1 Filisteokunaqa Diospa arcanta qhechuspa, Eben-ezermanta Asdodman aparqanku. 2 Chanta paykunaqa Diospa arcanta diosninku Dagonpa yupaychana wasinman aparqanku, chay diosninkoj ladonmantaj churarqanku. 3 Q'ayantin paqarintajrí Asdodpi tiyakojkuna chayamuspa, rikorqanku diosninku Dagonta pampaman k'umpusqata Diospa arcampa ñawpaqempi. Chantá Dagonta oqharispa, maypichus kananman churaykapullarqankutaj. 4 Jinataj q'ayantin paqarin Asdod llajtayojkuna jamuspa, Dagonta kikillantataj rikorqanku, Diospa arcampa ñawpaqempi pampapi k'umpusqata. Punku yaykuypi uman, chantá iskaynin makinpis p'akisqata rikorqanku, ukhullanña qhepakusqa. 5 Chayrayku kunankama Dagonpa sacerdotenkunan chanta yupaychaj rejkuna Dagonta yupaychana wasi punku urapi k'aspinman mana sarunkuchu. 6 Chaymanta qhepaman Tata Diosqa Asdodpi tiyakojkunata, jinataj muyuynimpi tiyakojkunatawan ch'upu onqoywan sinch'ita ñak'aricherqa. 7 Asdodpi tiyakojkuna chay tukuy imata rikuspa, nerqanku: “Israelpa Diosnimpa arcanqa mana noqanchej ukhupi kananchu, imaraykuchus noqanchejta, jinataj diosninchej Dagontapis sinch'ita jasut'ishawanchej,” nispa. 8 Chayrayku filisteokunamanta tukuy kurajkunata wajyacherqanku, chantataj taporqanku: –Imanasunchejtaj Israelpa Diosnimpa arcanwanri? nispa. Paykunataj kuticherqanku: –Gat llajtaman apaychej, nispa. Filisteokunataj chayman aparqanku. 9 Chayman apasqankutawantajrí Tata Diosqa Gat llajtapi tukuy tiyakojkunata maytapuni mancharicherqa, jatunta, juch'uyta, tukuytapuni ch'upu onqoywan ñak'aricherqa. 10 Chanta filisteokunaqa Diospa arcanta Ecrón llajtamanñataj aparqanku. Arcata chay llajtaman chayachejtinkukama, Ecronpi tiyakojkuna qhaparerqanku: “Israelpa Diosnimpa arcanta apamuwanchej tukuyninchejta wañurachinawanchejpaj,” nispa. 11 Ecron llajtayojkunaqa tukuyninku maytapuni mancharikorqanku, Dios paykunata sinch'ita jasut'isqanrayku. Chayrayku filisteokunajpa kurajninkukunata wajyachimuspa, nerqanku: “Israelitakunaj Diosninkojpa arcanta kaymanta apakapuychej; kutichipuychejtaj maymantachus apamorqankichej, chayman, ama tukuyninchejta wañuchinawanchejpaj,” nispa. 12 Mana wañojkunaqa ch'upu onqoywan ñak'arichisqa kasharqanku. Nanaywan qhaparisqankutaj janaj pachakama chayarqa.
