1 Israelitakuna, Egipto suyumanta llojsimpusqankumanta tawa pachaj pusaj chunkayoj watakunaña kashajtin, Salomontaj Israel suyupi tawa watakunataña kamachishajtin, Ziv nisqa iskay kaj killapi Salomonqa Tata Diospa Templonta ruwachiyta qallarerqa. 2 Salomonqa chay Templota Tata Diospaj ruwacherqa, chaytaj kay jina karqa: Sayt'unman iskay chunka qanchisniyoj metro, anchonman jisq'on metro, sayayninmantaj chunka kinsayoj metro khuskannin. 3 Diospa Templompa ñawpaqempi corredorqa anchonman jisq'on metroyoj karqa, Temploj anchon kikillantaj. Chay Temploj ñawpaqenqa anchonman tawa metro khuskannin karqa. 4 Temploj ventanakunata rejillayojta ruwacherqa. 5 Temploj puraj lado muyuynimpi, Diospaj t'aqasqa aswan santo cheqapiwan cuartokunata muyurisqata ruwacherqa, Temploj perqallanmantaj k'askasqata. 6 Ura kaj pisoqa iskay metros uj cuarta kurajniyoj anchonman karqa; chawpi pisotaj iskay metros kinsa cuarta kurajniyoj karqa, pata kaj pisotaj kinsa metros iskay t'ajlluyoj karqa. Chayqa jawannejman juch'uyachisqa karqa, Temploj perqanta jatuchaj k'aspista churaspa ama jusk'uranankupaj. 7 Chay wasita ruwashajtinku, fierromanta mana ima herramientaj sonajllapis uyarikorqachu, ni martillokuna, ni hachakuna, imaraykuchus chay tukuy rumikunata ruwasqallataña apamorqanku, churaykunatapacha. 8 Ura kaj pisoj punkonqa Temploj paña ladompi karqa; chaymanta iskay kaj, kinsa kaj pisomampis wicharinapajqa muyu escalera karqa. 9 Salomonqa Temploj perqakunanta tukuychaytawan, chay wasi ukhoj patanta warawakunayoj cedro tablakunawan qhataykorqa. 10 Ruwallarqataj cuartokunata, Temploj tukuynin muyurisqata. Chay cuartokunajpa sayaynin iskay metro uj cuarta kurajniyoj karqa, chaykunataj cedro k'aspikuwan Temploj perqanman jap'ichisqa karqanku. 11 Chaymantaqa Tata Diosqa Salomonman parlaspa, nerqa: 12 “Kunanqa qan kay wasita ruwashanki; sichus yachachisqayman jina purinki, nisqayniyman jinataj ruwanki, kamachisqaytataj kasunki chayqa, Noqapis junt'allasqaykitaj tatayki Davidman qosaj nisqayta. 13 Israelitakunajpa chawpinkupi tiyakusaj, manataj Israel aylluytaqa saqerpayasajchu,” nispa. 14 Ajinata Salomonqa Templota ruwayta tukucherqa. 15 Temploj ukhuntataj cedro tablaswan tablayaykucherqa tukuynin perqakunanta, pampamanta pata k'aspikunaman taripanankama. Pampantapis pinomanta tablaswan mast'aykorqa. 16 Ajinallatataj Temploj ukhu k'uchu ladota t'aqarqa cedro tablaswan pampamanta patakama, chaytaj jisq'on metroyoj karqa; chayqa karqa Diospaj t'aqasqa Aswan Santo nisqa cheqa. 17 Diospaj t'aqasqa santo cheqaqa sayt'unman chunka pusajniyoj metroyoj karqa; chay kasharqa Diospaj t'aqasqa Aswan Santo cheqaj ñawpaqempi. 18 Chay wasi ukhuqa cedro tablawan tableasqa k'acha llajllasqa karqa, k'ita lakayoteman rijch'asqa, chanta t'ika muk'ituman rijch'asqa warawakunawan ima. Tukuynin cedro tablawan tableasqa kaspaqa, mana ima rumipis rikukorqachu. 