1 REYES 7

1Chantá Salomonqa kamachinan wasita ruwachikorqa, chunka kinsayoj watapi junt'asqata tukucherqataj. 2Kikillantaj “Líbano monte” nisqa wasitapis ruwachillarqataj, chay wasitaj kay jina karqa: Sayt'unman tawa chunka phishqayoj metro, anchonman iskay chunka iskayniyoj metro khuskanniyoj, sayayninmantaj chunka kinsayoj metro khuskanniyoj. Tawa sinru cedro kurkusmanta sayantakuna patapi sayachisqa karqa, patampitaj churasqa karqa cedro kurkus. 3Chay kurkukunaqa tawa chunka phishqayoj karqanku, kinsa t'aqasman rak'isqa, sapa t'aqapitaj chunka phishqayoj kurkus karqa, sayantas patapi churasqa. Chay kurkukuna patataj cedro tablawan qhatasqa karqa. 4Kinsa sinru ventanakuna karqa, sapa ujtaj ujwan qhawanakusaj karqanku. 5Tukuynin punkukuna tawa esquinayoj karqanku, kinsa sinru ventanakunataj sapa uj ujninwan qhawanakusaj karqanku. 6Chay wasej ñawpaqempi uj corredorta sayantakunayojta ruwallarqataj; chayqa sayt'unman karqa iskay chunka iskayniyoj metro khuskannin, anchonmantaj chunka kinsayoj metro khuskannin. Chaypa aswan ñawpaqempitaj waj corredorpis kallarqataj. 7Ruwallarqataj chheqan ruwana wasita, maypichus jatun kamachej chheqanchayta ruwanampaj. Cedro maderawantaj pampamantapacha pakama tablaykucherqa. 8Salomonpa tiyakunan waseqa wasa ladompi patioyoj karqa, chaypis kikin ruwasqallataj karqa. Salomonqa Faraonpa ususimpaj, mayqenchus paypa warmin karqa, chaypajpis uj wasita ruwachiporqa chay corredorta kikillantataj. 9Chay ruwachisqan wasikunaqa sumaj k'acha rumikunawampuni ruwasqa karqanku, k'utusqa, ch'eqosqataj medidanman jina, sumaj llup'ita jawan cimientomantapacha tukukuyninkama, jinallataj jawa perqamanta ukhu jatun patiokama. 10Chay wasej rumi cimientonkunaqa sumaj jatuchaj k'achitu rumikunamanta karqa, wakinkunaqa tawa metros khuskannin, wakintaj kinsa metros khuskan kurajniyoj. 11Chay perqaj patampipis ajina k'acha rumikunawan ruwasqallataj karqa medidaman jina k'utusqa, cedromanta kurkuswan ima. 12Jatun patioj perqantataj ch'eqosqa rumikunawan kinsa sinruta muyuykucherqa, patanmantaj cedro tablasta uj sinruta churaykorqa, imaynatachus Tata Diospa Templon ukhu patiopi ruwarqa, Temploj corredornimpipis, ajinallatataj. 13Chantá jatun kamachej Salomonqa Tiromanta Hiram-abi sutiyoj runata pusachimorqa. 14Hiram-abiqa Neftalí ayllumanta uj viudaj churin karqa, tatantaj Tiromanta karqa; payqa broncemanta tukuy imakunata ruwayta yachaj. Jinallataj Hiram-abipis sumaj yachayniyoj, yuyayniyojtaj karqa, broncemanta tukuy ima ruwanata ruwanampaj. Paytaj rey Salomonpaman jamuspa, tukuy imakunata paypaj ruwarqa. 15Bronceta unuyachiytawan, iskay sayantakunata ruwarqa; chaykunaqa sapa uj sayayninman pusaj metroyoj karqa, rakhunmantaj phishqa metro khuskannin karqa. 16Ruwallarqataj broncemanta iskay pilluta jina, chay sayantakunaj patanman churanankupaj; sapa pilluqa phatunman iskay metro uj cuarta kurajniyoj karqa. 17Ruwallarqataj iskay simp'asqa malla jina, chay sayantakunaj patankupi pilluta muyuykuchinampaj, uj malla simpàsqa sapa uj pillupaj. 