1 Kunanqa, hermanos, yuyarichiykichej evangeliomanta willasqayta, mayqentachus qankunapis jap'erqankichej, mayqempitajchus sinch'ita sayashankichej, chaymanta. 2 Sichus chay willasqayta jap'ikunkichej chayqa, salvasqa kankichej. Mana jina chayqa, qhasillapaj creesqaykichejqa kanqa. 3 Ñawpajta tukuy imamanta astawan yachacherqaykichej imatachus noqapis yachaqakusqayta: Cristo juchanchejrayku wañorqa, Diosmanta Qhelqasqapi nisqanman jina. 4 P'ampasqa karqa, kawsarimporqataj kinsa p'unchayninman, Diosmanta Qhelqasqapi nisqanman jina. 5 Chantá rikhurerqa Pedroman, chaymantataj chunka iskayniyoj apostolesman. 6 Chay qhepata waj hermanosmampis rikhurillarqataj, phishqa pachaj kuraj tantasqa kashajtinku. Chaykunamanta ashkhas kawsashankuraj, wakintaj wañupunkuña. 7 Chaymanta rikhurillarqataj Santiagoman, chay qhepatataj tukuynin apostolesman. 8 Tukuymanta qhepatataj noqamampis rikhurillawarqataj, sullusqa wawa jina kashajtiypis. 9 Noqaqa apóstoles ukhupi aswan juch'uypaj qhawakuni, manataj apóstol sutiyoj kanaypaj jinachu kani, Diospa Iglesianta tukuchiyta munaspa qhatiykachasqayrayku. 10 Chaywampis kunanqa, Diospa qhasilla k'acha yanapayninrayku imaynachus kasqay kani. Chay k'acha yanapaynintaj noqapajqa mana qhasipajchu karqa. Noqa tukuyninkumanta aswan sinch'ita trabajarqani; chantapis mana noqapunichu, astawanqa Diospa k'acha yanapaynin noqawan kashan, chay ruwarqa. 11 Chayrayku mana imananchu. Noqapis, paykunapis kachunku willarajkuna; tukuyniyku kay evangeliota willararqayku, ajinallatataj qankunapis chayta uyarispa, creerqankichej. 12 Sichus wañusqasmanta Cristoj kawsarimpusqan willakun chayqa, imaraykutaj qankuna ukhumanta wakin ninku wañusqamanta kawsarimpoyqa mana kasqanta? 13 Sichus wañuymanta kawsarimpuy mana kan chayqa, nillataj ari Cristopis kawsarimporqachu. 14 Cristochus mana kawsarimporqa chayqa, qhasi manakaj willasqaykoqa, qhasi manakajllataj Paypi creesqaykichejpis. 15 Cheqamantachus wañusqaspis mana kawsarimpunku chayqa, noqaykupis Diosmanta llulla testigos rikhuriykuman, imaraykuchus willarqayku Payqa Cristota kawsarichimpusqanta. 16 Sichus wañusqas mana kawsarimpunku chayqa, Cristopis manallataj kawsarimporqachu. 17 Cristochus mana kawsarimporqa chayqa, qhasi manakajllataj creesqaykichejpis. Ajinaqa, juchaykichejpiraj kashankichej. 18 Jina chayqa, Cristopi creespa wañojkunapis chinkasqallataj kanku. 19 Kay kunan kawsayllapichus Cristopi suyakushanchej chayqa, tukuy runasmanta aswan khuyay wajchas jina qhawasqas kanchej. 20 Kunanqa yachanchej Cristo kawsarimpusqanta; wañusqasmanta ñawpajta kawsarimpun uj ñawpaj poqoy jina. 21 Imaynatachus wañuy rikhurimorqa uj runanejta, ajinallatataj wañusqasmanta kawsarimpuypis uj runanejllatataj rikhurimorqa. 22 Imaynatachus Adannejta tukuy wañorqanku, ajinallatataj Cristonejta tukuy kawsarimponqanku. 23 Chayrayku sapa uj maychus kanampi kawsarimpun: Ñawpajta Cristoraj ñawpaj poqoy jina; chaymantaraj Cristojta kajkunaqa kawsarimponqanku jamuynimpi. 24 Chaypa qhepanta kay pachaj tukukuynin kanqa, maypachachus Cristo tukuy kamachiyta, tukuy atiyta, tukuy kallpata ima chinkachiytawan reinota Dios Tataman jaywaponqa chaypacha. 25 Cristoqa kamachinampuni tiyan, tukuynin enemigosnin chakisnin uraman churasqa kanankukama. 26 Tukuy enemigosmanta qhepa kaj atipasqaqa wañuy kanqa. 27 Diosmanta Qhelqasqapi nin: Diosqa tukuy imata churarqa chakisnin uraman, nispa. Maypachachus nin Cristoj chakisnin uraman tukuy imata churasqanta chaypacha, mana niyta munanchu Dios Tataqa chakisnin uraman churasqa kasqanta, imaraykuchus Paymin chakisnin uraman churajqa. 28 Chaymanta tukuy imas Paypa chakisnin urapi kashajtinku, kikin Churipis Tatampa makinman churakonqa, pichus tukuy imata chakisnin uraman churajpaman; ajinamanta Diosqa tukuy kaj chhikata kamachenqa. 29 Manachus jina kanman chayqa, imata ruwanqanku wañusqasrayku bautizakojkuna, wañusqas mana imaynamanta kawsarimpojtinkuri? Imaraykutaj wañusqasrayku bautizakunkuri? 30 Chantá, imaraykutaj noqayku sapa kuti wañuy patapi kashayku? 