1 Chaymantá Davidqa soldadospa kurajninkukunawan Tata Diospa Templompi ruwanasta ruwanankupaj kaykunaj churisninkuta churarqanku: Asafpata, Hemanpata, Jedutunpatawan. Paykunaqa arpasninkuta, salteriosninkuta, platillosninkutawan tocaspa, Tata Diospa nisqasninta sut'inchaj kanku. Chay ruwanasta ruwanankupaj kaykuna churasqa karqanku: 2 Asafpa churisninmanta karqanku: Zacur, José, Netanías, Asarela ima. Tatanku Asaf paykunata kamacherqa; payqa reypa kamachisqanman jina Diosmanta willaykunata sut'inchaj. 3 Jedutunpa churisnin sojta karqanku: Gedalías, Zeri, Jesaías, Simei, Hasabías, Matatías ima. Tatanku Jedutuntaj paykunata kamacherqa. Paypis Diosmanta willaykunata sut'inchaj arpata tocarispa Diosman graciasta qonampaj, jinataj yupaychanampaj. 4 Hemanpa churisnin karqanku: Buquías, Matanías, Uziel, Sebuel, Jeremot, Hananías, Hanani, Eliata, Gidalti, Romanti-ezer, Josbekasa, Maloti, Hotir, Mahaziot ima. 5 Tukuy chaykunaqa Hemanpa churisnin karqanku, Hemantaj reypa profetan karqa. Diosqa Hemanta nisqa payta jatunman tukuchinanta, chayraykutaj Hemanman qorqa chunka tawayoj churista, kinsa ususistawan. 6 Tukuy chaykunaqa tatasninkoj kamachiynimpi takej kanku Diospa Templompi platillospa, salteriospa, arpaspa ch'ajwaynimpiwan, Diospa Templompi ruwanankuta ruwanankupaj. Asafwan, Jedutunwan, Hemanwan imaqa reypa kamachiynimpi karqanku. 7 Takinasmanta sumaj yachajkunaqa, chay yachajkuna waj wawqesninkupiwanqa iskay pachaj pusaj chunka pusajniyoj karqanku. 8 Chaypacha, tukuyninku paykuna ukhupi ruwanasninkuta rak'inakorqanku, kurajkunapis kachunku, sullk'aspis, chayrí yachachejkunapis jinallataj yachaqajkunapis. 9 Suertepi llojsejkunaman jina, chay ruwanasninku mit'asqa ñawpaj kajmanta iskay chunka tawayojkamaqa kay jina karqanku: Asafpa ayllunmanta José, Gedalías, Zacur, Izri, Netanías, Buquías, Jesarela, Jesahías, Matanías, Simei, Azareel, Hasabías, Subael, Matatías, Jeremot, Hananías, Josbekasa, Hanani, Maloti, Eliata, Hotir, Gidalti, Mahaziot, Romanti-ezer ima. Paykunamanta sapa ujninkoqa, wawqesninkuwan, chantá churisninkuwan imaqa chunka iskayniyojkama karqanku.