18Ruwallarqataj iskay sinru granadata chay mallaj simp'asqa muyuynimpi churanampaj, chaykunawan sayantakunaj patapi pilluta k'achanchanapaj. Kikillantataj ruwarqa chay uj kaj sayantapajpis. 19Chay sayantakunajpa puntampi pilluqa lirio t'ika jina karqa, phatunmantaj iskay metroyoj karqa. 20Iskaynin sayantaspa pillun patampi aswan rakhu muyuynimpi, mallaj simp'asqa qayllampi iskay pachaj granadakuna sapa ujnimpi iskay sinruskama muyurisqa karqa. 21Chay sayantakunatataj Hiram-abiqa churarqa Diospa Templompa corredorninman. Paña ladopi kaj sayantata sayachispataj, Jaquín nispa suticharqa; lloq'e ladopi kajta sayachispa, Bóaz nispa suticharqa. 22Chay sayantakunajpa patankupi lirio t'ikaman rijch'akoj ruwasqata churarqa. Ajinata tukukorqa sayantakunata sayacheyqa. 23Hiram-abiqa broncemanta unuyachispa, ruwarqa uj jatun yaku churanata, chaytaj muyu karqa. Uj kantunmanta ujnin kantunkama tawa metro khuskannin karqa, sayayninmantaj iskay metro cuarta kurajniyoj karqa, tukuy muyuynintaj chunka kinsayoj metro khuskannin karqa. 24Chay jatun yaku churanaj simin urapitaj muyurisqa karqa lakayoteman rijch'asqa broncemanta ruwasqa moroq'o jina. Sapa khuskan metropi chunka karqa iskay sinrupi, chaykunataj jatun yaku churanawan khuska ujlla jich'asqa karqa. 25Chayqa chunka iskayniyoj bronce torokuna patapi churasqa karqa; kinsa qhawasharqanku pata ladota, kinsataj ura ladota, kinsataj inti llojsimuy ladota, kinsataj inti yaykuy ladota. Chay yaku churanaqa chaykunaj patankupi churasqa karqa. Ajinamanta chay torokunajpa chakinku ukhu ladopi karqanku. 26Yaku churanaqa phatunman uj t'ajllu karqa, kantuntaj rijch'akorqa lirioj t'ikanman, chaymantaj yaykoj tawa chunka tawayoj waranqa litro yaku. 27Chantapis ruwallarqataj broncemanta chunka chukukunata, sapa ujtaj sayt'unman uj metro tawa cuartayoj karqa; anchonman kikillantaj karqa, sayayninmantaj uj metro iskay cuartayoj karqa. 28Chay chukukunaqa kay jina ruwasqa karqanku: Chawpimpi p'alta tablayoj jina, marcosniyoj jina k'achanchasqa karqa. 29Chay marcospa chawpimpi p'altampitaj ruwasqa karqa, wakenqa leonkunaman rijch'akoj, wakentaj torokunaman, wakinri angelkunaman. Chay marcospa urampi, patanejpiwan, jinallataj leonkunajpa, torokunajpa urampi patanejpiwan guirnalda jina warawakuna churasqa karqa. 30Sapa chukoqa broncemanta tawa ruedakunayoj karqa, imapichus muyunanku broncellamantataj karqa. Chay yaku churanaj tawantin sapa esquina urapi broncemanta jap'inayoj karqa, chaykunataj t'ikanchasqa karqanku, chaymanta jap'ispa apaykachanankupaj. 31Yaku churanaj simenqa chay jap'ichinakunamanta pataman khuskan metro jinalla karqa. Simintaj muyu karqa; p'ukunmanta pataman kinsa cuarta kurajniyoj karqa. Kallarqataj simimpi warawas ruwasqa, chaykunataj tawa esquinayoj karqanku, mana muyuschu. 32Tawantin ruedaqa marcokunaj urampi karqa, imapichus muyunantaj kikin chukullamantataj llojsimorqa. Sapa uj ruedajta sayayninman kinsa cuarta t'ajlluyoj jina karqa. 33Ruedakunataj rijch'akorqa carreta ruedakunaman. Imapichus muyunampis, radiopis, cubopis, cinchon ima, tukuyninku broncellamantapuni ruwasqa karqanku. 34Tawantin esquinapi jap'inapaj ninrinpis chukuwan ujlla karqanku. 