31 Kayta niykichej hermanos, Señorninchej Jesucristopi qankunamanta kusikusqayrayku. Sapa p'unchay wañuy patapi kani. 32 Runa jinallachus tinkorqani phiña animal jina runaswan Efeso llajtapi chayqa, imatataj tarini chaywan? Cheqamanta wañusqaschus mana kawsarimpunku chayqa, mikhuna ari, ujyanataj, imaraykuchus q'aya wañupullasunchej. 33 Ama ch'awkiyachikuychejchu. Sajra runaswan pureyqa k'acha ususta chinkachin. 34 Qankunaqa yuyayniykichejman kutiriychej, amataj astawan juchalliychejchu, imaraykuchus wakin qankunamanta Diosta mana rejsinkuchu. Chayta niykichej qankuna p'enqakunaykichejpaj. 35 Chantá pipis tapukonqachari: Imaynatataj wañusqas kawsarimponqanku? Ima cuerpowantaj sayarimonqanku? nispa. 36 Mana yuyayniyoj runa, qhawariy, muju tarpusqaykeqa mana chay mujullatajchu p'utumun; ñawpajtaqa wañunraj. 37 Mujuta tarpuspaqa, mana kikin plantatapachachu tarpunki, manachayqa mujullata, trigopis, chayrí waj mujupis kachun. 38 Chaymantaj Dios qon imayna rijch'ayniyojchus kananta, munayninman jina. Sapa mujutataj imaynachus kasqanman tukuchin. 39 Jinallataj tukuy aychaqa mana uj layallachu. Runaspa aychanqa uj jina. Uywaspa aychampis waj jina. Challwaspatapis uj jina, p'isqospatapis waj jina. 40 Tiyallantaj cielopi ashkha imas, jinallataj kay pachapipis. Chantá cielopi kajkunaj jatun kaynenqa uj jina, kay pachapi kajkunajpatataj waj jina. 41 Intej k'anchaynenqa uj jina, killaj k'anchaynimpis waj jina, ch'askaspatapis waj jina. Chayrayku uj ch'aska waj ch'askamanta uj jinataj. 42 Ajinallataj kanqa wañusqasmanta kawsarimpoyqa. Ismoj ayata p'ampaykunchej, chaymanta kawsarichisqa kajtaj ni jayk'aj ujtawan wañonqañachu. 43 P'ampasqa kajqa mana munanapaj jinachu, kawsarichisqa kajrí may allimpi qhawasqa kanqa. P'ampasqa kajqa pisi kallpayoj, kawsarichisqa kajrí may atiyniyoj kanqa. 44 Aycha cuerpotachus p'ampaykunchej chayqa, janaj pachapaj wakichisqa cuerpoyojta kawsarichisqa kanqa. Tiyan aycha cuerpo, tiyallantaj janaj pachapi kawsaypaj jina cuerpopis. 45 Jinallataj Diosmanta Qhelqasqapi nin: Ñawpaj kaj runa Adanqa kawsaj runa ruwasqa karqa, nispa. Qhepa kaj Adanrí kawsayta qoj espirituyoj kanampaj churasqa karqa. 46 Jinallataj janaj pachapaj wakichisqa cuerpoqa mana ñawpajchu, manachayqa aycha cuerporaj, chaymantaraj janaj pachapaj wakichisqa cuerpoqa. 47 Ñawpaj kaj runaqa kay pachamanta karqa, jallp'amanta ruwasqa; qhepan kaj runarí janaj pachamanta jamorqa. 48 Imaynachus jallp'a runa karqa, kikillantaj kanku jallp'amanta kajkunapis. Janaj pachamanta kajkunataj, pichus janaj pachamanta jamorqa, chay jina kanku. 49 Imaynatachus rijch'akunchej jallp'amanta ruwasqa runaman, kikillantataj rijch'akusunchej janaj pachamanta Jamojmampis. 50 Kayta niykichej, hermanos: Kay aycha cuerpollaqa mana atinchu Diospa reinonta herenciapaj jap'iyta, nitaj ima ismoj kajpis atinmanchu herenciapaj jap'iyta mana ismoj kajta. 51 Kunanqa uj pakasqa yachayta willaykichej: Mana tukuychu wañusunchej; chaywampis tukuy uj jinaman tukuchisqa kasunchej, 52 ujllata, uj ñawi ch'irmiypi, cornetaj waqaynimpa tukukuynimpi. Corneta waqajtin, wañusqas kawsarimponqanku mana ismoj cuerposniyoj. Chantá noqanchejpis uj jinaman tukuchisqa kasunchej. 53 Kay ismoj cuerpoqa tukupunan tiyan mana ismoj cuerpoman. Kay wañoj cuerpotaj tukupunan tiyan mana jayk'aj wañoj cuerpoman. 54 Maypachachus kay ismoj cuerpo tukuponqa mana ismojman, kay wañoj cuerpotaj tukuponqa mana jayk'aj wañojman chaypacha, junt'akonqa Diosmanta Qhelqasqapi kasqanman jina: Wañoyqa atipasqaña, chinkachisqataj. 55 Kunanqa wañuypa atiynin atipanawanchejpaj manaña kanchu, nitaj ima sajratapis ruwayta atiwanchejchu. 56 Wañoyqa sajrata ruwawanchej jucharayku, juchataj atiyniyoj rikhurin leyrayku. 57 Kunanqa Diosman gracias qosqa kachun, wañuyta atipayta yanapawasqanchejrayku Señorninchej Jesucristonejta. 58 Ajina ari, munasqa hermanosníy, sinch'ita sayaychej mana sayk'uspa, wiñaspapuni Señorpa ruwaynimpi, imaraykuchus yachankichej Señorpa sutimpi ruwasqaykichejqa mana qhasipajchu kasqanta.
