1 REYES 2

1Davidpa wañupunan p'unchay qayllamushajtin, Davidqa churin Salomonta kamacherqa: 2“Kunanqa noqa wañupusaj, tukuypis wañunku jinata, qantajrí kallpachakuy, qhari jinataj puriy.” 3Tata Diosniykij kamachinkunata junt'ay, ñankunampi purispa, munayninta ruwaspataj, chantá tukuy Diospa kamachinta kasuypuni, imaynachus Moisespa kamachisqampi qhelqasqa kasqanman jina, tukuy ima ruwasqaykipi, tukuy ima ruwaj churakusqaykipipis allin risunampaj. 4Ajinamanta Tata Diospis junt'anqa chay tukuy ima niwasqanta: Sichus churikunayki ñankunaypi allinta purinkuman, ñawpaqeypi cheqan kajta ruwaspa tukuy sonqonkuwan, tukuy yuyayninkuwantaj chayqa, kallanqapuni Israelpa kamachina tiyanampi qampa uj churiyki tiyaykukojqa, nispa. 5»Qanqa yachankiña imatachus ruwawasqanta Saruiaj churin Joabqa, imatatajchus ruwasqanta israelita soldadokunata chay iskay kurajninkukunawan, Nerpa churin Abner, Jeterpa churin Amasapiwan: Paykunataqa wañucherqa mana maqanaku kashajtin. Maqanakupi wañusqakunamanta vengakuspa, chaymanta noqata juchachawan, paypuni juchayoj kashaspa. 6Chayrayku yuyayniykiman jina ruwanki, amataj allillampi machuyaspa wañupojta saqenkichu. 7Galaadmanta Barzilaipa churinkunatarí khuyarinki, wasiykipitaj mikhuchinki, imaraykuchus paykunaqa khuyawarqanku wawqeyki Absalonmanta ayqekushajtiy. 8Chay jawaqa, qanllawantaj kashan benjaminita Bahurimmanta, Geraj churin Simí. Payqa chay jinatapuni qhenchachawarqa noqa Mahanaimman rishajtiy. Chantá payllataj urayk'amuspa, taripawaj jamorqa Jordán Mayuman, noqataj payman jurarqani Tata Diospa sutinrayku: Espadawan mana wañuchichisqaykichu, nispa. 9Paytaqa amapuni khuyankichu, imaraykuchus qanqa sumaj yachayniyoj runa kanki, yachankitajchá paywan imatapis ruwayta, machuyaspa ama allin wañuypi wañunampaj, nispa. 10Chantá Davidqa wañuporqa; tatankunanpa aya p'ampanampi p'amparqanku Davidpa llajtampi. 11Davidqa kamacherqa Israel suyupi tawa chunka watakunata; qanchis watakunata Hebronpi, kinsa chunka kinsayoj watakunatataj Jerusalenpi kamacherqa. 12Salomonqa tatan Davidpa kamachina tiyanampi tiyaykukorqa, paypa kamachiynintaj allin sayasqa, karqa. 13Haguitpa churin Adoniasqa jamorqa Salomonpa maman Betsabejpaman; Betsabetaj taporqa: –¿Allin sonqowanchu jamushanki? nispa. –Paytaj kuticherqa: –Arí, allin sonqowan, nispa. 14Chaymantataj nerqa: –Uj nisuyta munani, nispa. –Betsabetaj nerqa: –Nillaway, nispa. 15Chantá Adonías nerqa: –Qan yachanki jina, kamachinapi tiyanaqa noqajta kanan karqa, tukuy Israel runakunataj noqata qhawashawarqanku kamachinayta. Chaywampis kamachina tiyanataqa Salomón wawqeyman qosqa karqa, imaraykuchus Tata Dios ajinata nerqa. 16Kunanqa uj imata mañakusqayki, amataj qhesachawankichu, nispa. –Betsabetaj nerqa: –Parlallay, nispa. 