35Chukoj patampitaj uj juch'uy p'alta muyu karqa; chayqa phatunman cuarta kurajniyoj karqa. Chay chukoj patampitaj k'achanchasqa marcoqa tablerowan ima chay chukuwanqa ujlla karqa. 36Chay marcokunapi tablerokunapi ima, Hiram-abiqa lijrakunayoj querubinkunata t'illmerqa, leonekunata, palmerakunatawan, campoj kasqanman jina, chaykunaj muyuynimpitaj waj k'achanchanatawan churarqa. 37Chay jinamanta chay chunka chukukunaqa broncemanta unuyachispa kikimpurata ruwarqa, chhikachajkamata, kikin k'achanchasqallatataj. 38Broncemanta chunka yaku churanata ruwallarqataj. Sapa uj yaku churana uj metro tawa cuartayoj jina karqa, chaymantaj yakoqa pusaj pachaj pusaj chunkayoj litros junt'aj, sapa ujnintaj chunkantin chuku pataman ujtakama churasqa karqa. 39Temploj paña ladonman phishqa chukuta churarqa, uj phishqa chukutataj lloq'e ladonman. Chay jatun yaku churanatataj Temploj paña ladonman churarqa, ura lado inti llojsimuynejman. 40Jinallatataj Hiram-abiqa ruwarqa mankakunata, lampakunata, yuritukunatawan. Ajinata tukuy imata ruwayta tukucherqa Tata Diospa Templompaj, 41Salomonpa nisqanman jina: Iskay sayantakunata, pata puntampi muyu pillukunata, k'achanchanapaj iskaynin simp'asqa mallatawan, chay iskaynin muyu pillukunata qhataykunampaj. 42Ruwallarqataj tawa pachaj granadakunata chay iskaynin simp'asqa mallakunapaj, iskay sinruta sapa simp'asqa mallapaj, chaykunawan sayantakunajpa patampi muyu pilluta k'achanchanankupaj. 43Ruwallarqataj chunkantin chukuta, chunka yaku churanatawan. 44Ruwallarqataj chay jatun yaku churanata, urampi kasharqanku, chay chunka iskayniyoj torokunatawan. 45Ruwallarqataj mankakunata, lampakunata, yuritukunatawan. Chay tukuy imakunata Hiram-abiqa broncemanta ruwarqa Tata Diospa Templompaj. 46Chay tukuyta jatun kamacheqa Jordán pampanejpi unuyachispa ruwacherqa, Sucotwan, Saretanwan tinkuypi, chaypi sumaj llink'i jallp'a kasqanrayku. 47Salomonqa manataj pesacherqachu broncemanta imakunapis mashkhachus kasqanta, manchay ashkhapuni kasqanrayku. 48Chantá Salomonqa tukuy imakunata ruwachillarqataj Tata Diospa Templompaj qorimanta uj altarta, qorimanta uj mesatawan chayman churanankupaj Tata Diospaj t'aqasqa t'antakunata. 49Qorimanta chunka k'anchanakunata ruwacherqa, phishqata paña ladoman, phishqatataj lloq'e ladoman churanankupaj Diospaj t'aqasqa Aswan Santo cheqaj ñawpaqempi. Qorimanta ruwachillarqataj t'ikakunatawan, lamparakunatawan, tenazakunatawan. 50Ajinallatataj ruwacherqa yurukunata, pábilo k'utunakunata, tazakunata, juch'uy cucharakunata, incienso q'oshñichinakunata ima. Chay tukuynin qori puromanta ruwasqa karqanku. Diospaj t'aqasqa Aswan Santo cheqaj punkuspa jap'ichinankunanpis qorillamantataj karqa, jinallataj Temploj punkumpa jap'ichinankunampis. 51Ajinata jatun kamachej Salomonqa Tata Diospa Templompaj tukuy ruwakunata tukucherqa. Chaymantataj Salomonqa Diospa Templonman apamorqa, tatan David tukuy imakunatachus Tata Diospaj t'aqasqanta, chay qolqeta, qoritawan. Chay tukuy imakunataqa Tata Diospa Templompi valorniyoj imakunata waqaychana cuartoman churarqa.

will be added

X\