1 CORINTIOS 8

1Qankuna tapuwarqankichej lantisman jaywasqa mikhunasmanta. Ninchej jina: Tukuyninchej yachayniyoj kanchej, nispa. Jinapis chay yachayqa runata umanta oqharichin; munakuyrí Espirituman jina wiñachin. 2Sichus pipis yuyanman imatapis allinta yachasqanta chayqa, manaraj imatapis yachanchu, yachanata jinaqa. 3Sichus mayqempis Diosta munakun chayqa, Diospis payta rejsin. 4Chay lantisman jaywasqa mikhunamantaqa, yachanchej jina, lanteqa mana imachu kay pachapeqa. Yachallanchejtaj uj k'ata Dioslla kasqanta. 5Runas ninku ashkha dioskuna kasqanta janaj pachapitaj, kay pachapitaj; paykunapaj chay dioskuna, señorkuna ima ashkha kanku. 6Chaywampis noqanchejpajqa uj Dioslla tiyan, Tatanchej. Paymanta tukuy ima jamun, noqanchejtaj Paypata kanchej; uj Señorlla tiyan, chaytaj Jesucristo. Paynejtataj tukuy imas ruwasqa kanku. Noqanchejpis Paynejta kanchej. 7Manataj tukuychu chay imasta yachanku; wakenqa kunankama lanti yupaychayman yachasqa kanku. Ajinaqa chay lantisman jaywasqa mikhunata mikhusqankurayku sonqonkoj yuyaynimpi pisi kallpayoj kaspa, juchachasqa rikhurinku. 8Chaywampis, mana mikhunachu aswan allimpaj Dioswan qhawachiwanchej; mana mikhuspaqa, mana pisipaj qhawasqachu kasunman, nitaj mikhuspapis aswan allimpaj qhawasqachu kasunman. 9Kunanqa allinta qhawakuychej, imallatapis ruwayta atisqaykichejqa ama misk'ana jinachu kanampaj pisi creeyniyojkunapaj. 10Yachayniyoj kashaspachus lanti wasipi mikhushajta pillapis rikusunkiman chayqa, manachu chay pisi creeyniyoj hermanopis mikhuyta munallanqataj lantisman jaywasqata? 11Qampa yachayniykirayku pisi creeyniyoj hermanoqa chinkaponqa, piraykuchus Cristo wañorqa, chay. 12Ajinamanta ari, hermanospa contrampi juchallispa, pisi creeyniyojpa sonqonta nanachispataj, Cristoj contrampipuni juchallinkichej. 13Chayrayku lantisman jaywasqata mikhusqaychus hermanoyta juchaman urmachin chayqa, mana jayk'ajpis chay aychata mikhusajchu, hermanoyta ama juchaman urmachinaypaj.

will be added

X\