1 Israelitaswan sirioswanqa kinsa watasta mana maqanakorqankuchu. 2 Jinataj kinsa watanman, Judamanta rey Josafatqa Israelpa reyninta watukoj urayk'orqa. 3 Israelmanta reytaj kamachisninta nerqa: Manachu yachankichej Galaadmanta Ramotqa noqanchejpata kasqanta? Noqanchejtajrí mana imatapis ruwashanchejchu siriospa makinkumanta qhechukapunanchejpaj, nispa. 4 Chantá Josafatta taporqa: Munariwajchu noqawan jamuyta Galaadmanta Ramotpa contrampi maqanakoj? nispa. Josafattaj Israelpa reyninman kuticherqa: Noqaqa qan jinallataj kani, soldadosniypis soldadosniyki jina, caballosniypis caballosniyki jinallataj, nispa. 5 Chay jawataj Josafatqa Israelpa reyninta nerqa: Chaywampis mañarikuyki Tata Diosta ñawpajta tapurinaykita, nispa. 6 Chantá Israelpa reynenqa tukuynin profetasta tantaykorqa, tawa pachajta jina, chaykunamantaj nerqa: Galaadmanta Ramotpa contrampi risajchu maqanakoj, amachu? nispa. Paykunataj nerqanku: Rillay, imaraykuchus Señorqa reypa makinman chay llajtata jaywaykonqa, nispa. 7 Josafattaj nerqa: Kaypi Tata Diospa waj profetan kanrajchu, paynejta tapurichinapaj? nispa. 8 Josafatmantaj Israelpa reynenqa kuticherqa: Arí, uj kanraj, paynejta Tata Diosta tapurinapaj, Imlaj churin Micaías sutiyoj. Chaywampis payta noqaqa chejnini, manapuni jayk'ajpis allin kajta sut'inchawasqanrayku, manachayqa sajrallatapuni, nispa. Josafattaj nerqa: Ama jinata parlaychu, nispa. 9 Chantá Israelmanta reyqa ujnin kamachinta wajyaspa, nerqa: Imlaj churin Micaiasta usqhayllata pusamuway, nispa. 10 Israelmanta reywan, Judamanta rey Josafatwan sapa ujninku kamachina tiyanankupi tiyasharqanku rey p'achasninkuwan p'achallisqas, Samaria llajtaman yaykuna plazapi, tukuynin profetastaj sut'inchasharqanku paykunaj ñawpaqenkupi. 11 Chaypacha Quenaanaj churin Sedequías fierromanta wajrasta ruwakusqa, nerqataj jatunmanta: Tata Diosqa ajinata nin: Kaykunawan siriostaqa wajranki tukuchinaykikama, nispa. 12 Tukuynin profetastaj ajinallatapuni sut'inchasharqanku: Galaadmanta Ramotman riy, allintaj risonqa, imaraykuchus Tata Diosqa reypa makinman chay llajtata jaywaykonqa, nispa. 13 Pitachus kacharqanku Micaiasta wajyamunampaj, chay runaqa Micaiasta nerqa: Chay tukuynin profetas uj similla reyman sut'inchanku allin imasllatapuni. Qampis paykuna jinallataj allinta sumaj imasta sut'inchay, nispa. 14 Micaiastajrí nerqa: Tata Diospa sutinrayku jurani: Imatachá Pay niwanqa, chayllata noqaqa nisaj, nispa. 15 Payqa reypaman jamorqa, reytaj payta nerqa: Micaías, Galaadmanta Ramot llajtaj contrampi maqanakoj risqaykuchu, amachu? nispa. Paytaj kutichispa, nerqa: Wichariy, allintaj risonqa. Tata Diosqa reypa makinman chay llajtata jaywaykonqa, nispa. 16 Ahabtajrí payta nerqa: Mashkha kutitataj nisqayki Tata Diospa sutimpi cheqa kajllata ninawaykitari? nispa. 