1 PEDRO 4

1Cristoqa kay pachapi kawsashaspa, ñak'arerqa. Ajinallatataj qankunapis sonqoykichejpi wakichikuychej ñak'arinaykichejpaj, imaraykuchus cuerpompi ñak'arejqa juchawan kawsakuyta tukuchin. 2Ajinaqa kay pachapi kawsanankamaqa manaña aychaj sajra munayninman jinachu kawsan, manachayqa Diospa munayninman jina. 3May chhika unaytaña mana creejkunaj munasqankuta ruwarqankichej. Chaypacha purej kankichej millay kawsaypi, sajra munapayaypi, machakuykunapi, khuchiriospi, machaykuna fiestaspi, millay lantista yupaychaypi ima. 4Kunanrí paykunawan khuska sajra chinkay kawsaypi mana purejtiykichej, paykuna tapunakunku: Imataj kayri? nispa. Sajra runasta jina qhawasunkichej, qankunapajtaj sajrata rimanku. 5Paykunaqa chay imasmanta cuentata qonqanku Diosman, pichus wakichisqa kashan juzganampaj kawsajkunata, wañusqastawan, chayman. 6Chayrayku kunan wañusqaña kashanku, chaykunamampis evangelio willasqa karqa, Diosman jina espiritupi kawsayta atinankupaj, kay pachapi kawsashaspa juzgasqapis kankuman karqa runasman jina. 7Tukuy imaj tukukuynin qayllapiña kashan. Chayrayku maychus kajta ruwaspa kawsakuychej, amataj aychaj sajra munayninwan atipachikuychejchu, Diosmanta mañakuyta atinaykichejpaj. 8Tukuy imamanta astawanqa qankunapura tukuy sonqo munanakuychej, imaraykuchus munakoyqa ashkha juchata p'ampan. 9Qankunapura wasiykichejman wajyarinakuychej, mana thutuspalla. 10Sapa ujniykichejman Diosqa ruwanapaj uj atiyta qosorqachej, qankunataj chaywan ujkunata sirviychej. Sumaj mayordomos jina Diospa imaymana k'acha yanapayninwan wajkunata yanapaychej. 11Pichus ruwanapaj atiyman jina parlajqa, imatachus Dios parlan, chaytapuni parlachun. Pichus sirvejqa Diospa kallpa qosqanman jina sirvichun, tukuy imapi Dios Tata jatunchasqa kanampaj Jesucristonejta. Paypaj kachun jatunchasqa kaywan, tukuy atiywan wiñaypa wiñaynintinkama. Ajina kachun. 12Munasqa hermanos, ama t'ukuychejchu nina larwaypi jina ñak'arichisqa kasqaykichejmanta, manapis chay jamunanta yuyawajchejchu jina. 13Astawanqa kusikuychej Cristoj ñak'arisqampi Paywan khuska ñak'arisqaykichejmanta. Ajinaqa Cristo jatun kaynimpi rikhurimojtin, qankunaqa may kusiywan junt'asqa kankichej. 14Cristoj sutinraykuchus k'umuykachachisqa kankichej chayqa, kusikuyniyoj kankichej, imaraykuchus Diospa jatun atiyniyoj Espíritun qankunapi tiyakushan. 15Ama mayqenniykichejpis runa wañuchis kaychejchu, nitaj suwaspis. Amataj sajrata ruwaychejchu, nillataj wajkunaj imasninmampis sat'ikuychejchu, ama chay imasmanta ñak'arichisqa kanaykichejpaj. 16Sichus pipis Cristopi creej kasqanrayku ñak'arichisqa kanman chayqa, ama p'enqakuchunchu, astawanqa chaynejta Diosta jatunchachun Cristojta kasqanrayku. 17Diospa wawasnimpaj juicio p'unchay chayamunña. Juiciochus noqanchejmanta qallarikun chayqa, Diospa evangelionta mana kasojkunaqa imapitaj tukukonqankuri? 18Cheqan runachus ñak'ayllata salvakun chayqa, Diosta mana manchachikoj runas, juchasapaspis, imapitaj rikhurenqankuri? 19Ajinaqa Diospa munayninman jina ñak'arichisqa kajkunaqa, almankuta jaywachunku nisqanta junt'aj, kaj chhikata ruwaj Diosman. Chantá allin kajta ruwallachunkupuni.

will be added

X\