19 Temploj ukhumpitaj wakicherqa Diospaj t'aqasqa Aswan Santo cheqata, Diospa trato ruwasqan arcata chayman churanampaj. 20 Diospaj t'aqasqa Aswan Santo cheqaqa sayayninman, anchonman, sayt'unmampis jisq'on metroyoj karqa, chaypa ñawpaqempitaj Salomonqa ruwarqa cedromanta uj altarta, chaytataj sumaj qoriwan lluch'iykorqa. 21 Ajinata Salomonqa Temploj tukuy ukhunta qoriwan lluch'iykorqa. Diospaj t'aqasqa Aswan Santo cheqajpa ñawpaqenmantaj qorimanta cadenaswan telaykorqa. 22 Tukuynin Templota patamanta urakama qoriwan lluch'iykorqa. Ajinallatataj ruwarqa Diospaj t'aqasqa Aswan Santo cheqajpa ñawpaqempi kaj altartapis. 23 Diospaj t'aqasqa Aswan Santo cheqapaj ruwachillarqataj iskay querubin nisqa kawsashaj lijrayojkunata olivo k'aspimanta, sapa ujtaj sayayninman tawa metro khuskanniyoj karqa. 24 Querubinpa sapa uj lijrantaj iskay metros cuarta kurajniyoj karqa; ajinamanta ujnin kaj puntanmanta ujnin kajpa puntankamaqa lijranqa tawa metro khuskanniyoj karqa. 25 Ajinallatataj chay ujnin kaj querubinpis tawa metros khuskanniyoj karqa; chaykunapis kikinkamallataj ruwasqa karqanku. 26 Ajinaqa iskaynimpa sayayninku tawa metro khuskanniyoj karqa. 27 Chaykunata Diospaj t'aqasqa Aswan Santo cheqa ukhuman churarqa. Lijrankunatataj sapa ujnimpata aysarparisqa karqanku. Ujnimpata uj lado lijranqa perqaman chayarqa, chay ujnimpa lijrantaj uj lado perqaman chayarqa. Ajinamanta iskayninkoj lijrankunaqa khuskan wasipi tinkunakorqanku lijrapura. 28 Chay querubinkunataqa qorillawantaj lluch'iykorqa. 29 Chay tukuy perqankunapi muyurisqata t'illmirarqa querubinkunata, palmerakunata, t'ika muk'ukunatawan. Ukhu kaj cuartopi, jawa kaj cuartopipis ajinallatataj ruwarqa. 30 Temploj pampantataj qoriwan lluch'erqa jawannejta ukhunnejtapis. 31 Diospaj t'aqasqa Aswan Santo cheqapajqa olivo k'aspimanta ruwarqa punkunta; punku pata k'aspinkuna, sayantankunapis phishqa esquinayoj karqa. 32 Iskaynin punkuqa olivo maderamanta karqa, chaykunapitaj t'illmerqa querubinkunaman rijch'akojta, palmerakunata, t'ikakunatawan, chay tukuynintataj qoriwan lluch'iykorqa. 33 Jinallatataj olivo k'aspimanta tawa esquinayoj sayantasta Temploj punkunman yaykunapaj ruwacherqa. 34 Chantá iskaynin punkukuna pino maderamanta karqa, chay punkukunataj kikillampi muyurej kanku mayqen ladomampis. 35 Kikin punkukunapitaj t'illmerqa querubinkunaman rijch'asqakunata, palmerakunata, t'ika muk'ukunatawan, chaykunatapis sillp'a qoriwan lluch'iykorqa. 36 Ruwallarqataj ukhu patiopi uj perqata kinsa sinruta ch'eqosqa rumikunawan, chay patanmantaj uj sinruta cedro tablawan muyuykucherqa. 37 Tawa watataña Salomón kamachishajtin, Zif nisqa chay killapi, Temploj ñawpaj kaj cimientonkunata churayta qallarerqanku. 38 Chunka ujniyoj watastaña kamachishajtintaj, Bul nisqa pusaj kaj killapi, tukuy imakunanta ruwayta tukorqanku. Salomonqa qanchis watapi chay Templota ruwacherqa.