17 Chantá Micaías nerqa: Noqaqa israelitasta rikorqani orqospi ch'eqerasqasta, mana michejniyoj ovejasta jina. Tata Diostaj nerqa: Kaykunajtaqa mana dueñonku kanchu; sapa ujninku wasinkuman allillanta ripuchunku, nispa. 18 Israelmanta reytaj Josafatta nerqa: Manachu noqaqa nerqaykipuni, ni ima allintapis noqapajqa pay sut'inchananta, manachayqa sajrallatapuni? nispa. 19 Micaiasqa nillarqataj: Tata Diospa nisqanta uyariy ari: Noqaqa Tata Diosta rikorqani kamachina tiyanampi tiyasqata, janaj pachamanta tukuynin angelestataj Paywan khuska kashajta, paña makinnejpi, lloq'e makinnejpipis. 20 Tata Diostaj nerqa: Pitaj Ahabta ch'awkiyaspa, pusanman Galaadmanta Ramotpa contrampi maqanakoj rispa urmanampaj? nispa. Ujnin uj jinamanta nerqa, ujtaj uj jinamantañataj nerqa. 21 Chantá uj espíritu Tata Diospa ñawpaqempi sayaykuspa, nerqa: Noqa payta pusarisaj, nispa. Tata Diostaj tapurerqa: Imaynapitaj pusawajri? nispa. 22 Chay espiritutaj nerqa: Noqaqa rispa, reypa tukuynin profetasnimpa siminkupi llullata sut'inchasaj, nispa. Tata Diostaj nerqa: Qanqa atinki pusayta; rispa, ajinata ruwamuy, nispa. 23 Kunantaj Tata Diosqa llulla espirituta tukuynin profetasniykej siminman churan, Paytaj ninña qampaj mana allin kananta, nispa nerqa Micaiasqa. 24 Chantaqa Quenaanaj churin Sedequiasqa chimpaykuytawan, Micaiasta uj lado uyampi laq'aspa nerqa: Maynejtataj Tata Diospa Espíritun noqamanta llojserqa qanman parlasunampajri? nispa. 25 Micaiastaj kuticherqa: Chayta yachanki jaqay p'unchaypi, maypachachus wasimanta wasi pakakuspa ayqeykachanki chaypacha, nispa. 26 Chantá Israelmanta reyqa nerqa: Micaiasta jap'ispa, presota apaychej llajtata kamachi Amonpaman, reypa churin Joaspamanwan. 27 Ninkitaj: Reyqa ajinata nisunki: Kaytaqa carcelman churaykuychej, chaypitaj pisi t'antawan, pisi yakuwantaj kachiychej, allimpi noqa kutimunaykama, nispa. 28 Micaiastajrí nerqa: Sichus allimpi kutimunki chayqa, Tata Dios manamin noqaj simiynejtachu parlarqa, nispa. 29 Chantá Israelmanta reyqa Judamanta rey Josafatwan khuska rerqanku Galaadpi Ramot llajtaj contrampi maqanakoj. 30 Israelmanta rey Ahabqa Josafatta nerqa: Noqaqa waj p'achata churakuspa maqanakuman yaykusaj; qantajrí kikin rey p'achallaykiwan yaykuy, nispa. Israelpa reynintaj waj p'achata churaykukuspa, maqanakuman yaykorqa. 31 Chaypacha Siriamanta reyqa chay maqanakupaj carretaspa kinsa chunka iskayniyoj kurajninkunata kamachisqa: Ama jatunwampis juch'uywampis maqanakunkichejchu, manachayqa Israelmanta reypa contrallampipuni, nispa. 32 Chayrayku carretasta kamachikunaqa Josafatta rikuspa, nerqanku: Israelmanta reyqa kaypunichá kanqa, nispa. Chayrayku paypa contrampipuni maqanakoj chimpaykorqanku; chantá rey Josafatqa qhaparikorqa. 33 Chay carretasta kamachikunaqa mana Israelpa reyninchu kasqanta reparaspa, waj ladoman riporqanku. 34 Ujnin soldadotaj wayrallaman flechanta kacharerqa, chaytaj Israelpa reyninta jap'irparerqa maqanakuna p'achasnimpa tinkuynin cheqapi. Reytaj carretanta apajta nerqa: Kutirichiway, orqhowaytaj kaymanta, imaraykuchus wañuy patapiña kashani, nispa. 