1 SAMUEL 16

1Tata Diosqa Samuelta nerqa: –Mayk'ajkamataj Saulmanta llakikunkirí? Noqaqa Israel suyupi jatun kamachej kananmanta wijch'upuniña. Aceite apaykachanayki wajraman aceiteta churaspa, Belén llajtapi Jesej wasinman riy, imaraykuchus ujnin kaj churinta jatun kamachej kanampaj ajllaniña, nispa. 2Samueltajrí kuticherqa: –¿Imaynatataj riymanri? Saúl risqayta yachaspaqa, wañuchiwanqa, nispa. Chanta Tata Dios kuticherqa: –Uj malta wakata aysariykukuspa, niy: Tata Diosman uywata ñak'aspa q'olachinata jaywaj jamuni, nispa. 3Chantá uywa ñak'asqata q'olachispa jaywanaman Jeseta wajyay, Noqataj nisqayki imatachus ruwanaykita. Jatun kamachej kanampaj pitachus ajllasqayta, qan aceitewan jawinki, nispa. 4Samueltaj Tata Diospa kamachisqanta kikinta ruwarqa. Belenman chayashajtinñaqa, chay llajtamanta kurajkuna uj chhika mancharisqa taripaj llojsimuspa, Samuelta taporqanku: –Allin sonqowanchu jamushawayku? nispa. 5Samueltaj kuticherqa: –Arí. Jamushani Tata Diosman uywa ñak'asqata q'olachispa jaywaj. Wakichikuychej llimphupaj qhawasqa kanaykichejpaj, chantá noqawan khuska jamuychej Tata Diosman q'olachinata jaywaj, nispa. Chaymanta Samuelqa Jeseta, churinkunatawan llimphupaj qhawasqa kanankupaj ruwaytawan, Tata Diospaj q'olachinaman paykunata wajyarqa. 6Chayamojtinkutaj, Samuelqa Eliabta rikuspa, sonqompi nerqa: Kaychá kanqa Tata Diospa ajllasqan jatun kamachejqa, nispa. 7Tata Diostajrí nerqa: “Ama allin rijch'ayninta qhawaychu, nitaj sayaynintapis; mana Noqaqa payta ajllakunichu. Noqaqa mana runa jinachu qhawani. Runaqa ñawimpa rikusqallanta qhawan, Noqarí sonqota qhawani,” nispa. 8Chantá Jeseqa Abinadabta wajyaspa, Samuelman pusarqa. Samueltajri nerqa: –Nillataj paytapis Tata Diosqa ajllanchu, nispa. 9Chaymanta Isaíqa Samatañataj pusarqa; Samueltaj nerqa: –Manallataj paytapis Tata Diosqa ajllanchu, nispa. 10Jeseqa qanchis churinkunanta Samuelman pusarqa, Samueltaj nerqa ni mayqenta Tata Dios ajllasqanta. 11Chanta Samuelqa ujtawan tapullarqataj: –Manachu astawan churiykikuna tiyan? nispa. Jesetaj kuticherqa: –Uj aswan sullk'a kaj kanraj; payqa ovejakunata michishan, nispa. Samueltaj nerqa: –Payta pusachimuy. Pay manaraj chayamunankamaqa mana mikhoj tiyaykusunchu, nispa. 12Chantá Jeseqa payta wajyachimorqa. Chay waynaqa alajitu karqa, k'acha ñawiyoj, allin rijch'ayniyojtaj. Chantá Tata Diosqa Samuelta nerqa: –Kaymá chay ajllasqayqa; jatun kamachej kanampaj aceiteta paypa umanman jich'aykuy, nispa. 13Chaypachapacha Samuelqa aceiteyoj wajrata jap'ispa, wawqenkunaj rikunanta Davidpa umanman jich'aspa jawiykorqa. Chaymantapachataj Tata Diospa Espiritun Davidman jamorqa. Chanta Samuelqa Ramá llajtaman kutiporqa. 14Chaypacha Diospa Espiritun Saulmanta karunchakorqa, Tata Diospa kachamusqan uj millay espiritutaj payta ñak'arichisharqa. 15Saúlpa kamachinkunantajrí nerqanku: –Qhaway wiraqochíy, Diospa kachamusqan sajra espíritu qanta ñak'arichishasunki. 16Chayrayku noqaykuta kachawayku, arpa tocayta yachajta mask'amunaykuta, chay millay espíritu ñak'arichisojtin, arpata waqachispa sonqoykita tiyaykuchinampa, nispa. 17Saúltaj kamachinkunata nerqa: –Mask'ampuwaychej ari pillatapis sumajta arpa tocayta yachajta, pusampuwaychejtaj, nispa. 18Chanta ujnin kamachin nerqa: –Noqa yachani, Belén llajtapi Jesejpa ujnin churin arpata sumajta tocayta yachasqanta. Payqa maqanakunapajpis wapu, maychus kajta parlaj, allin rijch'ayniyoj, Tata Diostaj paywan kashan, nispa. 19Chaypacha Saúlqa Jeseman kacharqa kay jinata ninankupaj: “Ovejata michej churiyki Davidta kachamuway,” nispa. 20Jesetaj churin Davidta Saulman kacharqa. Chanta t'antata, uj bota vinota, uj chivota ima, burroman chajnaykuspa apachillarqataj. 21Ajinata Davidqa Saúlpa kamachinan wasiman chayarqa, chaypitaj Saulta sirvispa karqa. Saúlqa maytapuni Davidta munakorqa; armanta apaykachapojnin kanampajtaj payta churarqa. 22Chantá Saúl Jeseman willacherqa: “Davidta noqata sirvinawampaj qoway, imaraykuchus manchay allinman rijch'awan,” nispa. 23Ajinaqa Diospa kachamusqan millay espíritu Saulman jamojtinkama, Davidqa arpanta tocapoj. Arpata tocapojtin Saúlqa yuyayninman kutirej, walejyajtaj. Chay millay espiritutaj paymanta karunchakoj.

will be added

X\