej, yachankichejtaj imaraykuchus Diosqa sinchita ñak'arichisusqaykichejta, nispa. 4 Chantá filisteokuna tapurikorqanku: –Juchallisqaykuta pampachanampaj, imatataj qoykumanri? nispa. Sacerdotekunataj kuticherqanku: –Ruwaychej qorimanta phishqa ch'uputa, jinataj qorimanta phishqa juk'uchakunatawan, sapa kurajkunanchejpaj ujtakama, imaraykuchus kurajniykichejkuna, jinataj qankunapis kikin onqoyllawantaj ñak'arerqankichej. 5 Chayrayku llajtaykichejta tukuchishanku, chay ch'upuman rijch'akojta, chantá juk'uchakunaman rijch'akojkunata ruwaychej. Israelpa Diosnintataj yupaychaychej; ichapis Payqa qankunata, diosniykichejkunata, jinataj jallp'aykichejtapis manaña jasut'inmanchu. 6 Imaraykutaj qankuna, egipciokuna jina chanta jatun kamachej Faraon jina mana uyarikuyta munaj kankichejri? Israel suyoj Diosnin paykunata sinchita ñak'arichejtinraj, israelitakunata ripojta saqerqanku. 7 Chayrayku kunanqa mosoj carretata ruwaychej, chaymantaj uñayoj, mana jayk'aj yugoj chayanan iskay wakakunata wataykuychej. Amataj saqeychejchu uñanku paykunata qhatinankuta, manachayqa kanchaman wisk'amunkichej. 8 Chantá Tata Diospa arcanta carretaman churaykuychej, ladonmantaj uj cajompi, imakunatachus qorimanta ruwasqata juchaykichejmanta qonkichej, chaykunata churaykuychej. Chanta wakakunaj aysasqanku carreta payllamanta puririnanta saqenkichej. 9 Chanta sumajta qhawankichej: Sichus carreta Bet-semes llajtaman rej ñanta riponqa chayqa, yachasun Israelpa Diosnin chay jina llakiykunaman churawasqanchejta. Mana jina kajtinrí, yachasun mana Paychu ñak'arichiwasqanchejta, manachayqa kay ch'upu onpayllamanta rikhurisqanta. 10 Filisteokunaqa kikinta ruwarqanku. Uñayoj iskay wakakunata carretaman yugoykorqanku, uñankutataj kanchaman wisq'aykorqanku. 11 Chaymanta Tata Diospa arcanta carretaman churaykorqanku, jinallataj qori juk'achakunayoj, qori ch'upukunayoj cajontapis churaykullarqankutaj. 12 Chantá wakakunaqa Bet-semes llajtaman rej ñanninta paykunallamanta thaskiyta qallarerqanku, qhaparispa, ni mayman link'urispataj cheqanta rerqanku. Filisteokunajpa kurajninkukunataj Bet-semes tinkuykama rerqanku. 13 Bet-semespi tiyakojkunarí, vallepi trigota oqharisharqanku, qhawarispataj Diospa arcanta jamushajta rikorqanku, maytataj kusikorqanku. 14 Wakakunaj qhatatisqan carretaqa Bet-semespi Josuejpa jallp'ankama chayarqa, uj jatun rumi qayllapitaj sayarqa. Chanta Bet-semespi tiyakojkuna carretatamanta llant'ata ruwaspa, chanta wakakunata ñak'aspa, Tata Diosman jaywaspa ruphacherqanku. 15 Chantá levitakunaqa Diospa arcanta, jinataj qori imakunayoj cajontawan jurayk'uchispa, chay jatun rumi pataman churaykorqanku. Bet-semes llajtayojkunataj chay p'unchaypi uywa ñak'asqata ruphachispa Tata Diosman jaywarqanku, chantá waj jaywanakunatawan jaywallarqankutaj. 16 Chay imakunata ruwajta rikuspa, filisteokunajpa phishqa kurajninkukuna chay kikin p'unchaypacha Ecronman kutiporqanku. 17 Filisteokuna juchallisqankumanta qori ch'upukunata Tata Diosman qosqankoqa, kay llajtakunaj cuentanmanta karqa: Asdodmanta, Gazamanta, Ascalonmanta, Gatmanta, Ecronmanta ima. 18 Qorimanta ruwasqanku juk'uchakunapis phishqa kurajkuna kamachisqanku chay llajtakuna chhikallataj karqa, yupaspa perqawan muyusqa llajtakunata, jinataj mana perqawan muyuykusqa llajtakunatawan. Maypichus Tata Diospa arcanta churarqanku, chay jatun rumeqa, Bet-semespi Josuejpa jallp'ampi kunankama kashanraj. 19 Chaywampis Bet-semes llajtapi tiyakojkunamanta wakinta Tata Dios wañucherqa, Paypa arcan ukhupi imachus kasqanta rikuyta munaspa qhawasqankurayku. Chaypacha qanchis chunka runakunata wañucherqa. Chayrayku Tata Dios chay chhikatapuni wañuchisqanmanta waqarqanku. 20 Chanta Bet-semes llajtayojkuna nerqanku: “¿Pitaj llimphu llimphu Kaj Tata Diospa ñawpaqempi sayayta atinmanri? Arcanta maymantaj apachisunmanri?” nispa. 21 Chanta chaypachapacha Quiriat-jearimpi tiyakojkunaman kay jinata willacherqanku: “Filisteokunaqa Tata Diospa arcanta kutichimpunku; chayrayku jamuspa, apakapuychej,” nispa.
