1 PEDRO 1

1Noqa Pedroqa Jesucristoj apostolnin kay cartata qhelqamuni llajtasninkumanta qharqosqa hermanosman, pikunachus ch'eqerasqa kashanku Pontopi, Galaciapi, Capadociapi, Asiapi, Bitiniapi ima, chaykunaman. 2Dios Tataqa qankunata ajllakusorqachej ñawpajmantapacha, jatun yachaynimpi Espíritu Santonejta qankunata juchamanta t'aqaspa. Payqa churasorqachej Jesucristota kasunaykichejpaj, yawarninwantaj llimphuchasqa kanaykichejpaj. Diospa qhasilla k'acha yanapaynin, sonqo tiyaykuytaj qankunapi ashkhayachun. 3Yupaychasqa kachun Dios, Señorninchej Jesucristoj Tatan. Payqa jatun khuyakuyninrayku watejmanta nacechiwarqanchej, Jesucristota wañusqasmanta kawsarichisqannejta, wiñay kusiy kawsayta suyananchejpaj. 4Payqa churallawanchejtaj mana ismoj, mana ch'ichichasqa, nitaj chinkapoj herenciata jap'inanchejpaj. Chayqa janaj pachapi qankunapaj waqaychasqa kashan. 5Creesqaykichejrayku qankunapis Diospa atiyninwan waqaychasqallataj kankichej, chay jamoj salvacionta taripanaykichejpaj, mayqenchus wakichisqa kashan qhepa p'unchaykunapi rikuchisqa kanampaj, chayta. 6Chayrayku, qankunaqa mayta kusikunkichej, kunanqa tukuy imaymana llakiykunawan pisi tiempopaj ñak'arinaykichej kajtimpis. 7Chay llakiykunaqa jamun creesqaykichej cheqachus manachus kasqan yachakunampaj, chaytaj kanqa jatunchasqa, yupaychasqa, allimpaj qhawasqataj Jesucristo kanampaj kutimuynimpi. Creesqaykichejqa qorimanta nisqaqa aswan valorniyoj, imaraykuchus qoreqa ninawan ch'uwachasqa kaspapis tukukuyniyoj, creesqaykichejtajrí mana. 8Jesucristotaqa munakunkichej mana rikuspalla. Kunampis mana Payta rikuspalla, Paypi creellankichejtaj, kusikunkichejtaj may jatun mana niy atina kusiywan. 9Kusikullankichejtaj, imaraykuchus yachankichej almasniykichej salvasqa kasqanta. Chaytapuni jap'ej risharqankichej. 10Diospa qhasilla k'acha yanapaynin qankunaman jamunan karqa, chay salvacionmanta sut'inchaj profetasqa tapukorqanku, k'uchi k'uchillatataj watorqanku. 11Cristoj Espiritonqa paykunapi kaspa, sut'incharqa Cristo ñak'arinanmanta, qhepatataj jatunchasqa kananmantawan. Paykunataj mayta watorqanku yachanankupaj mayk'ajtachus, imaynamantatajchus chay imas kananta. 12Diosrí paykunaman sut'incharqa chay imas mana paykunapajchu kasqanta, manachayqa qankunapaj kasqanta. Paykuna imatachus willarqanku, chayllataj qankunamampis willasqa karqa, pikunachus qankunaman evangeliota willarqanku janaj pachamanta kachamusqa Espíritu Santoj atiyninwan, chaykunanejta. Chay imastaqa angelespis anchatapuni rikuyta munallankutaj. 13Chayrayku, allinta yuyayniykichejta wakichiychej, aychaykichejpa munaynintataj atipaychej. Diospa qhasilla k'acha yanapayninta tukuy sonqo suyaychej, mana iskayrayaspa, mayqentachus qankunaman qosqa kanqa Jesuspa rikhurimuynimpi, chayta. 14Kasukoj wawas jina kaychej, amataj sajra munayniykichejman jinachu kawsaychej, mayqenchus qankunapi karqa manaraj Diosta rejsishajtiykichej, chayman jinaqa. 15Qankunata wajyaj Diosqa may santomin; ajinallatataj qankunapis juchamanta t'aqasqa santos kaychej tukuy kawsakuyniykichejpi. 16Diosmanta Qhelqasqapi Diosqa nin: Juchamanta t'aqasqa santos kaychej, imaraykuchus Noqa may santomin kani, nispa. 17Sichus Diospa sutinta oqharispa tataykichejpaj rejsikapunkichej chayqa, forasteros jina kaypi kawsanaykichejkama Payta manchachikuspa kawsaychej. Payqa sapa runata juzgan ruwasqanman jina, ni piman kutikuspa. 18Yachankichej jina, Diosqa preciowan kacharichisorqachej chay qhasi manakaj kawsaymanta, mayqentachus tatasniykichejmanta jap'erqankichej, chaymanta. Chay precioqa mana tukukoj imaschu karqa; mana qorichu, nitaj qolqechu karqa. 19Astawanqa, Cristoj qhapaj yawarninwan kacharichisqa kankichej, mana ch'ichiyoj, mana iman imanasqa corderoj yawarninwan jina. 20Cristo chaypaj ajllasqa karqa manaraj kay pacha ruwasqa kashajtin. Chantá kay qhepa p'unchaykunallapi rikuchisqa karqa qankunaj allinniykichejpaj. 21Paynejta qankunaqa Diospi creenkichej, pichus Cristota wañusqasmanta kawsarichispa jatuncharqa, chaynejta, ajinamanta Diospi atienekuspa, suyakunaykichejpaj. 22Kunanqa qankuna cheqa kajta kasuspa, almasniykichejta llimphucharqankichej, hermanosniykichejta ch'uwa sonqowan munakunaykichejpaj mana llullakuspa. Kunantaj astawan astawan munanakuychej tukuy sonqowan. 23Qankunaqa watejmanta nacesqa kankichej, manataj ismoj mujumantachu, manachayqa mana ismojmanta, chaytaj Diospa wiñaypaj kawsaj Simi Nisqannejta. 24Diosmanta Qhelqasqapi nin: Runaqa qhora jina, tukuy jatun kaynintaj qhora t'ika jinalla. Qhoraqa ch'akipun, t'ikataj t'akakun. 25Señorpa Simi Nisqanrí wiñaynintimpaj kanqa, nispa. Kaymin chay willayqa, mayqenchus qankunaman willasqa karqa, chay.

will be added

X\