1 SAMUEL 26

1Zif llajtapi tiyakojkunaqa Guibeaman rispa, Saulman willaykamorqanku: “Davidqa ch'in pampamanta inti llojsimuynejpi, Haquilá orqopi pakasqa kashan,” nispa. 2Chanta Saúlqa soldadokunamanta, aswan wapu kajkunamanta kinsa waranqata pusariykukuspa rerqa, Zif ch'in pampaman Davidta mask'aj. 3Saúltaj Haquilá orqopi jarakorqa. Chayqa ch'in pampamanta inti llojsimuynejpi, ñan patapi kashan. Davidtajrí ch'in pampapi kashaspa, reparakorqa Saúlqa chaypi payta mask'ashasqanta. 4Chayrayku Davidqa wateqajkunata kacharqa, yachanankupaj chetapunichus Saul chayamusqanta. 5Chanta Davidqa, maypichus Saúl jarasqa kasharqa, chaykama rispa qhawarqa, Saúlwan, Nerpa churin Abnerwan, maynejpichus puñushasqankuta. Abnerqa Saúlpa soldadonkunampa kamachejninku karqa. Saúlqa jara chawpipi jina puñusharqa, soldadonkunataj paypa muyuynimpi puñusharqanku. 6Chanta Davidqa hitita Ahimelecwan, Abisaiwan ima parlarqa. Abisaiqa Seruiajpa churin karqa, Joabpa wawqentaj. Davidtaj nerqa: –Pitaj noqawan Saul kashan chaykama rinman? nispa. Abisaitaj kuticherqa: –Noqa riysisqayki, nispa. 7Chay ch'isipacha Davidwan, Abisaiwan khuska jaraman rerqanku. Saulrí chay jara chawpipi puñusharqa. Uman chaynejpi lanzan pampaman sat'isqa kasharqa, Abnerwan, soldadonkunanwan imataj Saulpa muyuynimpi puñushallarqankutaj. 8Chantá Abisaiqa Davidman nerqa: –Dios Tata enemigoykita wañuchinaykipaj jaywaykusunki. Kunan kay kikin lanzallanwantaj Saúlta t'ojsirpaspa pampatawan tinkurpachisaj. Ujllata mana ñak'arichispa wañorpachisaj, nispa. 9Davidtajrí kuticherqa: –Ama wañuchiychu. Tata Diosqa juchachanqapuni, pichus Paypa ajllakusqan jatun kamachejta wañuchejtaqa. 10Tata Diospa sutinrayku jurani: Majk'ajchus wañunantaqa Tata Diosllamin yachan, wañunan tiempo chayamojtin, chayrí maqanakupi wañunanta. 11Tata Dios jark'awachun, Paypa ajllasqan jatun kamachejta wañuchinaymanta. Ajinaqa, uman chaypi kashan, chay lanzata, yaku uypulantawan oqhariy, chantá ripunachej, nispa. 12Chantá Davidqa lanzanta, uypulantawan Saúlpa sawnanan chaynejmanta oqharispa, iskayninku riporqanku. Mana pipis rikorqachu, nitaj imatapis repararqachu, nillataj pipis rijch'arerqachu, imaraykuchus Tata Dios paykunata sinch'ita puñurpanankuta ruwasqa. 13Chaymanta Davidqa chimpaman rispa, uj orqoman wicharerqa. Saul kasharqa chaymanta, David kasharqa chaykama karuña karqa. 14Chantá Davidqa Abnerman, soldadonkunanmanwan sinch'ita qhaparispa nerqa: –Abner, uyariway, nispa. Abnertaj kutichispa, nerqa: –Pitaj qan kanki jatun kamachita qhaparimunaykipajri? nispa. 15Davidtaj kuticherqa: –¿Manachu qanqa israelita soldadokunamanta aswan sumaj soldado kanki? ¿Imaraykutaj wiraqochiykita mana allinta qhawarqankichuri? Uj runa payta wañuchiyta munaspa jaraman yaykuykamorqa. 16Ruwasqaykeqa mana walejchu. Tata Diospa sutinrayku juraykichej. Qankunaqa wañuchisqa kanaykichejpaj jina kankichej, Tata Diospa ajllasqan jatun kamachejta mana allinta qhawasqaykichejrayku. Kunanqa jatun kamachejpa lanzanta, sawnanan chaynejpi yaku uypulantawan mask'ay ari. Tarinkichus. 17Chantá Saúl Davidpa kunkanta rejsiytawankama, nerqa: –Qanqa waway Davidsina kankeqa, nispa. Davidtaj kuticherqa: –Arí, wiraqochi kamachejníy, noqa kani. 18Jatun kamachejníy, ¿imapajtaj kamachiykita qhatiykachawankiri? ¿Imatataj ruwarqaykiri? Imataj juchayri? 19Wiraqochi kamachejníy, ama jina kaspa, kunan parlarikusqayta uyaririway. Tata Dioschus noqaj contraypi kanaykita nisorqa chayqa, Tata Dios qhespichiwachun, uywata ñak'aspa q'olachisqaytataj jap'ikuwachun. Runallamantachus kanman chayrí, Tata Diosqa paykunata sinchita ñak'arichichun. Paykunaqa Tata Diospa jallp'anmanta wijch'uwaspa, waj dioskunata yupaychanaman tanqashawanku. 20Noqaqa mana munaymanchu Tata Diosmanta karupi wañuyta. Israel suyuta kamachejqa pikita jina, chayrí orqopi yuthuta jina, wañuchinawampaj qhatiykachashawan, nispa. 21Saúltaj kuticherqa: –David wawáy. Noqa juchayoj kani. Uj wampu runa jina ruwaspa, may jatunta pantani. Chayrayku kunanqa kutimpuy. Manaña ima sajratapis ruwasqaykichu, imaraykuchus kunan mana wañuchiwaspa, jatumpaj qhawawasqaykita yachayta qowanki, nispa. 22Chanta David kuticherqa: –Kamachejníy, kayqa lanzayki, ujnin kaj kamachiyki apakapoj jamuchun. 23Tata Diostaj sapa ujman cheqan ruwasqanman jina, ch'uwa sonqoyoj kasqanman jina kutichipuchun. Tata Dios, wiraqochi kamachejniyta makiyman jaywakuwarqa chaypis, mana wañuchisuyta munarqanichu, imajtinchus qanqa Diospa ajllakusqan kanki. 24Imaynatachus kunan noqa kawsayniykita maypaj qhawarqani, ajinallatataj Tata Diosqa noqata maypaj qhawachun, waqaychawachuntaj tukuy llakiymanta, nispa. 25Chantá Saúl nerqa: –David wawáy, saminchasqa kay. Qanta, tukuy ima ruwasqaykipi allimpuni risonqa, nispa. Chaymanta Saúlqa wasinman kutiporqa, Davidtaj maymanchus rinanta ripullarqataj.

will be added

X\