1 REYES 14

1Chay p'unchaykunapitaj Jeroboampa churin Abías onqoykorqa. 2Chantá Jeroboamqa warminta nerqa: Diosmanta willaj Ahías Silopi tiyakun, pichus noqata niwarqa kay llajtaj jatun kamachin kanayta. Uj jina p'achata churaykukuspa ama rejsisunankupaj noqaj warmiy kasqaykita, chay Silo llajtaman riy. 3Chunka t'antata, wakin tortillakunatawan, uj yuritupi abeja misk'itawan apapuy, paywan tinkukuspataj, tapukuy imaynachus kay wawa kananmanta, nispa nerqa Jeroboamqa. 4Jeroboampa warmenqa kikinta ruwarqa; Siloman, Ahiaspa wasinman rerqa. Ahiasqa manaña rikuyta aterqachu; machu runaña kasqanrayku, ñawisnenqa chharpuña karqa. 5Tata Diostajrí ñapis Ahiasman nisqaña: Kunanqa Jeroboampa warmin jamusonqa uj jinamanta p'achallisqa, churin onqosqa kasqanmanta tapukusoj. Qantajrí jinata ninki, nispa. 6Ahiasqa warmej punkuta yaykumushajtinña, thaskisqanta uyarispa, nerqa: –Jeroboampa warmin, yaykumuy. ¿Imaraykutaj uj jinaman tukuspa jamunkiri? Kunan noqaqa qanman kachamusqa kani jatun llakiymanta willasunaypaj. 7Kutispa, willamuy Jeroboamman, israelitakunaj Tata Diosninqa ajinata nin: “Noqaqa runakunaj chawpimanta oqharerqayki, churarqaykitaj Israel aylluyta kamachinaykipaj. 8Davidpa ayllunmanta qhechuspa, qanman qorqayki Israel suyuta kamachinaykipaj. Qantajrí mana kamachiy David jinachu kanki. Payqa tukuy kamachisqayta kasuspa, tukuy sonqowan Noqaj ñanniyta purerqa, cheqanta ruwaspa. 9Qanmanta ñawpaj kaj jatun kamachikunamanta, aswan sajra kajllatapuni ruwarqanki. Jinallataj unuyachisqa metalmanta waj dioskunata, lantikunatawan ruwakuspa, wasanchawarqanki. 10Chayrayku kunanqa Jeroboampa ayllunta mana allikunawan muchuchisaj; mirayninmanta tukuynin qharikunata chinkachisaj tukuy Israel suyupi; q'opata jina pichasaj. 11Llajtapi wañojkunataqa alqokuna ayanta mikhonqanku, campopi wañojkunatataj suwintukuna mikhonqanku, imaraykuchus ajinata nin Tata Dios.” 12Qanrí, ripuy wasiykiman; llajta punkuta yaykushajtiykitaj, wawayki wañuponqa. 13Tukuynin Israel suyumanta kajkuna waqaspa ayanta p'ampanqanku. Jeroboampa ayllunmantaqa payllapi allin kaj tarikusqanrayku Tata Diospa ñawpaqempi, paylla p'ampasqa kanqa,. 14Kunan p'unchaymanta pacha, Tata Diosqa waj jatun kamachejta churanqa Israel suyupi, paytaj Jeroboampa ayllunta chinkachenqa. 15Imaynatachus soqososta purej yaku thalarin, ajinata Tata Diosqa israelitakunata thalarparenqa, Payllataj israelitakunata wijch'onqa, kay chhika sumaj jallp'ata tatankuman qorqa, chaymanta. Éufrates Mayumantapis aswan jaqaymanraj paykunata wijch'onqa, Tata Diosta wasanchasqankurayku, k'ullusmanta Astarté lantikunata ruwakuspa. 16Tata Diosqa Israel suyuta saqerparenqa Jeroboampa panatasqanrayku, israelitakunata juchallichisqanrayku ima, nispa nerqa Dioamanta willaj Ahiasqa. 17Chantá Jeroboampa warmenqa, riporqa Tirsa llajtaman, wasinman yaykushajtintaj, churenqa wañuporqa. 18Tukuynin israelitakunataj waqaspa ayanta p'amparqanku, Tata Dios nisqanman jina Ahías Diosmanta willajnejta. 19Jeroboam kamachishaspa wakin ruwasqan, maqanakusqan, kamachisqan imaqa, Israel suyumanta jatun kamachejkunaj ruwasqankumanta willaj, chay qhelqapi qhelqasqa kashan. 20Jeroboamqa iskay chunka iskayniyoj watata Israel suyupi kamacherqa, wañupojtintaj churin Nadab qhepanta kamacherqa. 21Salomonpa churin Roboamqa Judá suyupi kamacherqa. Kamachiyta qallarishaspa, Roboamqa tawa chunka ujniyoj watayoj karqa, Jerusalenpi chunka qanchisniyoj watatataj kamacherqa, Chay llajtaqa Tata Diosqa Israelpa tukuynin llajtamanta ajllakorqa chaypi sutinta yuyaychasqa kanampaj. Roboampa mamampa sutin karqa Naama; amonita karqa. 22Judá runakunaqa Tata Diospa ñawpaqempi mana allintachu ruwarqanku, chaymi Tata Diosta sinch'ita phiñacherqanku, tatankoj juchallisqanmantapis astawanraj juchallirqanku sajra ruwasqasninkuwan. 23Paykunaqa ruwallarqankutaj loma patapi altarkunata Asera lantikunata tukuynej alto orqo patapi, jatuchaj thansa sach'a urapipis. 24Chay lantikunata yupayachana wasikunapi, warmi jina khuchichakoj qharikuna kallarqataj; chantapis Tata Diosqa israelitakunata ñawpaqenkumanta wijch'orqa, chay waj suyukunaj millay ruwasqasninkuta paykunapis ruwallarqankutaj. 25Chaypacha Egiptomanta jatun kamachej Sisac sutiyojqa Jerusalenpa contrampi llojsimorqa, Roboam phishqa watata kamachisqanmantaña. 26Tukuy valorniyoj imakunata waqaychasqa karqa Tata Diospa Templompi, jatun kamachejpa wasimpi ima, chay tukuyta jap'ispa apakaporqa. Salomonqa qori puromanta jark'akuna escudota ruwachisqa, chaytapis apakapullarqankutaj. 27Jatun kamachej Roboamtaj qorimanta karqa, chay escudoj cuentampi broncemanta escudokunata ruwacherqa, kamachina wasita qhawajkuna soldadonkunamantaj jaywarqa paykuna jallch'anankupaj. 28Tata Diospa Templonman jatun kamachej rejtin, soldadokunaqa chay jark'akuna escudota apaj kanku, chaymantataj qhawajkuna soldadonkunaj wasinkuman saqej kanku. 29Roboam kamachishaspa wakin ruwasqan, tukuy ima ruwasqanpiwan, qhelqasqa kashan Judá suyumanta jatun kamachejkunaj ruwasqankumanta willaj, chay qhelqallapitaj. 30Tukuy kawsayninkupi Roboamwan, Jeroboamwanqa maqanakullapipuni kaj kanku. 31Roboam wañupojtintaj, ayantaqa p'amparqanku jatun tatan Davidpa llajtampi. Mamanqa Amonmanta Naama sutiyoj. Roboam wañupojtintaj qhepanta churin Abiam kamacherqa.

will be added

X\