1 SAMUEL 4

1Samueltaj Tata Diospa tukuy parlasqanta israelitakunaman sut'inchaj. Uj kuti filisteokuna israelitakunawan maqanakunankupaj tantakorqanku; chayrayku israelitakunaqa filisteokunawan maqanakoj llojserqanku, Eben-ezer qayllapitaj jaraykukorqanku. Filisteokunataj Afec cheqapi jarakorqanku. 2Filisteokunaqa israelitakunawan maqanakunankupaj wakichikuspa israelitakunata atipaykorqanku, chaypi tawa waranqa soldadokunata jina wañucherqanku. 3Chantá israelita soldadokuna jarankuman kutipojtinku, kurajkuna tapunakorqanku: “¿Imaraykutaj Tata Dios filisteokunawan atipaykuchiwanchejri? Silomanta Tata Diospa arcanta apamunachej, noqanchejwan kaspa, enemigonchejkunamanta jark'akunawanchejpaj,” nispa. 4Jinaspa israelitakunaqa uj t'aqa soldadokunata Silo llajtaman kacharqanku, Querubin sutiyoj angelkunaj chawpimpi tiyakoj Tukuy Atiyniyoj Tata Diospa arcanta apamunankupaj. Elí sacerdotej churinkunan Hofní, chantá Fineespis Diospa arcanwan khuska rerqanku. 5Tata Diospa arcanta jaraman chayachimojtinkutaj, tukuy israelitakuna kusiywan sinch'ita qhaparerqanku. Sinchita qhaparisqankoqa jallp'ata kharkatiticherqa. 6Sinch'ita qhaparisqankuta uyarispa Filisteokuna tapukorqanku: “Imaraykutaj hebreokunajpa jarankupi sinch'i ch'ajwa tiyanri?” nispa. Chantá israelitakuna Tata Diospa arcanta apamusqankuta yachaspa, 7filisteokuna mancharikuspa, nerqanku: “Dios jarankuman chayamun. Ay noqanchejqa imapichus parasumpis. Manamin ujtapis ajina pasawarqanchejchu. 8Ay, noqanchejmanta imachus kanqapis. Pitaj jark'awasunman Atiyniyoj Diospa makinman urmananchejmantari? Paymin ch'in pampapi egipciokunata tukuy imaymana jasut'iykunawan tukucherqa. 9Kallpachakuychej ari, filisteo soldadokuna, sinch'itataj maqanakuychej, ama israelitakunaj wata runanku kanaykichejpaj, imaynatachus paykuna wata runaykichej karqanku jinataqa,” nispa. 10Chantá filisteokunaqa maqanakuspa israelitakunata atipaykorqanku. Israelitakunarí wasinkuman ayqerqanku. Filisteokunaqa chaypacha may ashkhatapuni wañuracherqanku; israelitakunamanta kinsa chunka waranqa soldadokuna wañuchisqa karqanku. 11Diospa arcantapis jap'ispa apakaporqanku. Jinataj Elijpa iskaynin churinkunatapis, Hofnita, Fineesta ima wañuchillarqankutaj. 12Chaypacha Benjamín ayllumanta uj soldado maqanakumanta ayqerqa, sinch'ita rispataj, chaypachapacha Silo llajtaman chayarqa, p'achan llik'irasqa, umanman jallp'a qhalliykusqa. 13Chay runa chayanampajqa, Eliqa punku qayllapi, ñan qhawarisqa tiyasharqa, Diospa arcanmanta may llakisqa. Jinapi ayqemoj runaqa llajtaman yaykuspa, tukuyman willarqa. Chay llajtapi tiyakojkunataj imachus pasasqanmanta yachaspa qhaparerqanku. 14Elitaj qhaparejta uyarispa, tapurerqa: –Imaraykutaj runa ch'ajwashawanri? nispa. Chay runataj usqhayllata Eliman willaj rerqa. 15Eliqa jisq'on chunka pusajniyoj watayojña karqa, ñawimpis chharpuyapusqaña. Manaña ni imata rikojñachu. 16Chay runa nerqa: –Kunallan maqanakumanta ayqemorqani, nispa. Chantá Elí taporqa: –Imataj tiyan, wawáy? nispa. 17Paytaj kuticherqa: Israelitakunaqa filisteokunamanta ayqenku. Jinallataj may chhika soldadokuna wañurachisqa kanku, chayllapitaj Hofni, chantá Fineespis wañunku; Diospa arcantapis filisteokuna jap'ispa apakapunku, nispa. 18Chay willaj runa Diospa arcanmanta parlajtinkama, Eliqa tiyasharqa chaymanta wasaman choqakorqa, unayniyoj chanta wira runa kasqanraykutaj kunkanta p'akikuspa wañorqa. Payqa tawa chunka watata israelitakunata kamacherqa. 19Chaypacha Fineespa warmin, Elijpa ñojch'anqa onqokunampaj jinaña kasharqa. Filisteokuna Diospa arcanta jap'isqankuta, chantá suegron, qosampis wañupusqankuta yachajtinkama nanaynin oqharerqa. Mayta nanaywan q'ewiykachakuspataj, wawanta paqarichikorqa. 20Yanapajkuna warmikunarí payta wañupunayajta rikuspa, nerqanku: “Ama manchachikuychu, uj qhari wawata paqarichikunki,” nispa. Paytajrí mana imatapis kuticherqachu, nitaj kasuta ruwarqachu. 21Wawatataj Icabod sutiwan suticharqa; chay suti niyta munan: Israelitakuna Diospa arcanta qhechuchikunku, Tata Dios saqerpariwanchis, nispa. Chayta nerqa israelitakuna Diospa arcanta qhechuchikusqankurayku, suegrompis, jinataj qosampis wañusqankurayku.

will be added

X\