1 SAMUEL 31

1Filisteokunaqa israelitakunawan maqanakorqanku, israelitakunatajrí ayqerikaporqanku. Guilboa Orqopitaj ashkhatapuni wañuykucherqanku. 2Filisteokunaqa Saúlta, churinkunatawan qhatiykuspa, wañucherqanku Jonatanta, Abinadabta, Malquisuata ima. 3Chaymantaqa Saúl kasharqa chaynejman tukuyninku maqanakoj qolluykukorqanku. Arcowan flechajkunaqa Saúlta jap'irparichispa, wañuy patapi kashajta ruwarparqanku. 4Chayrayku Saúlqa armanta apaykachapoj soldadota nerqa: –Espadaykita orqhokuspa, wañuchiway, Diosta mana manchachikoj runakuna wañuchiwaspa ama alqochakunawankupaj, nispa. Armanta apaykachapojqa mana nisqanta ruwarqachu, sinch'ita manchachikusqanrayku. Chayrayku Saúlqa espadanta sayaykuchispa, patanman urmaykurparerqa. 5Armanta apaykachapojtaj Saúlta wañusqata rikuspa, paypis kikillantataj ruwarqa; jinamanta Saúlwan khuska wañorqa. 6Ajinata chay p'unchay Saúl, jinataj kinsa churinkunan, armanta apaykachapojnin, chanta tukuy soldadonkunan ima wañorqanku. 7Chantá vallemanta chimpampi tiyakojkuna, Jordanmanta inti llojsimuynejpi jina tiyakojkunapis israelita soldadokuna ayqesqankuta, Saúlpis, churinkunapis wañusqankuta ima yachaspa, llajtankuta saqerpaspa ayqekullarqankutaj. Chantá filisteokuna chayamuspa, chay llajtakunapi tiyakorqanku. 8Q'ayantenqa, filisteokuna wañojkunaj valorniyoj imankuta orqhoraj rerqanku. Guilboa orqopitaj Saúlta, kinsantin churinkunatawan wañusqata tarerqanku. 9Chantá Saúlpa umanta qholorqanku, armantataj jap'ikaporqanku. Jinaspataj tukuy Filistea jap'iyman wijllajkunata kacharqanku, lantikunata yupaychana wasikunapi tukuy runakunaman willanankupaj. 10Saúlpa armankunata Astarté sutiyoj diosta yupaychananku wasiman churarqanku, ayantataj Bet-sán llajtaj perqaman warkhorqanku. 11Chanta Galaadpi, Jabes llajtapi tiyakoj israelitakunaqa, filisteokuna Saúlpa ayanwan imatachus ruwasqankuta yacharqanku. 12Chaypacha tukuy wapu runakuna parlanakuspa, tukuy tutantin rerqanku, chanta Bet-sán llajtaman chayaspa, perqamanta Saúlpa ayanta, jinataj churinkunaj ayankuta ima orqhomorqanku. Jabes llajtaman apamuspataj, chaypi ruphacherqanku. 13Chantá tullunkunata Jabes llajtapi uj sach'a uraman p'ampaykorqanku. Chantá qanchis p'unchay junt'ata mana mikhuspa, ayunarqanku, llakikusqankuta yachayta qospa.

will be added

X\