17Chantá Adoniasqa nerqa: –Noqa mañakuyki parlapunawaykita jatun kamachej Salomonman, sunamita Abisagta warmiypaj qopunawanta, imaraykuchus qantaqa mana qhesachasonqachu. 18–Betsabetaj nerqa: –Walejlla; jatun kamachita noqa parlapayapusqayki, nispa. 19Jinataj Betsabeqa rerqa jatun kamachej Salomonpaman Adoniaspaj parlapayapoj. Jatun kamacheqa mamanta rikuytawan sayarikuspa, napaykorqa k'umuykuspa. Jinaytawantaj, kamachina tiyanampi tiyaykukuspa, mamampaj uj jatun tiyanata churachiporqa, mamantaj paña ladompi tiyaykuspa, 20jatun kamachita nerqa: –Munani qanmanta uj pisi imata mañasuyta. Ama ari, qhesachawaychu, nispa. –Jatun kamachitaj payta nerqa: –Mamáy, mañakullaway, mana qhesachasqaykichu, nispa. 21–Chantá Betsabetaj nerqa: –Sunamita Abisagta wawqeyki Adoniasman warmin kanampaj qosqa kachun, nispa. 22–Salomonrí mamanman kuticherqa: –¿Imaraykutaj sunamita Abisagta Adoniaspaj mañankiri? Kamachinay suyutapis paypajqa mañapullaytaj ari, pay kuraj wawqey kasqanrayku; chantapis paywanña kashanku sacerdote Abiatarwan, Saruiaj churin Joabpiwan, nispa. 23Chaymantataj jatun kamachej Salomonqa Tata Diospa sutinrayku jurarqa: «Tata Dios sinch'ita jasut'iwachun, sichus kayta mañachiwasqanmanta Adonías mana wañuchisqa kanqa chayqa. 24Tata Diospa sutinrayku jurallanitaj, pichus tatay Davidpa kamachina tiyanampi allinta tiyachiwan, mirayniytapis sumajta sayachenqa, Payrayku: Adoniasqa kunampacha wañuchisqa kanqa.» 25Chantá jatun kamachej Salomonqa Joiadaj churin Benaiata kamacherqa Adoniasta wañuchinanta. Paytaj rispa, Adoniasta wañurparicherqa. 26Sacerdote Abiatartataj jatun kamacheqa kamacherqa: «Ripuy Anatot jallp'akunaykiman. Qanqa wañuchisqa kanaykipaj jina kanki; chaywampis mana wañuchisqaykichu, Diospa trato ruwasqan arcata tatay Davidpa ñawpaqenta apasqaykirayku, chantapis tataywan khuska tukuy llakiynimpi purisqaykirayku.» 27Ajinata Salomonqa wijch'orqa Abiatarta Tata Diospa sacerdoten kasqanmanta, jinamanta Tata Diospa nisqan junt'akunampaj, Elijpa ayllunmanta Silopi parlasqanman jina. 28Chantá Joab chay imakunata uyarispa, Adoniaswan khuskachakusqanrayku; Absalonwantajrí mana khuskachakusqachu. Chayrayku Joabqa Tata Diospa Toldonman ayqekuspa, chaypi altarpa wajrankunamanta jap'iykukorqa. 29Jatun kamachej Salomonmantaj willarqanku Tata Diospa Toldonman Joab ayqekusqanta, altar chaynejpitaj kashasqanta. Chantá Salomón kacharqa Joiadaj churin Benaiata, Joabta wañuchimunampaj. 30Benaiaqa Tata Diospa Toldonman yaykuspa, nerqa: –Jatun kamachej kamachisunki llojsimunaykita, nispa. Joabtajrí kuticherqa: Mana. Kaypi wañusaj, nispa. –Benaiaqa kutimuspa, jatun kamachiman willarqa Joab imatachus kutichisqanta. 