1 CORINTIOS 5

1Cheqamanta qankuna ukhupi khuchichakuy kasqan uyarikun. Chay jina khuchichakoyqa mana kanchu Diospi mana creejkuna ukhupipis. Uj runa qankuna ukhupi madrastranwan tantaykukuspa kawsashasqa. 2Qankunarí may kasqaykichejta yuyakushankichej. Manachu astawanqa llakikunaykichej karqa? Manachu chay jina juchallikoj runataqa qankuna ukhumanta qharqonaykichej karqa? 3Cheqamanta, noqa qankunamanta karupi kashaspapis, sonqoypeqa qankunawan kashani. Juzganiña chay runata, chaypipis kashayman jina. 4Señorninchej Jesucristoj sutimpi tantakuspa, noqaj yuyaychasqaywan chaypipis kashayman jina, Señorninchej Jesucristoj atiyninwan ima 5chay runataqa Satanaspa makinman jaywaykuychej, ñak'ariypi aychan chinkachisqa kanampaj, almantaj salvasqa kanampaj Señor Jesuspa p'unchaynimpi. 6Manapuni allinchu runaykachasqaykichejqa. Manachu yachankichej pisi levaduralla tukuy masata poqochisqanta? 7Llimphuchakuychej ari chay mawk'a levaduramanta, mosoj masa jina kanaykichejpaj. Ajinamanta qankunaqa mana levadurayoj t'anta jina kankichej. Cristoqa Pascua Corderonchej jina juchanchejrayku jaywasqaña. 8Chayrayku, kunanqa Pascua fiestanchejtaqa ruwanachej, ama chay mawk'a levadurawanchu, nitaj sajra yuyaywan, nillataj sajra ruwaywampis, manachayqa ruwanachej ch'uwa sonqowan, cheqa kajwantaj mana levadurayoj t'antawan jina. 9Waj cartapi qhelqamorqaykichejña khuchichakoj runaswan ama purinaykichejta. 10Chaywanqa mana niyta munarqaykichejchu t'aqakunaykichejta mana creejkuna khuchichakojkunamanta, mich'asmanta, suwasmanta, lanti yupaychajkunamanta ima. Jinachus kanman chayqa, llojsipunaykichejchá kanman kay pachamanta. 11Chay cartapeqa niyta munarqaykichej ama kawsakunaykichejta ni mayqen runawan: Hermano kani, nishaspa khuchichakojwan, mich'akojwan, chayrí lanti yupaychajwan, runa masimpaj sajrata rimajwan, chayrí machaykojwan, suwakojwan; chay jina runawanqa ama mikhullaychejpischu. 12Ni ima ruwanay kanchu jawapi kajkunata juzganaypaj. Qankunaqa iglesiapi kajkunata juzganaykichej tiyan. 13Jawapi kajkunataqa Diosmin juzganqa. Chayrayku qankunaqa chay juchallikojta chawpiykichejmanta qharqoychej.

will be added

X\