35 Wañuchinaku maqanakoqa chay p'unchaypi may sinch'ipuni karqa, reytajrí carretallampipuni siriospa ñawpaqenkupi karqa. Ch'isiyaykuynejtataj wañorqa, yawarnimpis chay carreta ukhuta purisharqa. 36 Inti yaykuytataj uj parlay uyarikorqa soldados ukhupi kay jinata: Sapa uj llajtaykichejman, sapa uj wasiykichejman ripuychej; 37 reyqa wañupunña, nispa. Samariaman reypa ayanta apaspataj, chaypi p'amparqanku. 38 Jinataj chay carretanta Samaria qochapi mayllarqanku, maypichus phisu warmis mayllakoj kanku, chaypi, yawarnintataj alqos llajwarqanku Tata Diospa nisqanman jina. 39 Ahab kamachishaspa waj ruwasqasnin, tukuy ima ruwasqasnimpiwan, marfilmanta wasita ruwasqan, tukuy llajtasta ruwachisqampiwan qhelqasqa kashan Israelmanta reyespa ruwasqasninkumanta willaj libropi. 40 Ahab wañupojtintaj, paypa cuentanmanta churin Ocozías kamacherqa. 41 Rey Ahabqa Israelpi tawa watastaña kamachishajtin, Asajpa churin Josafatqa Judapi kamachiyta qallarerqa. 42 Josafat kamachiyta qallarishaspa, kinsa chunka phishqayoj watayoj karqa, Jerusalenpitaj iskay chunka phishqayoj watasta kamacherqa. Mamanqa Silhijpa ususin Azuba karqa. 43 Payqa tatan Asaj tukuy ñankunampi purerqa, mana pantaspa, Tata Diospa ñawpaqempi cheqanta ruwaspa. Chay tukuywampis lomas patapi yupaychana wasista mana chinkacherqachu. Runasqa chaypi uywa wañuchisqasta jaywajraj kanku, inciensotapis q'oshñichej kanku. 44 Israelmanta rey Ahabwan Josafatqa uj tratota ruwasqa allinta kawsanankupaj. 45 Josafat kamachishaspa tukuy ima ruwasqasnin, waj ruwasqasnimpiwan, may mentasqa kasqan, chay chhika wañuchinaku maqanakupi maqanakusqasnin imaqa qhelqasqa kashan Judamanta reyespa ruwasqasninkumanta willaj libropi. 46 Jinallatataj Judá jallp'amanta qharqorqa chay phisu warmi jina qhari masinwan khuchichakojkunata, tatan Asaj tiemponmantapacha qhepakusqanku, chaykunata. 47 Chaypacha Edompi mana rey karqachu, uj kuraj kamachilla karqa. 48 Josafattaj jatuchaj barcosta ruwacherqa Ofirman rispa qorita apamunampaj; chantá mana rerqankuchu, Ezión-geberpi phirikusqankurayku. 49 Chantá Ahabpa churin Ocoziasqa Josafatman nerqa: Munankichu qampa kamachisniyki noqaj kamachisniywan rinankuta barcospi? nispa. Josafattaj mana munarqachu. 50 Josafat wañupojtin, ñawpa tatan Davidpa llajtampi p'amparqanku, paypa cuentanmantataj churin Joram kamacherqa. 51 Judamanta rey Josafat chunka qanchisniyoj watastaña kamachishajtin, Ahabpa churin Ocoziasqa Israelta kamachiyta qallarerqa Samaria llajtapi. Iskay watasta Israelta kamacherqa. 52 Ocoziasqa Tata Diospa ñawpaqempi sajrallatapuni ruwarqa, purispa tatampa ñankunampi, mamampa ñankunampi, Nabatpa churin Jeroboampa ñankunampiwan, israelitasta juchallichispa. 53 Baalkunata sirverqa, yupaycharqataj, ajinamanta Israelpa Señornin Tata Diosta phiñachispa, imaynatachus tatampis ruwarqa, ajinata.
