1 REYES 19

1Ahabqa Jezabelman Eliaspa tukuy ima ruwasqanmanta, imaynatachus Baalpa tukuy sut'inchajninta wañurachisqanmantawan willarqa. 2Chantá Jezabelqa Eliaspaman ujnin kamachinta kachaspa, nicherqa: Sichus q'aya kay horasta, baalpa sut'inchajkunanta wañucherqanki, chaykunata jina mana ruwasojteyqa, diosniykuna jasut'iwachunku, nispa. 3Chayta uyarispa, Eliasqa manchachikorqa, wañuchinankuta yuyaspa ayqekprqa. Juda suyu Beerseba llajtaman chayaspataj, chaypi kamachinta saqespa, 4ch'in pampanejta riporqa uj p'unchay puriyta jina, chaypitaj retama sach'a uraman tiyaykukuytawan, wañupuyta munaspa, nerqa: Kaykamalla kachun, Tata Dios, pusakapullawayña. Noqaqa mana ñawpa tatakunaymanta aswan allinchu kani, nispa. 5Chantá chay sach'a urapi winkuspa, puñurparerqa. Chaymantataj Tata Diospa uj angelnin chimpaykuspa, nerqa: Jatarikuspa mikhuy, nispa. 6Eliasqa muyuyninta qhawarispa, uman chaynejpi rikorqa uj t'antata nina k'ajajpi chayasqata, uj yurupi yakutawan; mikhuykuspa, ujyaykuspataj, watejmanta puñuykakapullarqataj. 7Tata Diospa angelnintaj ujtawan kutimuspa, nerqa: Jatarikuspa mikhuy, imaraykuchus karuraj rinaykeqa kashan, nispa. 8Jatarikuytawantaj mikhorqa, ujyarqataj; jinapi chay mikhusqanwan kallpachakuytawan, tawa chunka p'unchayta, tawa chunka tutatawan purerqa, Diospa Horeb orqonman chayanankama. 9Chaypi uj chhanka jusk'uman yaykuspa, chay tuta puñorqa. Chantá Tata Diosqa nerqa:“Elías, ¿imata kaypi ruwashankiri?” nispa. 10Paytaj kuticherqa: “Tukuy Atiyniyoj Tata Diosníy, noqaqa anchatapuni Qanmanta sienteni, imaraykuchus israelitakunaqa paykunawan tratota ruwasqaykita wasanchaspa, altarniykita urmarachinku, Qanmanta willajkunapis wañurachinku. Noqallañataj qhepakuni; chaywampis wañuchinawankupaj mask'ashawanku, nispa. 11Tata Diostaj nerqa: Llojsimuy jawaman, chay orqo patapi ñawpaqeypi sayaykukuy, nispa. Chaypachataj Tata Diosqa chaynejta pasarqa. Uj jatun wayra orqokunata urmachimuspa, rumikunata ñutorqa; Tata Diostajrí mana chay wayrapichu kasharqa. Chay wayraj qhepampitaj uj jallp'a ikhakuy karqa; Tata Diostajrí manallataj chay jallp'a ikhakuypichu kasharqa. 12Chay jallp'a ikhakuypa qhepampitaj uj nina lawrayñataj karqa; Tata Diostajrí manallataj chay nina lawraypichu karqa. Chay ninaj qhepampitaj uj k'acha wayra silbay jina uyarikorqa. 13Eliasqa chayta uyarispa, poncho jina mantonwan uyanta pakaykukorqa; chay chhanka jusk'umanta llojsimuspataj, punkupi sayarerqa. Chaypitaj payman uj parlay jamorqa: Elías, ¿imata kaypi ruwashanki? nispa. 14Eliastaj kuticherqa: Tukuy Atiyniyoj Señor Tata Diosníy, noqaqa anchatapuni Qanmanta sienteni, imaraykuchus israelitasqa Qanwan tratota ruwasqaykita saqerparinku, altarkunaykita urmachinku, Qanmanta willajkunatapis wañurachinku. Noqallaña qhepakuni; chaywampis wañuchinawankupaj mask'ashawankuraj, nispa. 15Chantá Tata Diosqa Eliasta nerqa: “Maynintachus jamusqaykita Damasco ch'innejman riy. Hazael sutiyoj runata Siriapi jatun kamachej kanampaj churanki. 16Jinallataj Nimsijpa allchhin Jehutapis Israel suyupi jatun kamachej kanampaj churanki; Abel-meholamanta Safatpa churin Eliseotataj, qampa cuentaykipi Diosmanta willaj kanampaj churallankitaj. 17Pichus Hazaelpa wañuchinanmanta ayqekojtaqa Jehú wañuchenqa, Jehujpa wañuchinanmanta ayqekojtataj Eliseo wañuchenqa. 18Chaywampis noqaqa Israel suyupi qanchis waranqa runakunata waqaychasaj, pikunachus Baal lantiman mana qonqorikorqankuchu, nitaj much'arqankuchu, chaykunata. 19Eliasqa chaymanta ripuspa, Safatpa churin Eliseota tarerqa; payqa chunka iskayniyoj yuntaswan llank'achisharqa, chaykunamanta ujnin yuntawantaj aswan qhepata yuntawan risharqa. Jinallapi Eliasqa poncho jina mantonta Eliseoj patanman choqaykorqa. 20Chantá Eliseo chay yuntata saqerpayaytawan, Eliaspa qhepanta usqhayta rispa, nerqa: Mañakuyki ari, tatayta, mamayta saqeykamunayta, chantataj qanta qhatisqayki, nispa. Eliastaj payta nerqa: Rillay, amataj qonqaychu imatachus qanwan ruwasqayta, nispa. 21Kutispa, Eliseoqa iskay torota ñak'arqa, chay aradowantaj aychata kankarqa, tukuynin runakunamantaj mikhunankupaj qorqa. Chaymantá Eliaspa qhepanta rerqa, paytataj servirqa.

will be added

X\