1 Nabatpa churin Jeroboam chunka pusajniyoj watataña Israel suyupi kamachishajtin, Abiamqa Judapi kamachiyta qallarerqa. 2 Kamacherqataj Jerusalenpi kinsa watata; mamanqa Abisalompa ususin Maaca sutiyoj karqa. 3 Payqa tatampa ruwasqan kikin juchallatatajmi ruwarqa, manataj paypa sonqon cheqanchu karqa Tata Diosninwan, imaynachus ñawpa tatan Davidpata karqa, jinaqa. 4 Chaywampis Tata Diosqa kamachin Davidta munakusqanrayku, Jerusalenpi ujnin churinta kamachina tiyananman tiyaykucherqa paypa qhepanta, jinataj waqaycharqa Jerusalén llajtata. 5 Chayta ruwarqa, imaraykuchus Davidqa Tata Diospa ñawpaqempi cheqanta ruwarqa, manataj mayqen kamachisqanmantapis karunchakorqachu tukuy kawsaynimpi, manachayqa hitita Uriaspa wañuchichispa juchallikusqallan karqa. 6 Tukuy kawsayninkupitaj Roboamwan Jeroboamwanqa maqanakullapipuni kaj kanku. Abiam kamachishaspa wakin ruwasqan, tukuy ima ruwasqanpiwan, qhelqasqa kashan Judá suyumanta jatun kamachejkunaj ruwasqankumanta willaj, chay qhelqallapitaj. 8 Abiam wañupojtintaj, Davidpa llajtampi ayanta p'amparqanku, churin Asá sutiyoj kamacherqa qepanta. 9 Jeroboam iskay chunka watataña Israel suyupi kamachishajtin, Judá suyupi Asá kamachiyta qallarerqa. 10 Jerusalenpitaj tawa chunka ujniyoj watata kamacherqa. Jatun mamantaj Abisalompa ususin Maaca karqa. 11 Tata Diospa ñawpaqempi Asaqa cheqanta ruwarqa, jatun tatan David jina. 12 Payqa Judá suyumanta wijch'orqa, chay lantikuna yupaychana wasimanta phisu warmi jina khuchichakoj tukuy qharikunata. Wijch'ullarqataj chay tukuy lantikunata ñawpa tatankunajpa ruwasqasninkuta. 13 Ajinallatataj jatun maman Maacatapis manaña jatun kamachej warmi nisqa kananta saqerqachu, k'ullumanta Asera lantita ruwachisqanrayku. Asaqa chay lantita phirispa, Cedrón Wayq'opi ruphaykucherqa. 14 Chaywampis loma patapi altarkunataqa mana chinkacherqachu. Chay tukuywampis Asaj sonqonqa tukuy kawsaynimpi Tata Diospaj cheqan karqa. 15 Tatan jinataj paypis imakunatachus Tata Diospaj t'aqasqanku chay tukuyta Tata Diospa Templonman churaykaporqa: Qorita, qolqeta, tukuy laya k'acha valorniyoj imakunatawan. 16 Israelpa jatun kamachin Baasawan Judajpa jatun kamachin Asawan tukuy kawsayninkupi maqanakullapipuni kaj kanku. 17 Jinapi Israel suyumanta jatun kamachej Baasaqa llojsimorqa Judajpa contrampi. Ramá llajtata astawan perqaykucherqa, Juda suyumanta jatun kamachinman ama pipis yaykunampaj nitaj llojsimunampajpis. 18 Chantá Asaqa Tata Diospa Templompi kaj qorita, qolqeta jap'ispa, apacherqa kamachinkuna nejta, Siriamanta Tabrimonpa churin, Hezionpa allchhin jatun kamachej Ben-adad Damasco llajtapi tiyakusharqa, payman, nicherqataj: 19 Qanwan, noqawan tratota ruwanachej, imaynatachus qampa tataykiwan noqaj tataywan tratota ruwarqanku, ajinata. Kay t'inkata apachimuyki qolqeta, qoritawan. Kunanqa Israel suyumanta jatun kamachej Baasawan ruwasqayki tratota p'akiy, pay noqamanta karunchakunampaj, nispa. 20 Ben-adadqa jatun kamachej Asaj nisqanta uyarikorqa, Israel suyoj contrampitaj kacharqa soldadokuna kamachejkunata. Paykunataj kay llajtakunata jap'erqanku: Ijonta, Danta, Abel-bet-maacatawan, tukuynin Cineretta, tukuynin Neftalí suyutawan. 21 Baasataj chayta yachaspa, Ramá llajtata manaña perqacherqañachu, Tirsamantaj kutiporqa. 22 Chantá jatun kamachej Asaqa Juda suyumanta tukuynin runakunata wajyacherqa ni uj puchuyojta, Ramaman riytawantaj phaskaspa apakamporqanku rumikunata, k'aspitawan, mayqenkunawanchus Baasaqa jark'achata ruwachisharqa, chay tukuyta, chaykunawantaj Asaqa ruwacherqa Benjaminpi Gueba llajtata, Mizpatawan. 23 Asá kamachishaspa wakin ruwasqan, tukuy atiynin, imatachus ruwasqan, llajtakunata ruwachisqan imaqa qhelqasqa kashan Judá suyumanta jatun kamachejkunaj ruwasqankumanta willaj, chay qhelqallapitaj. Machuyaynimpitaj chakinmanta onqoykorqa. 24 Asá wañupojtin, ñawpa tatan Davidpa llajtampi ayanta p'amparqanku; churin Josafat kamacherqa qepanta. 25 Juda suyupi jatun kamachej Asá iskay watataña kamachishajtin, Jeroboampa churin Nadabqa Israel suyupi kamachiyta qallarerqa, kamacherqataj iskay watata. 26 Payqa mana Tata Diospa munasqanman jinachu ruwarqa, tatan jina juchallikuspa israelitakunatapis juchallicherqa. 27 Chantá Isacar ayllumanta Ahiaspa churin Baasaqa Nadabpa contrampi oqharikorqa, Baasataj Guibetonpi Nadabta wañucherqa. Chayqa filisteokunajpa llajtanku karqa, Nadabtaj tukuynin israelitakunawan Guibetonta muyuykusqanku. 28 Juda suyumanta jatun kamachej Asá kinsa watataña kamachishajtin, Baasaqa Nadabta wañucherqa. Chantaqa paypa qhepampi kamacherqa. 29 Kamachiyta qallarishaspa, Jeroboampa ayllunmanta kajkunata tukuyninkuta wañuracherqa, imaynatachus Tata Diosqa parlarqa Silomanta Diosmanta willaj Ahiasnejta, ajinata. 30 Chayqa jina karqa, Jeroboam juchata ruwasqanrayku, chaywan israelitakunata juchallichispa. Ajinamanta Israelpa Tata Diosninta phiñachisqa. 31 Nadab kamachishaspa, wakin ruwasqan, tukuy ima ruwasqanpiwan, qhelqasqa kashan Israel suyumanta jatun kamachejkunaj ruwasqankumanta willaj, chay qhelqallapitaj. 32 Asawan, Israelmanta jatun kamachej Baasawanqa tukuy kawsayninkupi maqanakullapipu karqanku. 33 Judá suyumanta jatun kamachej Asá kinsa watataña kamachishajtin, Ahiaspa churin Baasaqa Tirsa llajtapi tukuynin Israelitakunata kamachiyta qallarerqa, iskay chunka tawayoj watatataj kamacherqa. 34 Payqa mana Tata Diospa munayninman jinachu ruwarqa, Jeroboampa ruwasqan juchakunata ruwaspa, Israelitakunata juchallicherqa.
