1 CORINTIOS 6

1Sichus qankunamanta mayqellampatapis wajpa contrampi quejan tiyan chayqa, imaraykutaj mana creej juezpaman quejakoj rinkichej, manataj Diospa ajllasqasninmanchu? 2Chayrí, manachu yachankichej kay pacha runasta Diospa ajllakusqasnin juzganankuta? Qankunanejtachus kay pacha runas juzgasqa kanqanku chayqa, manachu atinkichej juch'uy imasta juzgaytaqa? 3Chayrí, manachu yachankichej angelesta juzgananchejta? Jina chayqa, astawanraj kunanqa juzgasunchej kay kawsaypa imasnintaqa. 4Arí, qankuna ukhupi tiyan quejanakus kay kawsaypa imasninmanta. Chayta juzganampajqa iglesiapi pisipaj qhawasqa kajkunatachu churankichej? 5Chayta nini qankunata p'enqachinaypaj. Manachu qankuna ukhupi tiyan ni ujllapis yachayniyoj, hermanospura quejanakojta juzganampaj? 6Chaypis mana chayllachu. Hermanospura quejanakuspaqa, mana creej juezkunaman rinkichej. 7Ajina chayqa, qankunapura quejanakuspa jatunta pantankichejña. Imaraykutaj mana ch'inllamanta pacienciakunkichejchu, sajrata ruwasojtiykichej? Aswan allin kanman imaykichejtapis apakapojta saqenaykichej. 8Astawanqa qankuna mana cheqan kajta ruwankichej, suwankichejtaj, chaytataj hermanosmantarajtaj. 9Manachu yachankichej mana cheqan kajta ruwajkunaqa Diospa reinonta herenciata jina mana jap'inankuta? Ama pantaychejchu: Soltero kashaspa khuchichakojkuna, lantista yupaychajkuna, casarasqa kashaspa wajwan khuchichakojkuna, qhari kashaspa warmiman tukojkuna, qharipura jinanakojkuna, jinallataj suwaspis, mich'aspis, machajkunapis, maldecejkunapis, ch'awkiyajkunapis manapuni Diospa reinontaqa herenciata jina jap'enqankuchu. 11Ajina karqankichej qankunamanta wakin; kunanrí llimphuchasqaña kankichej, juchamanta t'aqasqaña, cheqan runapajña qhawasqataj Señor Jesuspa sutinrayku, Diosninchejpa Espiritunnejta ima. 12Tukuy imata ruwayta atiyman, manataj chayraykuchu tukuynenqa walej. Tukuy imasta ruwayta atiyman, manataj ni mayqenwan atipachikusajchu. 13Cheqamanta mikhunasqa wijsapaj, wijsataj mikhunaspaj. Chaywampis, iskayninta Diosqa chinkachenqa. Cuerpoqa mana khuchichakunapajchu, manachayqa cuerpoqa Señorpata, Señortaj cuerpojta. 14Imaynatachus Diosqa Señorta kawsaricherqa wañusqas ukhumanta, ajinallatataj noqanchejtapis atiyninwan kawsarichiwasun. 15Manachu yachankichej qankunaj cuerpoykichejqa Cristoj cuerponmanta kasqanta? Chayta Cristoj cuerponmanta qhechuspachu phisu warmej cuerponman ujchaykuyman? Ni imarayku. 16Chayrí, manachu yachankichej pichus phisu warmiwan puñuykojqa paywan uj cuerpollaman tukusqanta? Diosmanta Qhelqasqapi nin: Iskayninku uj aychallaman tukonqanku, nispa. 17Ajinata pichus Señorwan ujchakojqa Paywan espiritupi uj sonqollaña kashan. 18Ayqeychej khuchichakuy juchamanta. Sichus pillapis waj juchata ruwan chayqa, chay juchaqa mana cuerponmanchu chayan. Pichus khuchichakojrí cuerpompa contrampi juchallikun. 19Manachu yachankichej cuerpoykichejqa Espíritu Santoj templon kasqanta? Payqa qankunapi kashan. Payta Dios qosunkichej, cuerpoykichejmantataj manaña dueñoschu kankichej. 20Diosqa preciowan rantikusorqachej. Chayrayku Diosta jatunchaychej cuerpoykichejwan.

will be added

X\