1 CRÓNICAS 24

1Aaronpa mirayninmanta kajkunapis mit'allapitaj karqanku. Aaronpa churisnin karqanku: Nadab, Abiú, Eleazar, Itamar ima. 2Nadabwan, Abiuwanqa tatankumanta aswan ñawpajta wañorqanku, mana churisniyoj kaspalla. Chayrayku Eleazarwan, Itamarwanqa sacerdotes karqanku. 3Davidtaj, Eleazarpa mirayninmanta Sadocpa yanapayninwan, Itamarpa mirayninmanta Ahimelecpa yanapaynimpiwan paykunata churarqa mit'aspi ruwanasninkuman jina. 4Eleazarpa mirayninmanta qharis kajkuna aswan ashkha karqanku Itamarpamanta nisqaqa. Chayrayku kay jinata paykunata churarqa: Eleazarpa mirayninmanta chunka sojtayoj ayllu kamachejkuna karqanku, Itamarpamantataj pusajlla karqanku. 5Mit'astaqa suerteta choqaspa rak'irarqanku, imaraykuchus Eleazarpa miraynin kajkunamanta, jinataj Itamarpamantapis karqanku Diospa Templompi trabajajkuna, jinallataj Diospa Templompi kamachejkunapis. 6Levitasmanta Natanaelpa ujnin kaj churin Semaiasqa qhelqeri karqa. Payqa chay kamachejkunajpata sutisninkuta qhelqarqa reypa ñawpaqempi, chantá sacerdote Sadocpata, Abiatarpa churin Ahimelecpata, sacerdotespa wasi ayllu kamachejkunajpata, levitaspatawan ñawpaqenkupi ima. Chay mit'astataj suerteta choqaspa rak'irarqanku, Eleazarpa mirayninmanta kajkunapaj iskay mit'asta orqhospa, Itamarpamanta kajkunapajtaj ujllata. 7Chay suertesta orqhojkunaman jinaqa, ñawpaj kajmanta iskay chunka tawayojkama kay jina llojserqa: Joiarib, Jedaías, 8Harim, Seorim, 9Malquías, Mijamín, 10Cos, Abías, 11Jesúa, Secanías, 12Eliasib, Jaquim, 13Hupa, Jesebeab, 14Bilga, Imer, 15Hezir, Afses, 16Petaías, Hezequiel, 17Jaquín, Gamul, 18Delaía, Maazías ima. 19Ajinata rak'irarqanku mit'asta Templopi ruwanasta ruwanankupaj, Israelpa Señornin Tata Diospa kamachisqanman jina ñawpa tatanku Aaronnejta. 20Levitasmanta chay wajkuna karqanku: Amrampa mirayninmanta Subael; Subaelpamantataj, Jehedías; 21Rehebiaspamantataj kuraj kaj Isías. 22Izharpamantataj Selomot karqa. Selomotpamantataj Jahat karqa. 23Hebronpa miraynimpamanta karqanku: Kuraj kajqa Jerías, iskay kajtaj Amarías, kinsa kajtaj Jahaziel, tawa kajtaj Jecamán ima. 24Chayllapitaj karqanku: Uzielpa churin Micaía, Micaiajmantataj Samir karqa. 25Micaíaj wawqen Isías; Isiaspa churin Zacarías; 26Merarijpa churisnin Mahli, Musi ima; jinataj Merarijpa churin, Jaaziaspa churisnimpis. 27Merarijpa mirayninmanta kajkunapis churin Jaaziasmanta kaykuna karqanku: Soham, Zacur, Ibri ima. 28Mahlijpamantataj Eleazar karqa. Payqa mana churisniyojchu karqa. 29Chantá Cispiwan; Cispa churin Jerahmeel. 30Musijpa churisnintaj karqanku: Mahli, Edar, Jerimot ima. Chaykuna karqanku levitasqa wasi ayllusninkuman jina. 31Ajinallatataj paykunapis mit'asta rak'inakorqanku suerteta choqaspa, wasi ayllumanta kurajkuna, sullk'akunapis Aaronpa mirayninmanta kajkuna jinallataj. Chay tukuyta ruwarqanku rey Davidpa ñawpaqempi, Sadocpapi, Ahimelecpapi, jinataj sacerdotespa, levitaspa wasi ayllusninkoj kamachejkunaj ñawpaqenkupi ima.

will be added

X\