1 CORINTIOS 13

1Sichus noqa parlayman runaspa parlayninkupi, angelespa parlaynimpiwan, manataj munakuyniyoj kayman chayqa, jatun campanaj waqaynin jinalla kayman, chayrí, juch'uy campanaj waqaynin jinalla. 2Sichus Diospa Simi Nisqanta sut'inchayman, yachaymantaj tukuy pakasqa yachaykunata, tukuy kay pacha imasmantawan; sitajchus sinch'ita creeyta atiyman orqosta ithirichinaypaj jina, manataj munakuyniyoj kayman chayqa, mana imachu kayman. 3Tukuy kapuyniytachus wajchasman rak'iyman, cuerpoytapis ninaman enqhaykusqa kanampaj jaywaykuyman mentasqa kanayrayku, manataj munakuyniyoj kayman chayqa, ni imapi yanapawanmanchu. 4Munakuyniyoj runaqa pacienciayoj, k'achataj. Munakuyniyoj runaqa mana envidiakunchu, nitaj may kasqanta yuyakunchu, nillataj jatunchakunchu. 5Munakuyniyoj runaqa mana ruwanchu mana allin kajtaqa, nitaj payllapajchu imatapis mask'an. Mana usqhayllata phiñakunchu, nitaj yuyarikullampunichu paypa contranta ima sajrata ruwasqankumantapis. 6Munakuyniyoj runaqa mana kusikunchu mana cheqan kajmantaqa, astawanqa kusikun cheqa kajmanta. 7Paypa contrampi ima kajtimpis, aguantakullan; jinallataj creeynin, suyakuynin, paciencian ima mana tukukunchu. 8Munakoyqa mana jayk'ajpis tukukonqachu. Diospa Simi Nisqanta sut'inchayrí tukukaponqa; waj parlaypi parlanapaj ateyqa manaña kanqachu; yachaykunapis tukukapullanqankutaj. 9Kunanqa wakillanta yachanchej, wakillantataj sut'inchanchej. 10Maypachachus allin junt'asqa yachay jamonqa chaypacha, pisi yachayninchej tukukaponqa. 11Noqaqa wawallaraj kashaspa, wawa jina parlaj kani, wawa jina yuyaj kani, wawa jinataj imatapis unanchaj kani. Jatunña kaspatajrí, wawa jina ruwanasta saqeporqani. 12Kunanqa rikunchej ayphu espejopi jina ayphullata, qhepamantajrí uyapura rikusunchej maychus kajta. Kunanqa wakillantaraj yachani, qhepamantajrí allinta yachasaj, imaynatachus Dios tukuy imata noqamanta yachan, ajinata. 13Kunanqa wiñaypaj kaykuna kanku: Creey, suyakuy, munakuy ima; chay kinsa kajkunamanta aswan kurajqa munakuymin.

will be added

X\