31Chantá jatun kamacheqa payta nerqa: –Ruway nisqanman jina, ñak'aspataj p'ampaykuy. Ajinamanta chinkachinki Joab qhasillamanta yawarta jich'asqanta tataypa wasinmanta, noqaj ñawpaqeymantawan. 32Paypa patanmantaj yawar jich'asqanta Tata Diosqa kutichenqa, imaraykuchus Joabqa kay iskay runakunata wañucherqa, paymanta aswan sumaj cheqan runakunata, tatay Davidpa mana yachasqallan: Israelitakunajpa soldadokunaj kamachininku Nerpa churin Abnerta, Judamanta soldadokunajpa kamachininku Jeterpa churin Amasatawan. 33Paykunaj yawarninkoqa Joabpa patanman urmachun jinataj mirayninmampis wiñaypaj. Tata Diosmanta allin kawsaytaj wiñaypaj kallachumpuni Davidpa wasimpi, miraynimpi, kamachina tiyanampipis, nispa. 34Chantá Joiadaj churin Benaiaqa rispa, Joabta wañucherqa; ch'in pampapitaj wasin, chaypi p'amparqanku. 35Jatun kamachitaj Joabpa cuentanmanta Joiadaj churin Benaiata soldadokunaj kurajnin kanampaj churarqa, sacerdote kanampajtaj churarqa Sadocta Abiatarpa cuentanmanta. 36Chaymantá jatun kamacheqa Simita wajyachimuspa, nerqa: –Uj wasita Jerusalenpi ruwakuy chaypi tiyakunaykipaj, chaymantataj ama maymampis llojsinkichu. 37Sichus kaymanta llojsispa Cedrón Mayuta pasawaj chayqa, chaypacha wañuchisqapuni kanki, chaypajtaj qanlla juchayoj kanki, nispa. 38Simitaj jatun kamachiman kutichispa, nerqa: –Parlawasqaykeqa allimpuni; imaynatachus wiraqochi jatun kamachiy kamachishawanki, ajinata ruwasaj, nispa. Ajinata Simí unayta Jerusalenpi tiyakorqa. 39Kinsa wata qhepatataj Simijpa wata runakunanmanta iskay ayqekusqanku Maacaj churin Gatmanta jatun kamachi Aquispaman. Simimantaj willarqanku: Wata runasniykeqa Gatpi kashanku, nispa. 40Chantá Simiqa burronta caronaykuspa, Gatmanta jatun kamachej Aquispaman chayarqa, wata runakunanta mask'aspa. Jinataj Simiqa Gatmanta wata runakunanta pusakamporqa. 41Jinapi Salomonman willarqanku Simiqa Jerusalenmanta Gatman risqanta, chaymantataj kutimusqantaña. 42Chantá jatun kamachiqa Simita wajyachimuspa, nerqa: –¿Manachu Tata Diospa sutinrayku jurachispa, nerqayki: Sichus kaymanta maymampis llojsinki chayqa, wañuchisqa kanki? nispa. Qantaj niwarqanki: ¿Parlawasqaykeqa allin; noqa kamachiyki kasusqayki, nispa. 43¿Imaraykutaj mana waqaycharqankichu Tata Diosman jurasqaykita, noqaj nisqaytapis? nispa. 44Chantapis jatun kamacheqa Simiman nillarqataj: –Qanqa sumajta yachanki tukuy ima sajratachus tatay Davidpa contrampi ruwasqaykita; sonqoykipipis yachallankitaj. Kunanqa Tata Dios kutiykuchimusunki chay sajra ruwasqaykita qampa pataykiman. 45Jatun kamachej Salomonqa saminchasqa kachun, jatun kamachej Davidpa kamachina tiyanampis wiñaypaj sayanqa Tata Diospa ñawpaqempi. 46Chantá jatun kamacheqa kamacherqa Joiadaj churin Benaiata, paytaj llojsispa, Simita wañucherqa. Chaymantá kamachinan suyuqa Salomonpa makimpi sumaj kallpachasqa karqa.

will be added

X\